Danieli 10:1-21
10 Me no tölu fakhe mamatörö Giro+ razo Weresia, so goroisa nitema Danieli nifotöi Belizasari.+ Sindruhu goroisa daʼö ba ösinia manandrösa ba wasuwöta sebua. Aboto ba dödönia goroisa daʼö ba iʼila geluaha gangilata niʼilania.
2 Me luo daʼö, yaʼo Danieli, no tölu migu abu dödögu.+
3 Lö hadöi uʼa gö sami, lö uʼa nagole ba lö ubadu nagu. Lö ufagule wanikha ba mbotogu sagötö zi tölu migu.
4 Ba ngaluo si 24 ba mbaŵa si oföna, ba zinga nungo nidanö sebua so ndraʼo yaʼia daʼö Ungo Nidanö Tigirisi.*+
5 So samösa niʼilagu zamake nukha si sökhi,+ no ifake mböbö löwi moroi ba ganaʼa si sökhi.*
6 Botonia hulö gara kirisoli,+ sikhalania simane gari mbanua, hörönia simane solo si hola-hola, taʼionia hegöi ahenia simane tembaga si no laʼalösöiʼö irege takile,+ ba ebua linia simane höngö-höngö niha sato.
7 Ha yaʼo zangila daʼö, lö laʼila niha si fao khögu.+ Hizaʼi, ataʼu sibai ira, lalau moloi ba labiniʼö ira.
8 Hatö yaʼo zi toröi, ba lö hadöi saʼae khögu faʼabölö börö gangilata sahöli-höli dödö salua khögu. Afusitö mbawagu, ba atata dölagu.+
9 Aefa daʼö, urongo me mohede ia. Hizaʼi, me mohede ia, telögu ndraʼo tou ba danö ba matonga mate.+
10 Ba urasoi wa so danga sanufa yaʼo.+ Ifadögö ndraʼo irege maosodo ba ubalöduhini tou danö.
11 Imane khögu,
”He Danieli, niha niʼomasiʼö* sibai,+ nehegö hadia niwaʼögu khöu. Iadaʼa, fuli ozizio. No mufatenge ndraʼo ba wamalukhaisi yaʼugö.”
Me urongo daʼö, ulau mozizio si fao fanizi-nizi.
12 Aefa daʼö imane khögu, ”He Danieli, böi ataʼufi.+ No tefondrondrongo wangandröu iʼotarai me awena öforege wangokhögö faʼaboto ba dödö ba me öʼide-ideʼö ndraʼugö föna Lowalangiu, daʼö mbörö wa tohare ndraʼo.+
13 Hizaʼi, 21 hari waʼara, ilawa ndraʼo sondröniaʼö+ moroi ba wamatörö Weresia. Ba tohare Mikhaʼeli*+ ba wanolo yaʼo, yaʼia andrö samösa moroi ba gotalua zondröniaʼö fondrege zalawa* ba toröi ndraʼo ba daʼö ba zinga ndra razo Weresia.
14 Tohare ndraʼo ba wanolo yaʼugö enaʼö aboto ba dödöu hadia zalua ba soimö ba gafuriata ginötö andrö,+ börö me manandrösa gangilata daʼa ba zi so miföna.”+
15 Me iwaʼö daʼö fefu, no ufaköu manö ndraʼo ba lö hede-hedegu.
16 Hizaʼi, mozizio fönagu zi hulö niha andrö ba itufa mbewegu.+ Ubokai mbawagu ba umane khönia, ”He Pa, angilata daʼö zameʼe khögu fanizi-nizi ba lö faʼabölögu saʼae.+
17 Hewisa wa tola fahuhuodo khöu?+ Lö saʼae faʼabölögu ba arakhagö tebai ufahasu ndraʼo.”+
18 Ifuli zui itufa ndraʼo ba iʼabölöʼö.+
19 Aefa daʼö imane, ”He yaʼugö niha niʼomasiʼö* sibai,+ böi ataʼu ndraʼugö.+ Yaʼösöndra waʼahono dödö.+ Abeʼeʼö ndraʼugö, abeʼeʼö ndraʼugö.” Me iwaʼö daʼö, monönö waʼabölögu. Umane khönia, ”Lau fahuhuo Pa, börö me no öbeʼe khögu waʼabölö.”
20 Aefa daʼö imane, ”Hadia öʼila hana wa möi ndraʼo khöu? Iadaʼa, mangawulido ba möido fasuwö ba wolawa sondröniaʼö moroi ba Weresia.+ Me mofanödo, tohare zondröniaʼö moroi ba Yunani.
21 Hizaʼi, ufatunö khöu hadia zi no tesura ba mbuku zindruhu. Ha Mikhaʼeli,+ sondröniaʼö yaʼami,+ zanolo yaʼo ba wamalua daʼa fefu.
Nisura ba gahe zura
^ Sin.: ”Hideke”.
^ Sin.: ”ganaʼa Ufa”.
^ Mazui ”si tohude; nifosumange”.
^ Mazui ”sangokhögö faka sabölö alawa”.
^ Eluahania ”Haniha Zimane Lowalangi?”
^ Mazui ”si tohude; nifosumange”.
