Danieli 11:1-45
11 ”Yaʼo samösa zangabölöʼö ba solumöʼö yaʼia* me döfi siföföna mamatörö Dario+ niha Media andrö.
2 Sindruhu fefu nifatunögu iadaʼa,
”So dania datölu tö razo moroi ba Weresia. Aefa daʼö, razo si öfa dania, abölö oya harato niʼowuloinia moroi ba danö böʼö. Me no abeʼe dödönia ba waʼakayonia andrö, iforege ba wolawa famatörö Yunani.+
3 ”So dania razo sabölö si tohare. Ebolo gamatöröwania+ ba ifalua zomasi dödönia.
4 Hizaʼi, me no fahöna waʼabölönia, adudu wamatörönia ba tebagi ba zi öfa watalinga danö.+ Laheta wamatörönia ba tebeʼe ba niha böʼö, hizaʼi tenga ba ngaʼötönia. Famatöröra tenga simane faʼabölönia.
5 ”Abölö dania razo tanö raya. Yaʼia andrö samösa sondröniaʼö si so barö wamatörönia. Hizaʼi, so dania zokalaisi yaʼia ba abölö ebua wamatörö niha daʼö moroi khönia.
6 ”Mato hauga fakhe aefa daʼö, ifuli fahuwu ira. Möi nono alawe razo tanö raya wamalukhaisi razo tanö yöu ba wamazökhi buʼusa li.* Hizaʼi, taya waʼabölö daʼio nono alawe andrö ba taya göi waʼabölö razo daʼö ba wamatörö. Tebeʼe ba danga niha böʼö nono alawe daʼö hegöi solohe yaʼia, amania awö niha sameʼe khönia faʼabölö.
7 Ba so samösa nösi nomo* nono alawe daʼö si möi fangali razo.* Möi iʼondrasi ndra saradadu, isuwö göli razo tanö yöu ba ikalaisi ira fefu.
8 Mangawuli dania ia ba Miserai ba iʼohe lowalangi nifosumangera, adu nifazökhi moroi ba loga,* gama-gama sebua böli moroi ba wirö hegöi anaʼa awö niha niʼoloiʼö. Ba zi hauga fakhe, iʼaröuʼö ia moroi khö razo tanö yöu,
9 si möi dania ba wanuwö famatörö razo tanö raya, ba mangawuli ia ba mbanuania samösa.
10 ”Lafaʼanö ira iraononia* ba weʼamöi fasuwö ba laʼowuloi ndra saradadu sato. Möi ia ba wanuwö soi daʼö maʼafefu simane molö. Hizaʼi, mangawuli dania ia ba lö iböhöli fasuwö sagötö fangawulinia ba nahania si no mufoʼöli.
11 ”Mofönu sibai razo tanö raya ba möi ia isuwö razo tanö yöu. Ato niha niʼowuloinia hizaʼi mubeʼe ira ba danga razo daʼö.*
12 Iʼoloiʼö fefu ndra niha daʼö. So khönia* waʼasiliyawa. Ibunu ngafulu ribu niha, hizaʼi lö iʼogunaʼö waʼamönania.
13 ”Mangawuli dania razo tanö yöu ba ifuli iʼowuloi niha sato, töra moroi ba zi oföna. Ba zi hauga fakhe aefa daʼö, tohare ia fao ndra saradadu sato solohe fakake wasuwöta.
14 Ba luo daʼö, ato dania niha solawa razo tanö raya.
”Ladönisi dödö niha safaito* ba soimö enaʼö latandraigö wamalua angilata hizaʼi lö mofozu.*
15 ”Tohare razo tanö yöu ba ifazökhi mbaʼa-baʼa saro ba wanuwö banua si no mufoʼöli. Lö fataha ndra saradadu moroi raya simanö göi niha fondrege zabölö khönia. Lö khöra faʼabölö ba wolawa.
16 Niha si tohare ba wolawa yaʼia* ifalua zomasi dödönia ba lö hadöi si tola molawa yaʼia. Mozizio ia* ba Danö si Sökhi+ ba so khönia waʼabölö ba wangohori.
17 Ihalö gangetula ba weʼamöi si fao faʼabölö ba gamatöröwania fefu ba fawuʼu li ira khönia. Ifalua daʼö ba mofozu. Latehegö khönia ba wangohori si samösa ono alawe. Lö faʼabölö ba nono alawe daʼö ba lö tobali ia okhöta razo sagötö faʼara.
18 Iholeʼö ia weʼamöi ba mbanua si so ba zinga nasi ba oya mbanua nirabunia ba daʼö. So samösa gumandru zaradadu somböhöli fangoʼaya irege lö saʼae mangoʼaya ia. Tesulöni khönia wangoʼayania andrö.
19 Aefa daʼö, möi ia* ba mbanua si no mufoʼöli ba soinia samösa, ba manendre ia, asoʼa ia tou ba lö hadöi sanöndra yaʼia.
20 ”Ba tohare samösa niha si möi fangalinia. Ifatenge samösa zanugi pajak* ba woʼanöröi amatöröwa sebua andrö, hizaʼi mate ia ha ba zi hauga hari aefa daʼö, tenga börö wönu mazui fasuwöta.
21 ”Ba tohare dania samösa niha si lö ngaroro si möi fangalinia. Ba lö labeʼe khönia lakhömi wamatörö andrö. Tohare ia ba ginötö waʼahono dödö* ba irabu wamatörö daʼö si fao faʼonekhe.
22 Ikalaisi fefu ndra saradadu si hulö molö. Tehori ira, simanö göi Zondröniaʼö+ fawuʼusa li.+
23 Börö me so zi faʼawö khönia, lö ibato falimo hegöi fasuwö, ba abölö ia börö wanolo soi side-ide.
24 Ba ginötö waʼahono dödö,* möi ia ba provinsi fondrege zi sökhi ba ifalua hadia zi lö irai lafalua ira tuania. Ibagi-bagi gama-gama si no murabu hegöi harato ba nono mbanua. Iʼalui dandrawa ba wanuwö nahia si no mufoʼöli, hizaʼi ha ba zi sabata.
25 ”Iʼowuloi ndra saradadu sato enaʼö monönö waʼabölö hegöi faʼabaraninia ba wolawa razo tanö raya. Ifaʼanö dania ia razo tanö raya awö zaradadu sato hegöi sabölö fasuwö. Hizaʼi, kala ia* börö me no laʼera-era wamalua tandrawa ba wanuwö yaʼia.
26 Niha si fao khönia ba wemanga gö si sökhi, daʼö dania zangekhugö yaʼia tou.
”Lahanigö ndra saradadunia ba ato nibunu.
27 ”Omasi razo si darua andre wamalua si lö sökhi. Fao ira wedadao ba zinga meza ba faoma lalimo nawöra. Hizaʼi, lö mofozu dandrawa nifaluara börö me lö salua ginötö safuria si no muhonogöi.+
28 ”Mangawuli ia* ba soinia ba oya iʼohe gama-gama, so ba dödönia wamadaö ba wolawa buʼusa li niʼamoniʼö. Mofozu wamaluania daʼö, ba mangawuli ia ba soinia.
29 ”Ba ginötö si no muhonogöi, mangawuli dania ia ba möi ia ba wolawa soi tanö raya. Hizaʼi sakali daʼa, tenga simane ba zilalö,
30 börö me tohare göfa Gitimi+ ba wolawa yaʼia andrö taya waʼabaraninia.
”Mangawuli ia ba iforomaʼö wönunia sabölö-bölö ba mbuʼusa li niʼamoniʼö.+ Mofozu wamaluania daʼö. Mangawuli ia zui ba iʼameʼegö tödö niha si no mondröi buʼusa li niʼamoniʼö andrö.
31 Tohare dania ndra saradadunia. Lataʼunöisi naha niʼamoniʼö+ hegöi nahia nifoʼöli ba latenawa zumange nibeʼe ero maʼökhö.+
”Lafazökhi ngawalö niʼogorofi solohe ba waʼatekiko.+
32 ”Niha samalua si lö sökhi ba sanawö buʼusa li andrö, ibaliʼö dania ira sondröi sindruhu börö wehede falimosa.* Hizaʼi, möna dania niha si so faʼaboto ba dödö sanandrösa khö Lowalangi ba mofozu wamaluara daʼö.
33 Satua-tua+ ba khöra ba labotokhi ba dödö niha sato. Ba zi hauga hari, tekiko ira börö wöda ba alitö, teʼoloiʼö ira ba larabu.
34 Ba me alabu ira, ha maʼifu latema wanolo. Ato niha si fao khöra, hizaʼi tenga soroi ba dödö.*
35 Manendre ösa niha si so faʼaboto ba dödö. Daʼö mbörö wa tola tebohouni niha,* muʼehaogö ba muʼamoniʼö+ irugi götö safuria, börö me lö alua nasa ginötö si no muhonogöi.
36 ”Ifalua zomasi dödönia razo andrö,* fayawa dania ia ba iʼalawaʼö ia moroi khö lowalangi böʼö. Moroi ba wehedenia, iʼoʼaya Lowalangi fondrege zalawa yawa lowalangi böʼö.+ Lö alua khönia hadia ia irege iforomaʼö wönunia Lowalangi, börö me hasambalö alua zi no muhonogöi.
37 Lö ifosumange Lowalangi ndra tuania. Lö iʼameʼegö tödö zomasi ndra alawe ba lö göi ifosumange lowalangi böʼö. Hizaʼi ba wamaiginia, abölö alawa ia moroi ba niha böʼö.
38 Ifolakhömi lowalangi nahia nifoʼöli andrö, si lö laʼila ira tuania. Ibeʼe ganaʼa, firö, feremata hegöi gama-gama sebua böli tanö böʼö khö lowalangi daʼö.
39 Börö wanolo moroi* khö lowalangi böʼö andrö, tola ikalaisi nahia nifoʼöli fondrege zaro. Ibeʼe zumange sebua ba niha sanolo yaʼia.* Ibaliʼö ira samatörö ba niha sato. Ibeʼe khöra danö si tobali böli gölöra.
40 ”Ba götö safuria, yaʼia hegöi razo tanö raya faoma lalawa nawöra.* Isuwö ia razo tanö yöu faoma kureta wasuwöta, niha si fakudo awö göfa soya sibai. Möi ia bakha ba mbanua ba isuwö fefu daʼö simane molö.
41 Möi ia göi bakha ba Danö si Sökhi,+ ba oya soi nikalaisinia. Hizaʼi, so zoloi moroi ba dangania yaʼia daʼö Edomo, Moabi hegöi ira sondröniaʼö moroi ba mbanua Gamoni.
42 Lö iböhöli wanuwö ngawalö soi, farahu ba daʼö danö Miserai.
43 Yaʼia dania zamatörö harato si tobini simane anaʼa, firö hegöi ngawalö gama-gama sebua böli moroi ba Miserai. Laʼoʼö lalania ira niha Libia awö Gaitiofia.
44 ”Hizaʼi, abu dödönia börö duria nirongonia moroi ba gatumbukha luo hegöi moroi yöu. Mofanö ia si fao fönu ba wamakiko hegöi ba wangohori niha sato.
45 Ifasindro nosenia sebua ba gotalua nasi sebolo awö hili niʼamoniʼö si sökhi sibai.+ Aefa daʼö, tehori ia ba lö hadöi sanolo yaʼia.
Nisura ba gahe zura
^ Mazui ”ba si tobali baʼa-baʼa khönia”.
^ Mazui ”fahasara dödö”.
^ Sin.: ”sara liwiö moroi ba waʼa”.
^ Te razo tanö raya.
^ Mazui ”adu nifahele”.
^ Te iraono razo tanö yöu.
^ Te razo tanö raya.
^ Te razo tanö raya.
^ Mazui ”ndra sorabu”.
^ Sin.: ”manendre ira”.
^ Te razo tanö raya.
^ Te razo tanö yöu.
^ Te razo tanö yöu.
^ Mazui ”Ifatenge niha sangalui saradadu”.
^ Mazui te ”ba zi lö mudöna-döna”.
^ Mazui te ”Ba zi lö mudöna-döna”.
^ Te razo tanö yöu.
^ Te razo tanö yöu.
^ Mazui ”nizuno-zuno”.
^ Mazui ”börö wehede falimosa; nizuno-zuno”.
^ Sin.: ”tebohouni niha börö ira”.
^ Te razo tanö yöu.
^ Mazui ”Börö wefaonia”.
^ Mazui te ”ba niha somasi ia itolo”.
^ Mazui ”faoma lafatandru dandrura”.
