Danieli 3:1-30
-
Adu anaʼa nifazökhi Nebukanesa (1-7)
-
Fareta ba wanömba adu (4-6)
-
-
Laʼangadugö khö Razo ndraono matua Heberaiʼo si datölu (8-18)
-
”Lö mafosumange lowalangimö” (18)
-
-
Latiboʼö ira bakha ba mbaho galitö (19-23)
-
Teʼefaʼö moroi ba galitö si fao faʼahöli-höli dödö (24-27)
-
Ifolakhömi Lowalangi niha Heberaiʼo razo (28-30)
3 Ifazökhi nadu anaʼa Razo Nebukanesa, faʼalawania mato 27 meter* ba faʼebolonia mato 2,7 meter.* Ifasindro daʼö ba Danö Saloʼo Dura ba Provinsi Mbabilona.
2 Ifatenge niha Razo Nebukanesa ba wangowuloi ira samatörö ba zi sambua provinsi, samatörö ba zi sambua banua, gubernur, sameʼe mene-mene, sololohe kefe, sangetuʼö huku, sohalöwö ba gödo zanguhuku hegöi sohalöwö ba provinsi enaʼö möi ira ba wangowasaini adu andrö nifazökhi Razo Nebukanesa.
3 Börö daʼö, owulo fefu ndra samatörö ba zi sambua provinsi, samatörö ba zi sambua banua, gubernur, sameʼe mene-mene, sololohe kefe, sangetuʼö huku, sohalöwö ba gödo zanguhuku hegöi sohalöwö ba provinsi ba wangowasaini adu andrö nifazökhi Razo Nebukanesa. Mozizio ira föna nadu andrö nifazökhi Razo Nebukanesa.
4 Aefa daʼö, so samösa zohalöwö siʼao, ”Fefu niha moroi ba ngawalö soi hegöi li, mifondrondrongo fareta andre:
5 Na mirongo li dorofe nifazökhi moroi ba dandru, surune, siter,* harafa side-ide, fakake zinunö nifosinali hegöi fakake zinunö tanö böʼö, mituhi danö ba wamosumange adu anaʼa andrö nifazökhi Razo Nebukanesa.
6 Gofu haniha zi lö manuhi tanö, laʼanemaiʼö lafazaumba ia ba mbaho galitö si hola-hola.”+
7 Andrö, me larongo li dorofe nifazökhi moroi ba dandru, surune, siter,* harafa side-ide, fakake zinunö nifosinali hegöi fakake zinunö tanö böʼö, fefu niha moroi ba ngawalö soi hegöi li si no owulo ba daʼö, latuhi danö föna nadu anaʼa andrö nifazökhi Razo Nebukanesa.
8 Me luo daʼö, so ösa niha Galedaia sangondrasi Razo ba laʼangadugö* niha Yahudi.
9 Lamane khö Razo Nebukanesa, ”Yaʼanau nosou Razo sagötö faʼara.
10 No öbeʼe fareta wa dozi niha samondrongo li moroi ba ngawalö fakake zinunö,* lö tola löʼö latuhi danö ba wamosumange adu anaʼa andrö.
11 Gofu haniha zi lö manuhi tanö, hasambalö lafazaumba ia ba mbaho galitö si hola-hola.+
12 Hizaʼi, niha Yahudi si no öfataro tobali sondröniaʼö ba Provinsi Mbabilona, yaʼia daʼö Saderakhi, Mezakhi ba Abedonego,+ lö lafosumange ndraʼugö. Lö lafosumange lowalangiu ba lö latuhi danö föna nadu anaʼa andrö nifazökhiu.”
13 Mofönu sibai Nebukanesa ba iwaʼö enaʼö laʼohe khönia Zaderakhi, Mezakhi ba Abedonego. Me laʼohe fönania,
14 imane Nebukanesa, ”He Saderakhi, Mezakhi ba Abedonego, hadia sindruhu lö mifosumange lowalangigu+ ba lö mangalulu ami föna nadu anaʼa andrö nifazökhigu?
15 Iadaʼa, na omasi ami mituhi danö föna nadu andrö ba ginötö mirongo li ngawalö fakake zinunö,* lö alua khömi hadia ia. Hizaʼi, na lö mituhi danö, laʼanemaiʼö lafazaumba ami ba mbaho galitö si hola-hola. Haniha lowalangi si tola mangefaʼö yaʼami moroi ba dangagu?”+
16 Lamane ira Saderakhi, Mezakhi ba Abedonego, ”He Razo Nebukanesa, tatu no öʼila hadia mabeʼe fanema li.
17 Hewaʼae lafazaumba ndraʼaga ba mbaho galitö si hola-hola, tola iʼorifi ndraʼaga Lowalangi nifosumangema. Hasambalö iʼefaʼö ndraʼaga moroi ba dangau.+
18 Hizaʼi, na lö iʼorifi ndraʼaga Lowalangima, omasiga na öʼila wa lö mafosumange lowalangimö mazui matuhi danö föna nadu anaʼa andrö nifazökhiu.”+
19 Mofönu sibai Nebukanesa khö Zaderakhi, Mezakhi ba Abedonego irege faböʼö zikhalania.* Iwaʼö ba niha enaʼö mewitu kali munönö wangebuaʼö alitö moroi ba zi toʼölö.
20 Ifatenge ösa ndra saradadunia sagabölö ba wamöbö hegöi ba wamazaumba Saderakhi, Mezakhi ba Abedonego bakha ba mbaho galitö.
21 Laböbö ba lafazaumba ira ba mbaho galitö, lö muheta mbarura sebua, nukha, tofi hegöi nukhara tanö böʼö.
22 Börö me abeʼe sibai wehede Razo ba me no töra waʼebua galitö, akhozi ba iʼanemaiʼö mate ba hola-hola galitö niha samazaumba Saderakhi, Mezakhi ba Abedonego.
23 Hizaʼi niha si datölu si no muböbö andrö yaʼia daʼö Saderakhi, Mezakhi ba Abedonego aekhu ira ba mbaho galitö.
24 Ataʼu Razo Nebukanesa ba iʼanemaiʼö mozizio ia. Imane khö ndra sondröniaʼö ba gödo razo, ”Hadia tenga ha datölu niha niböbö ba nifazaumbada bakha ba galitö?” Lamane, ”Atulö Razo.”
25 Imane Razo, ”Hizaʼi, so daöfa niha niʼilagu sowaö-waö ba gotalua galitö. Lö hadia ia khöra, ba si samösa hulö nono lowalangi.”
26 Ihatöʼö ia Nebukanesa ba mbawandruhö mbaho galitö ba imane, ”He Saderakhi, Mezakhi, ba Abedonego, enoni Lowalangi Fondrege Zalawa,+ miʼae baero!” Möi baero Zaderakhi, Mezakhi ba Abedonego moroi ba galitö.
27 Laʼila ira samatörö ba zi sambua provinsi, samatörö ba zi sambua banua, gubernur hegöi ira sondröniaʼö ba gödo razo si no owulo+ wa maʼifu lö sakhozi ira.+ Lö sakhozi mbura, simanö göi mbaru sebua niʼogunaʼöra ba lö aböu simbo ira.
28 Aefa daʼö imane Nebukanesa, ”Yatesuno Lowalangi nifosumange Zaderakhi, Mezakhi ba Abedonego+ si no mamatenge malaʼikania ba wangorifi enoninia. Faduhu dödöra khönia ba lalawa fareta Razo. Latehegö mate ira moroi na lafosumange lowalangi böʼö baero Lowalangira samösa.+
29 Börö daʼö, ubeʼe fareta: Dozi niha moroi ba ngawalö soi hegöi li sangoʼaya Lowalangi nifosumange Zaderakhi, Mezakhi ba Abedonego, hasambalö mukhökhö ia ba omonia mubaliʼö naha waniboʼö si taʼunö ba niha sato.* Lö hadöi Lowalangi böʼö si tola mameʼe fangorifi baero Lowalangira.”+
30 Aefa daʼö, ibeʼe dadaoma sebua Razo khö Zaderakhi, Mezakhi ba Abedonego ba Provinsi Mbabilona.+
Nisura ba gahe zura
^ Yaʼia daʼö fakake zinunö nifosinali.
^ Yaʼia daʼö fakake zinunö nifosinali.
^ Mazui ”laböbögö zi lö duhu ba”.
^ Ba li Heberaiʼo, mufuli mutötöi fakake zinunö nitutunö ba ayati 5.
^ Ba li Heberaiʼo, mufuli mutötöi fakake zinunö nitutunö ba ayati 5.
^ Mazui ”lagunia”.
^ Mazui te ”naha waniboʼö sasao”.
