Danieli 4:1-37
4 ”Oroisa Razo Nebukanesa ba niha fefu moroi ba ngawalö soi hegöi li, si so ba zi sagörö ulidanö: Yaʼahowu!
2 Omasido ututunö khömi dandra awö ngawalö zahöli-höli dödö nifalua Lowalangi Fondrege Zalawa khögu.
3 Ebua sibai dandra nifaluania khögu ba sahöli-höli dödöda nifaluania! Famatörönia andrö ba no famatörö si lö tebulö ba mamatörö ia irugi zi lö aetu.+
4 ”Yaʼo Nebukanesa, ohahau dödögu weʼaso ba nomogu ba fahöna zoguna khögu ba gödo razo.
5 Hizaʼi, mangifi ndraʼo irege ataʼudo. Me ulau mörö, uʼila gambara hegöi angilata sataʼu ndraʼo.+
6 Andrö wa ukaoni fefu niha sogonekhe si so ba Mbabilona enaʼö laʼombakhaʼö khögu geluaha wangifigu andrö.+
7 ”Me luo daʼö, möi khögu niha sonekhe fakelemu, samaʼeleʼö, niha Galedaia* hegöi sonekhe manahö döfi.+ Ututunö khöra wangifigu andrö, hizaʼi lö laʼila laʼombakhaʼö geluahania.+
8 Ba gafuriata, tohare Danieli nifotöi Belizasari+ simane töi lowalangigu.+ So khönia waʼabölö moroi khö lowalangi niʼamoniʼö.+ Ututunö khönia wangifigu ba umane,
9 ”’He Belizasari, kafalo niha sonekhe fakelemu.+ Aboto ba dödögu wa so khöu waʼabölö moroi khö lowalangi niʼamoniʼö,+ ba lö hadöi si tobini si lö öʼila.+ Iadaʼa, fatunö khögu hadia geluaha gangilata niʼilagu ba wangifi.
10 ”’Ba gangilata niʼilagu me mörö ndraʼo, so geu+ salawa sibai ba dalu danö.+
11 Tedou waʼalawa geu daʼö ba itugu esolo. Irugi dalu mbanua waʼalawania, irege oroma ia ba niha gulidanö maʼasagörö.
12 Sökhi sibai mbulunia, ba fahöna mbuania irege tola iʼasogö gö ba ngawalö gurifö. Molombase gutu ndruʼu barö lumönia, ba mangazuni wofo ba ndrahania. Fefu ngawalö gurifö lasöndra göra khönia.
13 ”’Ba gangilata daʼö, uʼila denge-tenge* niʼamoniʼö si möi mitou moroi ba zorugo.+
14 Muʼao ia, ”Obö geu daʼö+ ba taba ndrahania, dudugö mbulunia ba fazawili mbuania! Enaʼö moloi gurifö si so barö lumönia hegöi fofo sanuge ba ndrahania.
15 Hizaʼi, röi duhenia awö waʼania bakha ba danö ba gotalua ndruʼu si so ba mbenua. Böbö duhenia faoma siʼöli ba tembaga. Akha göna ia namo mbanua ba toröi ia ba daʼö awö gutu ndruʼu hegöi sinanö si so ba gulidanö.+
16 Akha tefaböʼöni dödönia tobali tödö gurifö sagötö zi fitu fakhe.*+
17 Daʼa gangetula nifaʼema denge-tenge* andrö,+ ba niʼombakhaʼö ndra malaʼika niʼamoniʼö, irege laʼila fefu niha wa Lowalangi Fondrege Zalawa yaʼia Zamatörö amatöröwa niha gulidanö+ ba tola ibeʼe gofu haʼökhö zomasi ia, hewaʼae niha fondrege zi numana niha daʼö.”
18 ”’Daʼö zalua ba wangifigu, yaʼo Razo Nebukanesa. Iadaʼa, ombakhaʼö khögu geluaha wangifigu andrö, yaʼugö Belizasari, börö me lö hadöi niha sonekhe ba soi daʼa si tola mamoʼeluaha fangifigu andre.+ Hizaʼi, hasambalö tola öfoʼeluaha börö me so khöu waʼabölö moroi khö lowalangi niʼamoniʼö.’
19 ”Me luo daʼö, ataʼu Danieli nifotöi Belizasari+ ba lö hede-hedenia ba zi sabata.
”Aefa daʼö imane Razo, ’He Belizasari, böi ataʼufi wangifi daʼö ba eluahania.’
”Imane Belizasari, ’He yaʼugö Razo, akha alua wangifi daʼö hegöi eluahania ba nudumö awö niha si fatuwu khöu.
20 ”’Eu niʼilamö andrö, sesolo ba salawa, si tedou irugi mbanua si yawa, soroma ba gulidanö maʼasagörö,+
21 si sökhi bulu ba si fahöna bua irege tola iʼasogö mbalazo zauri ba gulidanö, nahia wolombase gutu ndruʼu, ba mangazuni wofo ba ndrahania,+
22 yaʼugö geu daʼö Razo. Itugu monönö lakhömiu ba monönö waʼaro dadaomau. Itugu monönö lakhömiu irugi mbanua si yawa+ ba mamatörö ndraʼugö irugi wondrege danö.+
23 ”’Aefa daʼö, öʼila göi denge-tenge* niʼamoniʼö+ si möi mitou moroi ba zorugo. Muʼao ia, ”Obö ba fufu geu daʼö. Hizaʼi, röi duhenia awö waʼania bakha ba danö ba gotalua ndruʼu ba mbenua. Böbö duhenia faoma siʼöli ba tembaga. Akha göna ia namo mbanua ba toröi ia ba daʼö awö gutu ndruʼu sagötö zi fitu fakhe.”+
24 Daʼa geluaha wangifimö Razo. No ihalö gangetula Lowalangi Fondrege Zalawa wa alua dania khöu daʼa.
25 Mufofanö ndraʼugö moroi ba gotalua niha ba toröiʼö ba gotalua gutu ndruʼu. Öʼa dania ndruʼu simane sawi, ba ibasöi ndraʼugö namo mbanua.+ Alua daʼö ba zi fitu fakhe,+ irege aboto ba dödöu wa Lowalangi Fondrege Zalawa andrö Zamatörö amatöröwa niha gulidanö ba tola ibeʼe daʼö gofu haʼökhö zomasi ia.+
26 ”’Hizaʼi, börö me no muwaʼö wa muröi duhe awö waʼania,+ ifuli tobali ndraʼugö razo na no aboto ba dödöu wa Lowalangi si so ba zorugo zamatörö.
27 Andrö yaʼugö Razo, fondrondrongo niwaʼögu khöu. Böi saʼae falua horö, hizaʼi falua zatulö. Böi saʼae falua zi lö sökhi, hizaʼi foromaʼö waʼahakhö dödö ba niha si numana. Maʼatö lö tebulö waʼohahau dödöu sagötö faʼauriu.’”+
28 Alua fefu daʼa khö Razo Nebukanesa.
29 Me 12 waŵa aefa daʼö, me mowaö-waö Nebukanesa ba dete gödonia ba Mbabilona,
30 imane, ”Molakhömi sibai Mbabilona si no ufazökhi andre. Börö kuaso hegöi faʼabölögu wa tola ufazökhi ia tobali nahiagu irege oroma lakhömigu sebua.”
31 Lö sawai iwaʼö niwaʼönia, so li moroi ba zorugo, ”He Razo Nebukanesa, fondrondrongo goroisa daʼa, ’No muheta khöu dadaoma waʼarazo.+
32 Mufofanö ndraʼugö moroi ba gotalua niha ba toröiʼö ba gotalua gutu ndruʼu. Öʼa dania ndruʼu simane sawi. Alua khöu daʼö ba zi fitu fakhe, irege aboto ba dödöu wa Lowalangi Fondrege Zalawa andrö Zamatörö amatöröwa niha gulidanö ba tola ibeʼe daʼö gofu haʼökhö zomasi ia.’”+
33 Ba iʼanemaiʼö alua wehede daʼö khö Nebukanesa. Mufofanö ia ba gotalua niha ba ibörögö iʼa ndruʼu simane sawi. Abasö mbotonia ba namo mbanua, anau mbunia simane bu moyo, ba saʼania simane saʼa wofo.+
34 ”Na no awai ginötö wanguhuku andrö,+ yaʼo Nebukanesa, ufaöga hörögu ba mbanua si yawa ba ifuli motödö ndraʼo. Usuno ba ufolakhömi Lowalangi Fondrege Zalawa sauri sagötö faʼara, börö me si lö aetu kuasonia andrö ba lö tebulö so wamatörönia götö-götö waʼara.+
35 Lö hadöi niha gulidanö si tola mufaedogö khönia. Ifalua fefu zomasi ia khö ndra saradadu zorugo awö niha gulidanö. Lö hadöi si tola manaisi yaʼia*+ mazui sanofu nifaluania.+
36 ”Ba ginötö daʼö ifuli motödö ndraʼo. Ufuli zui uʼokhögö lakhömi waʼarazo, faʼabölö ba faʼatehöngö.+ Omasi sibai falukha khögu ndra sohalöwö ba gödo razo hegöi ira tuhenöri. Mangawuli khögu dadaoma waʼarazo, ba abölö tefosumange ndraʼo moroi ba zilalö.
37 ”Iadaʼa, yaʼo Nebukanesa, usuno, uʼalawaʼö ba ufolakhömi Razo samatörö ba zorugo,+ börö me sindruhu ba atulö fefu nifaluania,*+ ba tola iʼailasi niha sebua faʼasiliyawa.”+
Nisura ba gahe zura
^ Eluahania niha sonekhe ba wanahö salua ba zi so miföna awö zanahö döfi.
^ Sin.: ”zanaro”.
^ Sin.: ”götö”.
^ Sin.: ”zanaro”.
^ Sin.: ”zanaro”.
^ Mazui ”manaha tangania”.
^ Sin.: ”lalania”.
