Danieli 5:1-31
5 Ifalua gowasa sebua Razo Belisasa+ khö zi saribu tuhenöri, ba ibadu nagu fönara.+
2 Ba me no mabu Mbelisasa, ifatenge niha ba wangai mako anaʼa ba mako firö nihalö namania* Nebukanesa ba gosali Yeruzalema.+ Omasi ia iʼogunaʼö mako andrö ba wamadu agu si fao ira tuhenöri, foʼomonia ba döi hegöi foʼomonia tanö böʼö.
3 Ba laʼohe khönia mako anaʼa nihalö ba gosali Lowalangi si so ba Yeruzalema. Ba fefu ira labadu nagu moroi ba mako andrö.
4 Labadu nagu ba lasuno nadu nifazökhi moroi ba ganaʼa, firö, tembaga, siʼöli, eu hegöi kara.
5 Me luo daʼö, iʼanemaiʼö oroma duturu danga niha sanura ba dowa sahatö ba naha wandru si so ba gödo razo. Iʼila Razo danga niha sanura andrö.
6 Ba afusitö mbawa Razo. Ataʼu ia, ombuyu gahenia+ ba manizi mbalö duhinia.
7 Muʼao Razo ba wogaoni ira samaʼeleʼö, niha Galedaia* hegöi sonekhe manahö döfi.+ Imane ba niha sogonekhe ba Mbabilona, ”Haniha zangila mombaso nisura andre ba sangombakha khögu eluahania, ba ubeʼe khönia mbaru sebua si ungu laʼa-laʼa* ba ubeʼe ba mbaginia naya anaʼa.+ Ubaliʼö ia samatörö numero tölu ba wamatörö andre.”+
8 Ba möi fefu niha sogonekhe ba wangondrasi Razo, hizaʼi lö laʼila labaso nisura andrö ba lö laʼila laʼombakhaʼö geluahania.+
9 Börö daʼö, ataʼu sibai Razo Belisasa ba afusitö mbawania. Fawuka göi dödö ndra tuhenöri.+
10 Me irongo ratu wehede Razo awö ndra tuhenöri, möi ia ba nahia gowasa. Imane Ratu, ”Yaʼanau nosou Razo. Hana wa afusitö mbawamö? Lö moguna ataʼu ndraʼugö.
11 So samösa niha ba mbanua nifatöröu sangokhögö faʼabölö moroi khö lowalangi niʼamoniʼö.+ No ituyu ia amau, Razo Nebukanesa, tobali sondröniaʼö niha sonekhe fakelemu, samaʼeleʼö, niha Galedaia* hegöi sonekhe manahö döfi,+ börö me iʼokhögö waʼatua-tua, faʼaboto ba dödö ba faʼonekhe simane niʼokhögö lowalangi.
12 Yaʼia andrö Danieli, hizaʼi Belizasari+ döinia nibeʼe Razo. No sahöli-höli dödö waʼonekhe niʼokhögönia, faʼaboto ba dödö hegöi faʼatua-tuania irege iʼila iʼombakhaʼö geluaha wangifi, dahö-dahö, ba tola iʼasiwai gabula dödö sebua.+ Iadaʼa, fakaoniʼö Danieli enaʼö ifatunö dania khöu geluaha nisura andrö.”
13 Laʼohe Danieli khö Razo. Manofu Razo khönia, ”Hadia yaʼugö nifotöi Danieli andrö, niʼoloiʼö namagu+ moroi ba Yehuda?+
14 Urongo wa so khöu waʼabölö moroi khö lowalangi,+ ba no sahöli-höli dödö waʼatua-tua niʼokhögöu, faʼaboto ba dödöu hegöi faʼonekheu.+
15 No laʼohe fönagu niha sogonekhe awö ndra samaʼeleʼö ba wombaso nisura andre hegöi ba wamatunö eluahania. Hizaʼi, lö laʼila lafoʼeluaha.+
16 Urongo wa öʼila öfoʼeluaha ngawalö hadia ia+ ba tola öʼasiwai gabula dödö sebua. Na öʼila öbaso ba ötutunö geluaha nisura andrö, ubeʼe khöu nukha sebua si ungu laʼa-laʼa,* ba ubeʼe ba mbagimö naya anaʼa. Ubaliʼö göi ndraʼugö samatörö numero tölu ba wamatörö andre.”+
17 Imane Danieli, ”Iröʼö manö mbuala daʼö mazui beʼe ia ba niha böʼö. Hizaʼi, hasambalö ubaso khöu nisura andrö ba ufatunö geluahania.
18 No ibeʼe Lowalangi Fondrege Zalawa wamatörö, faʼabölö, lakhömi awö döi sebua khö namau, Razo Nebukanesa.+
19 Börö waʼabölö andrö nibeʼe Lowalangi khönia, laʼataʼufi ia dozi niha moroi ba ngawalö soi.+ Ibunu mazui itehegö auri dozi niha somasi ia, ba iʼalawaʼö mazui iʼide-ideʼö gofu haniha zomasi ia.+
20 Hizaʼi, me so khönia waʼasiliyawa ba faʼabeʼe högö irege ifalua zomasi dödönia,+ muheta khönia dadaoma waʼarazo ba taya lakhöminia.
21 Mufofanö ia moroi ba gotalua niha, tebeʼe khönia dödö gurifö ba toröi ia ba gotalua galide gatua. Duʼu gönia simane sawi ba abasö mbotonia ba namo mbanua irege aboto ba dödönia wa Lowalangi Fondrege Zalawa andrö Zamatörö amatöröwa niha gulidanö ba tola ibeʼe daʼö gofu haʼökhö zomasi ia.+
22 ”Ba yaʼugö Razo Belisasa, ononia,* lö khöu fangide-ngideʼö hewaʼae no öʼila daʼö fefu.
23 Ölawa Lowalangi samatörö sorugo+ ba öfatenge niha wangai mako moroi ba nomonia.+ Yaʼugö, ira tuhenöri, foʼomou ba döi hegöi foʼomou tanö böʼö, no mibadu nagu moroi ba mako andrö ba misuno nadu nifazökhi moroi ba wirö, anaʼa, tembaga, siʼöli, eu ba kara, hewaʼae lö laʼila niha, lö larongo-rongo ba lö aboto ba dödöra hadia ia.+ Lö öfosumange Lowalangi samatörö faʼaurimö+ awö ngawalö nifaluau.
24 Daʼö mbörö wa ifatenge duturu danga andrö ba wanura.+
25 Daʼa nisurania: MENE, MENE, TEKEL ba PARSIN.
26 ”Daʼa geluaha wehede andrö: MENE, no iʼerai Lowalangi ginötö wamatöröu ba no iʼetuʼö.+
27 ”TEKEL, no lasuʼa ndraʼugö ba waliʼera* ba sindruhunia ambö.
28 ”PERES, no mubagi-bagi wamatöröu ba tebeʼe ba niha Media hegöi Feresia.”+
29 Aefa daʼö, ibeʼe goroisa Belisasa enaʼö labeʼe khö Danieli nukha sebua si ungu laʼa-laʼa* ba labeʼe ba mbaginia naya anaʼa. Muʼombakhaʼö wa no tobali samatörö numero tölu Danieli ba wamatörö andrö.+
30 Ba mbongi daʼö, labunu Mbelisasa razo niha Galedaia.+
31 Tebeʼe wamatörönia khö Dario+ niha Media. Me luo daʼö, mato 62 fakhe ndröfi Dario.
Nisura ba gahe zura
^ Mazui ”duania”.
^ Eluahania niha sonekhe ba wanahö salua ba zi so miföna awö zanahö döfi.
^ Mazui ”sobowo doru”.
^ Eluahania niha sonekhe ba wanahö salua ba zi so miföna awö zanahö döfi.
^ Mazui ”sobowo doru”.
^ Mazui ”maʼuwunia”.
^ Mazui ”kilo”.
^ Mazui ”sobowo doru”.
