Danieli 6:1-28
6 No ihalö gangetula Razo Dario ba wamataro si 120 niha ndra samatörö ba zi sambua provinsi ba wamaigi-maigi amatöröwania.+
2 Ifataro göi datölu zondröniaʼö+ ba gödo razo samaigi-maigi yaʼira ba sondrorogö okhöta razo. Samösa moroi ba gotaluara yaʼia daʼö Danieli.+
3 Börö me sahöli-höli dödö waʼatua-tua Danieli,+ andrö wa tohude ia moroi khö ndra sondröniaʼö ba gödo razo tanö böʼö hegöi khö ndra samatörö ba zi sambua provinsi. Ifataro ia Razo ba wondröniaʼö si sagörö famatörönia.
4 Me luo daʼö, laʼalu-alui lala ira sondröniaʼö ba gödo razo awö ndra samatörö ba zi sambua provinsi ba wamobahulu Danieli sanandrösa ba halöwö famatörö nifaluania. Hizaʼi, lö lasöndra zala mazui si lö sökhi nifaluania. Lö falimo ia ba lö irai iʼosiwawöi mazui ifalua zala ba halöwönia.
5 Andrö wa lamane, ”Lö irai tasöndra zala ba wamobahulu Danieli baero ba woloʼö oroisa Lowalanginia.”+
6 Möi ndra sondröniaʼö ba gödo razo awö ndra samatörö ba zi sambua provinsi ba wamalukhaisi Razo ba lamane, ”Yaʼanau nosou Razo Dario.
7 Fefu ndra sondröniaʼö ba gödo razo, ira samatörö ba zi sambua banua, samatörö ba zi sambua provinsi, menteri awö ndra gubernur, no hasara dödöra ba wamazökhi amakhoita hegöi si tebai mufalua andre: Gofu haniha zangandrö khö lowalanginia mazui ba niha böʼö baero khöu sagötö zi 30 hari, mutiboʼö ia ba dögi zingo.+
8 Börö daʼö, maʼandrö khöu yaʼugö Razo, beʼe gamakhoita daʼö+ ba teka faböi labulöʼö, börö me tebai mufawuʼa huku niha Media hegöi Feresia.”+
9 Iteka gamakhoita daʼö Razo Dario hegöi si tebai mufalua andrö.
10 Me iʼila Danieli wa no lateka gamakhoita daʼö, mangawuli ia ba nomonia. Yawa ba lote nomonia, so zandrela si no teboka ba zi sambua bateʼe sangotahögö Yeruzalema.+ Simane si toʼölö ifalua me lö mubeʼe gamakhoita andrö, medölu kali maʼökhö ituhi danö Danieli ba wangandrö hegöi ba wanuno Lowalanginia.
11 Me luo daʼö, iʼanemaiʼö möi bakha ndra sondröniaʼö hegöi ira samatörö ba laʼila wa iʼangaröfili Lowalanginia Danieli ba iʼandrö waʼahakhö dödö.
12 Laʼondrasi Razo ba lafasugi ba dödönia sanandrösa ba zi tebai mufalua andrö, ”He Razo, hadia tenga no öteka gamakhoita sangumaʼö wa hasambalö mutiboʼö ba dögi zingo dozi niha sangandrö khö lowalanginia mazui ba niha böʼö baero khöu sagötö zi 30 hari?” Imane Razo, ”Atulö, ba moloʼö huku niha Media hegöi Feresia, tebai mubulöʼö gamakhoita daʼö.”+
13 Iʼanemaiʼö lamane, ”Danieli andrö, niha niʼoloiʼö moroi ba Yehuda,+ lö ifosumange ndraʼugö ba lö iʼameʼegö tödö gamakhoita si no öteka. Lö tebulö mangandrö ia medölu kali maʼökhö.”+
14 Me irongo daʼö Razo, abu sibai dödönia ba lö sökhi-sökhi dödönia. Iʼalui lala ba wangefaʼö Danieli, ba iʼera-era manö ofeta aekhu luo.
15 Ba gafuriata, fao ndra sondröniaʼö awö ndra samatörö ba wangondrasi Razo ba lamane, ”He Razo, törö tödöu wa moloʼö huku niha Media hegöi Feresia, tebai mubulöʼö gamakhoita si no ihonogöigö razo mazui si tebai mufalua.”+
16 Ibeʼe fareta Razo ba wondraʼu Danieli ba latiboʼö ia ba dögi zingo.+ Imane Razo khö Danieli, ”Yaʼiʼorifi ndraʼugö Lowalangimö andrö si lö aetu öfosumange.”
17 Aefa daʼö, laʼohe sambua gara sebua ba wondruhö bawa dögi zingo andrö. Ifotandro gara daʼö Razo faoma laedurunia awö laeduru ndra tuhenöri. Tebai mubulöʼö gangetula sanandrösa khö Danieli.
18 Aefa daʼö, mangawuli Razo ba gödonia. Bongi daʼö, fuasö ia ba lö omasi ia larara dödönia.* Lö göi iʼila mörö.
19 Ha moluo sibai, iʼalio-liokö Razo weʼamöi ba dögi zingo.
20 Me arakhagö irugi mbawa dögi zingo andrö, muʼao ia khö Danieli timba zeʼe, ”He Danieli, enoni Lowalangi sauri, hadia tola iʼorifi ndraʼugö moroi ba mbawa zingo Lowalangi si lö aetu öfosumange?”
21 Iʼanemaiʼö imane Danieli, ”Yaʼanau nosou Razo.
22 No ifatenge malaʼikania Lowalangi nifosumangegu ba wondruhö bawa zingo andre+ enaʼö lö hadia ia khögu.+ Iʼila Lowalangi wa lö fasala ndraʼo. Lö göi si fasala ndraʼo khöu.”
23 Omuso sibai dödö Razo ba ibeʼe fareta enaʼö laheta Danieli moroi ba dögi zingo andrö. Möi baero Danieli ba lö sesokho ia börö waʼafaduhu dödönia khö Lowalanginia.+
24 Aefa daʼö, ibeʼe goroisa Razo enaʼö laraʼu niha samobahulu Danieli ba mutiboʼö ira ba dögi zingo andrö fabaya iraonora hegöi foʼomora. Fatua lö ofeta ira si tou, no lafadöni ira singo ba lasasawi dölara.+
25 Ifaʼoheʼö zura Razo Dario ba ngawalö soi hegöi li maʼafefu ba zi sagörö ulidanö,+ ”Yaʼohahau dödömi!
26 Ubeʼe goroisa ba niha fefu si so ba zi sagörö famatörögu enaʼö miʼataʼufi Lowalangi Danieli.+ Yaʼia andrö Lowalangi sauri götö-götö waʼara. Lö irai adudu wamatörönia ba faʼabölönia irugi zi lö aetu.+
27 Itolo+ ba iʼorifi nono mbanuania, ifalua dandra awö ngawalö zahöli-höli dödö ba mbanua si yawa awö danö.+ No iʼorifi Danieli moroi ba mbawa zingo.”
28 Ohahau dödö Danieli sagötö mamatörö Dario+ hegöi Kiro niha Weresia.+
Nisura ba gahe zura
^ Mazui te ”itimbagö zamoli ngawalö wakake ba wanunö”.
