Danieli 7:1-28
7 Me no döfi mamatörö Razo Belisasa+ ba Mbabilona, mangifi Danieli ba alua khönia gangilata me mörö ia.+ Isura fefu wangifinia andrö+ ba itanö ba zura.
2 Imane Danieli,
”Ba gangilata niʼilagu ba zi bongi, uʼila wa mobade nasi börö nangi moroi ba zi öfa watalinga danö.*+
3 Aefa daʼö, so öfa ngaʼeu gurifö sebua sibai+ moroi ba nasi. Oi faböʼö-böʼö.
4 ”Si oföna hulö zingo,+ ba moʼafi moyo.+ Aefa daʼö, uʼila wa adöni gafinia ba tefazawa ia moroi ba danö irege tefozizio gahenia si dombua hulö niha. Tebeʼe göi khönia dödö niha.
5 ”Aefa daʼö, so gurifö si dua si hulö mberua.+ Ifazawa gahenia si sara ba so tölu rozi döla nosu ba mbawania, ba gotalua nifönia. So zangumaʼö khönia, ’Faoso, oyaʼö wemanga nagole.’+
6 ”Aefa daʼö, uʼila gurifö tanö böʼö si hulö harimo,+ hizaʼi so öfa ngawua gafinia simane afi wofo. So öfa ngawua högönia+ ba tebeʼe khönia waʼabölö ba wamatörö.
7 ”Baero daʼö, ba gangilatagu ba zi bongi andrö, uʼila gurifö si öfa. Daʼö gurifö sataʼu niha, si hokha mbu zamaigi ba sabölö sibai. Moroi ba ziʼöli nifönia ba egebua sibai. Iʼa ba ifufu gofu hadia zi so, ba ihundra-hundra zi toröi.+ Faehu ia moroi ba gurifö no mege. So fulu rozi dandrunia.
8 Me unehegö dandrunia, so dandru side-ide+ si tumbu ba gotaluania, ba mudeha dandru si tölu rozi si so ba daʼö. Mohörö dandru side-ide andre hulö hörö niha, ba fayawa mbawania.+
9 ”Ba lö uböhöli wamaigi irege mufaʼoli dadaoma waʼarazo, ba no modadao+ yawa Zi No Alawa Döfi andrö.+ Afusi nukhania simane faʼafusi esi,+ ba hulö mbu mbiri-biri si sökhi mbunia. Dadaomania moroi ba galitö, ba gaolo-gaolonia moroi ba galitö si hola-hola.+
10 Mangele galitö föna dadaomania.+ So saribu kali saribu zangai halöwö khönia, ba fulu ribu kali fulu ribu zosindro fönania.+ Tebörögö Wanguhuku* andrö+ ba mubokai gölu-gölu zura fönania.
11 ”Lö uböhöli wamaigi börö me lö aetu iwaʼö wehede fayawasa tandru andrö.+ Aefa daʼö, uʼila wa mubunu gurifö daʼö, mufakiko mbotonia ba mutiboʼö gamatelania bakha ba galitö.
12 Sanandrösa ba gurifö tanö böʼö,+ muhalö wamatörö andrö ba dangara ba mutehegö auri ira irugi ba ginötö si no muhonogöi.
13 ”Ba gangilata niʼilagu bongi daʼö, uʼila samösa zi tohare si hulö nono niha+ si fao ba lawuo si yawa. Latehegö khönia wangondrasi Si No Alawa Döfi andrö+ ba laʼohe ia fönania.
14 Tebeʼe khönia kuaso,+ sumange+ ba famatörö, enaʼö dozi niha moroi ba ngawalö soi hegöi li lafosumange ia.+ Faʼabölönia irugi zi lö aetu ba si lö tebulö, ba lö irai adudu wamatörönia.+
15 ”Ba yaʼo Danieli ba sabu sibai tödö. Angilata si no uʼila andrö zameʼe khögu faʼataʼu.+
16 Ba uʼondrasi samösa moroi ba gotaluara si no mozizio ba daʼö ba usofu hadia geluaha daʼö fefu. Itema ligu ba iʼombakhaʼö khögu geluahania.
17 ”’Si öfa ngaʼeu gurifö sebua sibai+ eluahania daöfa razo samatörö ba gulidanö.*+
18 Hizaʼi, niha niʼamoniʼö andrö khö Wondrege Zalawa+ zanema famatörö daʼö.+ Lö aetu laʼokhögö+ sagötö faʼara.’
19 ”Aefa daʼö, omasido nasa uʼila sanandrösa ba gurifö si öfa. Faböʼö ia moroi ba gurifö tanö böʼö. Daʼö gurifö sataʼu sibai ita, ifönia moroi ba ziʼöli, ba saʼania moroi ba tembaga. Iʼa ba ifufu gofu hadia zi so, ba ihundra-hundra zi toröi.+
20 Omasido göi uʼila nasa sanandrösa ba zi fulu dandru+ si so ba högönia hegöi tandru si sambua tö sabölö ebua moroi ba dandru tanö böʼö. Me tumbu dandru daʼö, so tölu rozi dandru sadeha.+ Mohörö dandru andrö ba fayawa mbawania.
21 ”Uʼila me fasuwö dandru daʼö ba niha niʼamoniʼö ba yaʼia zi möna.+
22 Aefa daʼö, tohare Zi No Alawa Döfi andrö+ ba ihalö gangetula ba wangoʼawögö niha niʼamoniʼö khö Wondrege Zalawa.+ No irugi inötönia ba niha niʼamoniʼö andrö ba wanema famatörö.+
23 ”Itohugö nasa wanutunö khögu, ’Urifö si öfa eluahania famatörö si öfa ba gulidanö. Faböʼö wamatörö daʼa moroi ba wamatörö tanö böʼö. Iʼa, ihundra-hundra ba ifufu zi sagörö ulidanö.+
24 Tandru si fulu rozi andrö eluahania dafulu razo si otarai ba wamatörö daʼa. Na no aefa ira, so samösa tö zi tohare. Faböʼö ia moroi ba razo tanö böʼö, ba so datölu razo nikalaisinia.+
25 Fahuhuo ia ba wolawa Fondrege Zalawa+ ba ifakao niha niʼamoniʼö khö Wondrege Zalawa. Omasi ia ibulöʼö ginötö hegöi huku, ba mubeʼe ba dangania niha niʼamoniʼö ba zi sagötö, dua götö ba matonga götö.*+
26 Hizaʼi tebörögö Wanguhuku ba muhalö wamatörö si so ba dangania enaʼö tola muhori ba mubunu ia.+
27 ”’Aefa daʼö, fefu wamatörö, kuaso hegöi lakhömi gamatöröwa si so ba gulidanö maʼasagörö, tebeʼe ba niha niʼamoniʼö khö Wondrege Zalawa andrö.+ Lö tebulö wamatöröra+ ba fefu wamatörö tanö böʼö lafosumange ba laʼoʼö ira.’
28 ”Daʼö gamozuania. Ba yaʼo, Danieli, ataʼudo sibai. Afusitö mbawagu. Hizaʼi, uʼiröʼö fefu daʼö bakha ba dödögu.”
Nisura ba gahe zura
^ Sin.: ”börö zi öfa nangi moroi ba mbanua si yawa”.
^ Mazui ”Modadao Zanguhuku”.
^ Sin.: ”si tohare moroi ba gulidanö”.
^ Eluahania tölu a matonga götö.
