Danieli 8:1-27
8 Me no tölu fakhe mamatörö Razo Belisasa,+ yaʼo Danieli, alua khögu gangilata böʼö.+
2 Ba gangilata daʼö, so ndraʼo ba Gödo Zusa+ ba Provinsi Elama.+ Uʼila wa so ndraʼo ba zinga Nungo Nidanö Ulaʼi.
3 Ba so sara mbiri-biri si matua+ si zizio föna nungo nidanö daʼö. So dua rozi dandrunia salawa.+ Abölö alawa dandrunia si sara moroi ba danö böʼö. Ba gafuriata awena oroma dandrunia salawa andrö.+
4 Ba uʼila, fatandru mbiri-biri si matua andrö tanö ba gaekhula, tanö yöu ba tanö raya. Lö hadöi urifö si tola molawa yaʼia, ba lö hadöi si tola aefa moroi ba dangania.*+ Asiliyawa sibai ia ba ifalua zomasi dödönia.
5 Aefa daʼö, uʼila sageu nambi si matua+ si tohare moroi ba gaekhula luo. Alio sibai ia wanöröi ulidanö irege lö göna gahenia tou ba danö. So sara dandru sebua ba gotalua hörönia.+
6 Si fao fönu, fagohi ia ba wangondrasi biri-biri si dombua tandru andrö si zizio föna nungo nidanö.
7 Itugu ifahatö ia ba mbiri-biri andrö, itandru irege afatö dandrunia si dombua börö wönunia. Lö faʼabölö mbiri-biri ba wolawa yaʼia. Iʼolobigö tou ba danö ba ihundra-hundra. Lö hadöi si tola mangefaʼö biri-biri andrö ba dangania.*
8 Aefa daʼö, itugu asiliyawa nambi andrö. Hizaʼi, me no so khönia waʼabölö, iʼanemaiʼö afatö dandrunia sebua. Ba tumbu öfa rozi dandru sebua wangalinia ba no iʼotahögö zi öfa watalinga danö.*+
9 Moroi ba gotalua dandru daʼö, tumbu sambua dandru side-ide. Monönö waʼebuania tanö raya, tanö ba gatumbukha luo hegöi ba gamaudu Danö si Sökhi.+
10 Itugu ebua sibai dandru daʼö irege ikhamö zaradadu zorugo. Itorugö ösa ba gulidanö zaradadu zorugo hegöi döfi, ba ihundra-hundra ira.
11 Asiliyawa ia khö Zondröniaʼö saradadu. Ihalö zumange si toʼölö mubeʼe khö Zondröniaʼö ba idudugö naha niʼamoniʼö nifazökhi Zondröniaʼö andrö.+
12 Börö me no ifalua zala, mululu khönia ndra saradadu hegöi sumange si toʼölö mubeʼe. Lö iböhöli tandru daʼö waniboʼö sindruhu ba gulidanö. Ifalua zomasi dödönia ba mofozu nifaluania.
13 Aefa daʼö, urongo li malaʼika si fahuhuo. Imane malaʼika tanö böʼö khö malaʼika si fahuhuo andrö, ”Hawaʼara tebato zalua ba gangilata andrö yaʼia daʼö angilata sanandrösa ba zumange si toʼölö mubeʼe, olalöwa si möi börö waʼadudu,+ ba fohundra-hundra nahia niʼamoniʼö awö ndra saradadu andrö?”
14 Imane khögu, ”Irugi 2.300 wongi ba maʼökhö.* Mufuli muʼehaogö mangawuli nahia niʼamoniʼö simane ba zilalö.”
15 Me uʼila gangilata daʼö, yaʼodo Danieli, ba me uʼalu-alui geluahania, iʼanemaiʼö mozizio fönagu zi hulö niha.
16 Urongo li niha moroi ba gotalua Nungo Nidanö Ulaʼi,+ muʼao ia, ”He Gaberieli,+ tolo niha daʼö enaʼö aboto ba dödönia gangilata niʼilania.”+
17 Andrö wa iʼondrasi ndraʼo. Hizaʼi, me tohare ia, ataʼudo sibai irege utuhi danö. Imane khögu, ”He ono niha, yaʼaboto ba dödöu wa alua dania gangilata andre ba ngaluo safuria.”+
18 Me fahuhuo ia, telögu ndraʼo tou ba danö ba matonga mate. Igogohe ndraʼo ba itolodo wezizio.+
19 Aefa daʼö imane, ”Ufatunö dania khöu hadia zalua ba gafuriata wönu Lowalangi, börö me alua daʼö ba ngaluo safuria ba ginötö si no muhonogöi.+
20 ”Biri-biri si matua si dua rozi tandru andrö niʼilamö eluahania razo-razo Media hegöi Feresia.+
21 Nambi si matua satabö bu, eluahania razo Yunani.+ Tandru sebua si so ba gotalua hörönia eluahania razo si oföna.+
22 Afatö dandru andrö ba öfa rozi wangalinia.+ Eluahania, so öfa wamatörö moroi ba soinia, hizaʼi tenga simane faʼabölö razo si oföna waʼabölöra.
23 ”Ba gafuriata wamatöröra, ba ginötö falawu zala nifalua zanawö huku, tohare samösa razo safaito ba sonekhe falimo.*
24 Ebua sibai dania kuasonia hizaʼi tenga börö waʼabölönia samösa. Yaʼia mbörö wa alua wamakiko sebua, ba hasambalö mofozu fefu nifaluania. Ihori niha sagabölö awö niha niʼamoniʼö.+
25 Si fao faʼonekhe, ato niha nilimonia enaʼö mofozu waʼaurinia. Asiliyawa ia bakha ba dödönia. Ba luo waʼahono dödö,* ato niha nihorinia. Ilawa göi Zondröniaʼö yawa zondröniaʼö. Hizaʼi, mufatö ia tenga börö waʼabölö danga niha.
26 ”Atulö fefu wehede si so ba gangilata daʼa sanandrösa ba zi bongi awö ba zihulö wongi. Hizaʼi, böi fatunö ba niha böʼö, börö me ara nasa waʼaluania ba zi so miföna.”+
27 ”Yaʼo Danieli, urasoi wa marase sibai ndraʼo ba mofökhödo ba zi hauga hari.+ Aefa daʼö, maosodo ba uhalö halöwö föna razo.+ Hizaʼi, lö nasa taya waʼahöli-höli dödögu börö gangilata andrö maʼafefu, ba lö sangila eluahania.+
Nisura ba gahe zura
^ Mazui ”waʼabölönia”.
^ Mazui ”waʼabölönia”.
^ Sin.: ”watalinga nangi ba mbanua si yawa”.
^ Sin.: ”ba sihulö wongi”.
^ Mazui ”iʼila wehede falimosa”.
^ Mazui te ”Ba zi lö mudöna-döna”.
