Danieli 9:1-27
9 Mufataro Dario+ tobali razo ba wamatörö niha Galedaia.+ Yaʼia andrö ono Gahasiwero ngaʼötö niha Media.
2 Me no döfi mamatörö ia, yaʼo Danieli, aboto ba dödögu moroi ba mbuku* wa moloʼö oroisa Yehowa khö Yeremia samaʼeleʼö, tedudugö dania Yeruzalema+ ba 70 fakhe muröi ia.+
3 Andrö wa uʼandrö wanolo moroi khö Yehowa Lowalangi sindruhu. Fuasö ndraʼo,+ uʼonukha goni ba uhawui ndraʼo awu.
4 Mangandrödo khö Yehowa Lowalangigu, ba ufaduhuʼö horö nifalua soigu,
”He Yehowa Lowalangi sindruhu, Lowalangi solakhömi ba sahöli-höli dödö, samalua buʼusa linia ba sangoromaʼö faʼomasi si lö faröi+ ba niha sangomasiʼö yaʼia ba soloʼö oroisania,+
5 no mafalua horö fönau ba no fasalaga, no mafalua zi lö sökhi ba no mamadaö ndraʼaga.+ Lö niʼoʼöma oroisamö hegöi huku nibeʼeu.
6 Lö nifondrondrongoma fehede ndra samaʼeleʼö andrö khöu,+ sangogunaʼö töimö ba wahuhuosa khö razoma, ira sondröniaʼö, tuama awö nono mbanua soi daʼa maʼafefu.
7 He Yehowa, satulö ndraʼugö ba sindruhu. Hizaʼi, ha faʼaila niʼasogöma simane salua maʼökhö andre. Fefu niha Yehuda, ono mbanua Yeruzalema awö ndraono Gizaraʼeli, no öfazawili ira ba ngawalö soi sahatö mazui saröu, börö me faröi ira khöu.+
8 ”He Yehowa, no fasala ndraʼaga khöu, simanö göi ndra razoma, ira sondröniaʼö hegöi ira tuama. Aila sibai ndraʼaga.
9 He Yehowa Lowalangima, safönu faʼahakhö dödö ndraʼugö ba sangefaʼö sala+ hewaʼae no mamadaö ndraʼaga khöu.+
10 Lö maʼoʼö niwaʼö Yehowa Lowalangima. Lö maʼoʼö huku nibeʼeu khöma, nifaʼema ndra samaʼeleʼö.+
11 Fefu ndraono Gizaraʼeli no lasawö goroisamö. No maʼerogö ndraʼugö ba lö maʼoʼö niwaʼöu. No mafalua horö fönau. Andrö wa öʼasogö khöma wangelifi hegöi fahölusa si no tesura ba Goroisa Moze, enoni Lowalangi sindruhu andrö.+
12 Öfalua zi no irai öwaʼö khöma hegöi khö ndra sondröniaʼö yaʼaga,*+ öʼasogö khöma wamakao sebua. Lö irai alua zimane daʼö ba gulidanö baero ba Yeruzalema.+
13 Alua khöma fefu wamakao andrö, tefaudu simane si no tesura ba Goroisa Moze.+ Hizaʼi, lö niʼandröma faʼahakhö dödö khö Yehowa Lowalangima. Lö mafalalini gera-erama+ ba lö aboto ba dödöma wa hasambalö öfalua niwaʼöu.
14 ”Lö aetu inehegö ndraʼaga Yehowa ba iʼasogö khöma wamakao. Oi atulö fefu nifalua Yehowa Lowalangima. Hizaʼi, lö maʼoʼö niwaʼönia.+
15 ”He Yehowa Lowalangima, no öheta nono mbanuamö ba danö Miserai börö dangau sabölö+ ba no öʼombakhaʼö döimö irugi maʼökhö.+ Hizaʼi, no fasala ndraʼaga ba mafalua zi lö sökhi.
16 He Yehowa, börö me lö mamalö öfalua zatulö,+ maʼandrö khöu enaʼö lö mofönuʼö ba lö abao dödöu ba mbanuamö Yeruzalema, hili niʼamoniʼö andrö khöu. Fefu niha si so ba zi fasuima, laʼoʼaya Yeruzalema hegöi ono mbanuamö börö horö nifaluama awö horö nifalua ndra tuama.+
17 Iadaʼa, he Lowalangima, fondrondrongo wangandrö hegöi ngarö-ngarö dödö genonimö andre. Börö döimö Yehowa, foromaʼö wa öfahowuʼö naha niʼamoniʼö+ andrö khöu si no adudu.+
18 He Lowalangigu, beʼe mbörö dalingau ba fondrondrongo. Bokai höröu ba faigi waʼadudu salua khöma hegöi salua ba mbanua sangotöigö töimö. Mangandröga khöu, tenga me no mafalua zatulö, hizaʼi börö me no sebua faʼahakhö dödö ndraʼugö.+
19 He Yehowa, fondrondrongo. He Yehowa, efaʼö zalama.+ He Yehowa, ameʼegö tödö ndraʼaga ba tologa. Börö döimö he Lowalangigu, taʼi-taʼi, börö me no laʼotöigö döimö banua daʼa hegöi ono mbanuamö.”+
20 Me lö saetu nasa wehedegu, fangandrögu, ba me ufaduhuʼö horö nifaluagu hegöi nifalua soigu Izaraʼeli, ba uʼandrö waʼahakhö dödö Yehowa Lowalangigu börö hili niʼamoniʼö andrö khönia,+
21 me lö saetu nasa wangandrögu, tohare Gaberieli+ si hulö nono niha si no irai uʼila ba gangilatagu.+ Tohare ia me arakhagö tebeʼe zumange ba zi bongi, me no erege sibai dödögu.
22 Ibeʼe khögu waʼaboto ba dödö ba imane,
”He Danieli, tohare ndraʼo ba wameʼe khöu faʼaboto ba dödö hegöi faʼatua-tua.
23 Me öbörögö wangandrö, utema goroisa ba möi ndraʼo ba wangombakha khöu, börö me niʼomasiö* sibai ndraʼugö.+ Börö daʼö, angeragö daʼa ba yaʼaboto ba dödöu gangilata andre.
24 ”No muhonogöigö 70 migu* ba soimö hegöi ba mbanuamö niʼamoniʼö+ ba wangohori olalöwa, ba wangeheta horö,+ ba wangefaʼö sala,+ ba wangaʼasogö sindruhu sagötö faʼara,+ ba wangaroʼö* angilata hegöi famaʼeleʼö+ awö wangamoniʼö Nahia Wondrege Niʼamoniʼö.*
25 Böi zi lö öʼila ba yaʼaboto ba dödöu, so dania 7 migu ba 62 migu,+ iʼotarai me tebeʼe goroisa ba wangehao hegöi ba wangaʼazökhi mangawuli Yeruzalema+ irugi tohare Mesia,*+ Sondröniaʼö andrö.+ Ifuli muʼehaogö ba mufazökhi mangawuli mbanua andrö, farahu ba daʼö newali awö mbandra, hizaʼi mufalua daʼö ba ginötö si basaki.
26 ”Na no aefa zi 62 migu andrö, mubunu Mesia+ ba lö iʼokhögö hadia ia.+
”Aefa daʼö, tohare samösa zondröniaʼö awö nono mbanuania ba wanudugö banua andrö hegöi nahia niʼamoniʼö+ khönia simane molö solohe faʼatekiko. Lö tebato wasuwöta irugi gafuriata.* Hasambalö alua waʼadudu, simane si no muhonogöi.+
27 ”Ifalua mbuʼusa li andrö ba niha sato ba zi samigu. Ba dalu zi samigu andrö, ibatogö zumange nitunu hegöi sumange nibeʼe.+
”Tohare zolohe faʼadudu andrö ba dete gafi niʼogorofi.+ Fefu zi no muhonogöi hasambalö muduwagö ia ba zi no adudu, irege alua wanudugö andrö.”
Nisura ba gahe zura
^ Eluahania gölu-gölu mbuku niʼamoniʼö.
^ Sin.: ”khö ndra sanguhuku yaʼaga”.
^ Mazui ”tohude; nifosumange”.
^ Mazui ”ba wamotandro”.
^ Sin.: ”ba wamayoini Niʼamoniʼö Yawa Niʼamoniʼö Fefu”.
^ Samigu = 7 fakhe.
^ Mazui ”Nibayoini”.
^ Te eluahania afuriata nahia niʼamoniʼö andrö.
