Ba Mbanua Niha Keriso ba Nefeso 2:1-22
2 Aefa daʼö, Lowalangi zangorifi yaʼami, hewaʼae no mate ami börö golalöwa ba horö nifaluami.+
2 Me mböröta, lala waʼaurimi andrö simane lala waʼauri niha gulidanö ba götö* daʼa.+ Miʼoʼö zamatörö talu mbanua,+ yaʼia daʼö lala wangera-ngera+ samaelungu tödö niha si lö moloʼö.
3 No irai tafalua me föna gamuata wangisö nösi andrö.+ Taʼoʼö zomasi nösi hegöi fangera-ngerada si fasala.+ Iʼotarai me tumbu ita, no sinangea tatema wanguhuku moroi khö Lowalangi,+ simane niha böʼö.
4 Hizaʼi, börö me fahöna waʼahakhö dödö Lowalangi+ ba iʼomasiʼö sibai ita,+
5 hewaʼae mate ita börö golalöwada, iʼorifi ita ba iʼosambuaʼö ba khö Keriso.+ Faʼasökhi dödönia sebua* zangorifi yaʼami.
6 Baero daʼö, isusugi ita Lowalangi ba ibeʼe khöda dadaoma ba zorugo börö me teʼosambuaʼö ita khö Keriso Yesu,+
7 irege ba götö* si so miföna, iforomaʼö waʼasökhi dödönia sebua* ba waʼoböwönia khöda si no ha sambua ba khö Keriso Yesu.
8 Yaʼami samati, no teʼorifi ami börö waʼasökhi dödönia sebua.*+ Börö daʼö, mitema wangorifi andrö tenga börö wangodödögömi samösa, hizaʼi no buala moroi khö Lowalangi.
9 Tenga bua waʼerege dödömi,+ andrö wa tebai so zanuno yaʼia samösa.
10 Omböila danga Lowalangi ita, ba ifazökhi ita+ enaʼö tafalua zi sökhi börö me teʼosambuaʼö ita ba khö Keriso Yesu.+ Daʼö nitatugöi Lowalangi khöda ba wamobörö.
11 Börö daʼö mitörö tödömi, niha baero ami me föna, ba dozi niha nisuna faoma tanga niha lafotöi ami ”si lö nisuna”.
12 Me luo daʼö, lö saboto ba dödömi Keriso, tefabali ami ba ndraono Gizaraʼeli ba lö si fao ami ba mbuʼusa li Lowalangi si no ifabuʼu.+ Lö hadöi tötönafömi ba lö khömi faʼaboto ba dödö sanandrösa khö Lowalangi ba gulidanö andre.+
13 Iadaʼa, no teʼosambuaʼö ami ba khö Keriso Yesu, hewaʼae no aröu ami khö Lowalangi me mböröta, iadaʼa no ahatö ami börö ndro Keriso.
14 Börö Keriso wa teʼatulöʼö ita.+ No iʼosambuaʼö zi dombua ngawawa+ ba idudugö goto-oto samabali yaʼira.+
15 No itehegö mbotonia, ba no iheta Goroisa Moze sanandrösa ba gamakhoita samaʼudu yaʼira, enaʼö teʼosambuaʼö ba khönia zi dombua ngawawa, tobali sambua soi si bohou+ ba satulö.
16 Baero daʼö, iʼatulöʼö zi dombua ngawawa andrö khö Lowalangi ba döla geu famakaonia,*+ enaʼö tobali si sambua boto, börö me faʼamatenia zangeheta faʼudusa ba gotaluara.+
17 Tohare ia ba wanuriaigö turia somuso dödö khömi sanandrösa ba waʼatulö dozi si no aröu khö Lowalangi hegöi faʼatulö ba niha sahatö khönia.
18 Börö ia wa lö taha-tahada yaʼita si dombua soi andrö ba wangondrasi Ama faoma eheha niʼamoniʼö si faoma taʼokhögö.
19 Andrö wa tenga niha baero mazui si fatewu ami.+ Yaʼami andrö ono mbanua+ simane niha niʼamoniʼö, ba ösi nomo Lowalangi ami.+
20 No teʼazökhi ami ba zi sambua fondrasi yaʼia daʼö ira sinenge ba samaʼeleʼö.+ Yesu Keriso zi tobali kara wondrasi siföföna.+
21 Fefu domosa si ha sambua ba khönia, si no muhaogö muʼosambuaʼö,+ tedou tobali osali niʼamoniʼö khö Yehowa.*+
22 Yaʼami si ha sambua khönia, fagölö-gölö teʼazökhi ami tobali omo Lowalangi, börö me ba daʼö so geheha niʼamoniʼö.+
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
