Ba Mbanua Niha Keriso ba Nefeso 3:1-21
3 Yaʼo Faulo, nikuru+ börö Keriso Yesu soguna khömi yaʼami niha baero.
2 No mirongo me tebeʼe ba dangagu+ halöwö ba wanolo yaʼami enaʼö mitema mbua waʼasökhi dödö sebua* moroi khö Lowalangi.
3 No teʼoromaʼö khögu zi tobini niʼamoniʼö andrö, nisuragu khömi mege maʼifu.
4 Na mibaso daʼa, miʼila wa no aboto ba dödögu zi tobini niʼamoniʼö andrö+ sanandrösa khö Keriso.
5 Me mböröta, lö muʼombakhaʼö zi tobini andrö ba niha fefu. Iadaʼa, no iʼombakhaʼö daʼö eheha niʼamoniʼö khö ndra sinenge hegöi ira samaʼeleʼö niʼamoniʼö khönia.+
6 Si tobini andrö yaʼia daʼö: Börö duria somuso dödö, fao niha baero si no teʼosambuaʼö khö Keriso Yesu ba wanema ondröita. Tobali ira si ha sambua boto,+ ba fao ira wanema nifabuʼu Lowalangi khöma.
7 Tobali ndraʼo sangai halöwö si tobini andrö börö waʼasökhi dödö sebua* moroi khö Lowalangi. Ibeʼe khögu howu-howu si tefaudu ba waʼabölönia.+
8 Tebeʼe khögu waʼasökhi dödönia sebua* andrö+ hewaʼae yaʼo wondrege zide-ide ba gotalua niha niʼamoniʼö,+ enaʼö tola uturiaigö duria somuso dödö ba soi böʼö sanandrösa ba howu-howu moroi khö Keriso si tebai musuʼa,
9 ba enaʼö aboto ba dödö niha fefu hewisa wamalua si tobini niʼamoniʼö andrö+ nibiniʼö Lowalangi iʼotarai mböröta, samazökhi fefu hadia ia.
10 Na simanö, börö mbanua niha Keriso+ wa aboto ba dödö ndra samatörö awö zi so kuaso ba zorugo sanandrösa ba waʼatua-tua Lowalangi soroma ba ngawalö hadia ia.+
11 Tefaudu daʼa ba gohitö dödönia götö-götö waʼara, si no ihonogöi enaʼö alua ba khö Keriso+ Yesu Soʼaya yaʼita,
12 börö me mamati ita khö Keriso, lö taha-tahada ba lö alawö ita wangondrasi Lowalangi.+
13 Börö daʼö, uʼandrö enaʼö böi ide-ide dödömi ba wamaigi famakao nitaögögu ba khömi, börö me famakaogu andre zamolakhömi yaʼami.+
14 Daʼö mbörö wa utuhi danö föna Nama.
15 Fefu nösi nomo ba gulidanö hegöi ba zorugo, moʼömö töi ira khönia.
16 Mangandrö ndraʼo khö Lowalangi safönu lakhömi, enaʼö iʼaroʼö dödömi hegöi fangera-ngerami+ si fao faʼabölö moroi ba gehehania,
17 ba enaʼö monahia Keriso ba dödömi si fao faʼomasi börö wamatimi.+ Yamowaʼa+ ba aro ami ba dete wondrasi andrö,+
18 enaʼö aboto ba dödömi si fao ira niha niʼamoniʼö hawaʼebolo, hawaʼanau, hawaʼalawa, hawaʼabakha,
19 ba enaʼö aboto ba dödömi waʼomasi Keriso+ sabölö sökhi moroi ba waʼatua-tua, irege moʼahonoa ami ba gamuata Lowalangi si no ibeʼe khömi.
20 Khö Lowalangi si tola mangogunaʼö faʼabölönia sohalöwö bakha ba dödöda+ enaʼö oya zi tola ifalua moroi ba niʼandröda hegöi si tola takhalaigö,+
21 khönia lakhömi andrö nibeʼe ba mbanuania hegöi khö Keriso Yesu irugi zi lö aetu. Yaduhu.
Nisura ba gahe zura
^ Faigi Geluaha Ngawua Wehede.
^ Faigi Geluaha Ngawua Wehede.
^ Faigi Geluaha Ngawua Wehede.
