Esera 3:1-13
3 Me no irugi baŵa si fitu+ ba me so ndraono Gizaraʼeli ba mbanuara, owulo ira ba Yeruzalema.
2 Yesua+ ono Yosadaki hegöi ira ere tanö böʼö, simanö göi Zerubabeli+ ono Zelatieli+ ba ira talifusönia, labörögö wamazökhi naha wanunu sumange khö Lowalangi Gizaraʼeli, enaʼö tola labeʼe zumange nitunu ba daʼö, simane si no tesura ba Goroisa Moze,+ samaʼeleʼö khö Lowalangi sindruhu.
3 Hewaʼae ataʼu ira ba soi si fasui yaʼira, lafazökhi naha wanunu sumange ba nahia si fagölö.+ Ba naha wanunu sumange andrö, labeʼe zumange nitunu khö Yehowa ba zihulö wongi hegöi ba zi bongi.+
4 Lafalua Gowasa Nose Ndraha Geu* moloʼö huku si no tesura.+ Ero maʼökhö labeʼe zumange nitunu moloʼö si no latatugöi ba zi maʼökhö daʼö.+
5 Aefa daʼö, lö aetu-aetu labeʼe zumange nitunu+ hegöi sumange ba mbaŵa si bohou,+ ba fefu gowasa niʼamoniʼö+ khö Yehowa. Baero daʼö, so zumange si no aoha gölö fameʼe+ khö Yehowa nibeʼera si fao faʼomuso dödö.
6 Ba ngaluo si oföna ba mbaŵa si fitu,+ labörögö wameʼe sumange nitunu khö Yehowa, hewaʼae lö mubörögö wamazökhi fondrasi ba gosali Yehowa.
7 Labeʼe gefe ba niha sanaba kara+ hegöi khö ndra tuka sogonekhe.+ Labeʼe gö, idanö hegöi fanikha ba niha Zidona awö ba niha Diro, si tobali fangali eu eresi nihalöra moroi ba Libano numalö ba labua göfa ba Yafo.+ Mufalua daʼö börö me no latema goroisa Razo Kiro niha Weresia.+
8 Ba ndröfi si dua me no larugi nomo Lowalangi sindruhu ba Yeruzalema, labörögö wohalöwö ba mbaŵa si dua ira Serubabeli ono Zelatieli, Yesua ono Yosadaki awö ndra talifusöra, ira ere hegöi niha Lewi ba fefu zi tohare ba Yeruzalema sangawuli moroi ba nahia wangoloiʼö.+ Lafataro niha Lewi si töra 20 fakhe ba wamaigi-maigi famazökhi omo Yehowa.
9 Yesua hegöi iraononia matua ba ira talifusönia matua, ba Kadimieli awö ndraononia matua yaʼia daʼö ngaʼötö Yehuda, fao ira ba wamaigi-maigi halöwö nifalua ba nomo Lowalangi sindruhu. Simanö göi ngaʼötö Henadadi,+ iraononia matua ba talifusönia matua, niha Lewi andrö.
10 Me no awai lafazökhi wondrasi gosali Yehowa ira sohalöwö,+ mosindro ndra ere samake baru sebua si no mutatugöi ba wanuno Yehowa si fao torofe.+ Simanö göi nösi nomo Gasafo niha Lewi andrö laʼogunaʼö ziʼöli nifaondra wamözi,* moloʼö si no ihonogöi Dawido, razo ndraono Gizaraʼeli.+
11 Laʼandrö saohagölö khö Yehowa+ ba lasuno ia faoma sinunö nifagema-gema, ”börö me si sökhi ia; lö aetu waʼomasinia si lö faröi ba Gizaraʼeli”.+ Manunö fefu ira ba soi daʼö lasuno Yehowa me no awai lafazökhi wondrasi nomo Yehowa.
12 Ato gere, niha Lewi hegöi ira sondröniaʼö ba nösi nomo zatua ira matua, laduhugö weʼe me laʼila wondrasi nomo Lowalangi andre. Yaʼira andrö satua si no irai mangila omo Lowalangi siföföna.+ Ato niha tanö böʼö zi fao ba waʼomuso dödö+
13 irege lö laʼila saʼae lafaböʼöni hezo li zanunö ba hezo li zeʼe, börö me terongo ba zaröu waʼebua lira.
Nisura ba gahe zura
^ Mazui ”Nahia Waʼatoröi Sabata”.
^ Mazui ”simbal”. Daʼa alat musik moroi ba ziʼöli, si hulö wiga niʼogaolo, lafaondra wamözi yaʼia na muʼogunaʼö.
