Esera 5:1-17
5 Aefa daʼö, mamaʼeleʼö Hagaʼi+ faoma Zakharia+ maʼuwu Ido+ khö ndra niha Yahudi ba Yehuda hegöi ba Yeruzalema ba döi Lowalangi ndraono Gizaraʼeli sondröniaʼö yaʼira.
2 Me luo daʼö, labörögö zui wamazökhi omo Lowalangi+ ba Yeruzalema ira Serubabeli+ ono Selatieli ba Yesua+ ono Yosadaki. Fao khöra ndra samaʼeleʼö khö Lowalangi ba wamarou tödöra.+
3 Me luo daʼö, tohare Datenai gubernur ba mbanua Yefo Nungo Nidanö,* fao khönia Zitara-bosinai hegöi awöra wohalöwö, manofu ira, ”Haniha zamarou yaʼami wamazökhi omo daʼa hegöi ba wangasiwai döla-dölania?”
4 Lamane nasa, ”Fatunö haniha manö döi ndra matua sohalöwö ba daʼa!”
5 Hizaʼi, irorogö Lowalangi ndra sondröniaʼö niha Yahudi+ irege tebai lasaisi halöwöra ira niha daʼö fatua lö lafaʼoheʼö zura khö Dario ba latema gangetulania.
6 Daʼa nösi zura nibeʼe khö Razo Dario moroi khö Datenai gubernur ba mbanua Yefo Nungo Nidanö, simanö göi Zitara-bosinai ba awöra wohalöwö, yaʼia daʼö ira salahi gubernur ba mbanua Yefo Nungo Nidanö.
7 Lafaʼoheʼö khönia zura, daʼa nösinia:
”Khö Razo Dario:
”Yaʼahowu!
8 Omasiga maʼombakhaʼö khöu Razo wa möiga ba nomo Lowalangi Fondrege Zebua ba Provinsi Yehuda. Mufazökhi nomo andrö moroi ba gara segebua, ba mufasa geu ba dowania. Owölö-ölö sibai ira wohalöwö ba laʼodödögö wamalua yaʼia irege tedou halöwö andrö.
9 No masofu khö ndra sondröniaʼö yaʼira, ”Haniha zamarou yaʼami wamazökhi omo daʼa hegöi ba wangasiwai döla-dölania?”+
10 No masofu haniha manö döira enaʼö tola masura ba mafatunö khöu döi-töi ndra matua sondröniaʼö yaʼira.
11 ”Daʼa niwaʼöra: ’Yaʼaga andre enoni Lowalangi samatörö sorugo hegöi ulidanö. Mafuli mafazökhi nomo si no mufasindro ba zi hauga fakhe silalö, nifasindro razo sebua ba Gizaraʼeli.+
12 Hizaʼi, no mofönu Lowalangi samatörö sorugo+ hegöi ulidanö börö gamuata ndra tuama. Andrö wa ilulu ira Lowalangi ba danga Nebukanesa+ razo Mbabilona, niha Galedaia andrö. Idudugö nomo daʼa+ razo ba iʼohe ira ba Mbabilona.+
13 Ba ndröfi siföföna wamatörö Giro razo Mbabilona, ibeʼe fareta enaʼö lafuli lafazökhi nomo Lowalangi andre.+
14 Ibeʼe baero gama-gama firö ba anaʼa andrö Razo Kiro nihalö Nebukanesa moroi ba nomo Lowalangi si so ba Yeruzalema ba si no iʼiröʼö ba nahia wamosumange lowalanginia ba Mbabilona.+ Ibeʼe gama-gama daʼö khö Zesibasa*+ nifataro Giro tobali gubernur.+
15 Imane khönia Kiro, ”Ohe gama-gama daʼa nibeʼe dania ba gosali si so ba Yeruzalema, ba akha lafazökhi nomo Lowalangi ba nahania si oföna.+
16 Aefa daʼö, tohare Sesibasa ba wamazökhi fondrasi nomo Lowalangi+ si so ba Yeruzalema. Iʼotarai daʼö, labörögö wamazökhi omo andre irugi iadaʼa ba lö sawai nasa.’+
17 ”Na fao dödöu, fatenge zamareso ba naha wangiröʼö harato ba gödo razo Mbabilona ba wotatugöi hadia no irai ibeʼe fareta Razo Kiro enaʼö lafazökhi mangawuli nomo Lowalangi ba Yeruzalema.+ Aefa daʼö, faʼoheʼö khöma hadia gangetulamö sanandrösa ba daʼa.”
