Esera 7:1-28
7 Me no awai fefu daʼö, so samösa ndra matua sotöi Esera*+ ba götö wamatörö Aretazasa+ razo Weresia. Yaʼia andre ono Zeraya,+ ono Gasaria, ono Hilikia,+
2 ono Zalumi, ono Zadoki, ono Gahitobi,
3 ono Gamaria, ono Gasaria,+ ono Merayoto,
4 ono Zerahia, ono Usi, ono Mbuki,
5 ono Gabisua, ono Wineha,+ ono Geleazari,+ ono gafalo Gere Aʼaroni.+
6 Tohare Gesera moroi ba Mbabilona. Yaʼia andre sonekhe manura Oroisa Moze+ nibeʼe Yehowa Lowalangi Gizaraʼeli. Ibeʼe fefu niʼandrönia razo börö me itolo ia tanga Yehowa Lowalanginia.
7 So ösa ndraono Gizaraʼeli, ere, niha Lewi,+ sanunö,+ sanaro bawa göli+ hegöi enoni ba gosali*+ si möi ba Yeruzalema me no mamatörö Razo Aretazasa ba zi fitu fakhe faʼara.
8 Ofeta Gesera ba Yeruzalema me baŵa si lima ba ndröfi si fitu wamatörö Razo andrö.
9 Ba ngaluo siföföna ba mbaŵa si oföna, mofanö ia moroi ba Mbabilona, irugi Yeruzalema ba ngaluo siföföna ba mbaŵa si lima. Sagötö fofanönia, itolo ia tanga Lowalanginia.+
10 No ifaʼanö dödönia* Esera ba wamahaʼö yaʼia ba Goroisa Yehowa, aefa daʼö ifalua.+ Ifahaʼö göi gamakhoita hegöi huku andrö ba ndraono Gizaraʼeli.+
11 Daʼa nösi zura nibeʼe Razo Aretazasa khö Gesera, ere hegöi sonekhe manura andrö satua-tua ba goroisa Yehowa hegöi amakhoitania ba Gizaraʼeli:
12 * ”Moroi khö Aretazasa,+ razo yawa razo, nibeʼe khö Gesera sonekhe manura Oroisa Lowalangi samatörö sorugo: Yafahöna khöu waʼowua-wua dödö.
13 No ufaretakö fefu ndraono Gizaraʼeli, ere hegöi niha Lewi si toröi ba mbanua nifatörögu ba somasi fao khöu weʼamöi ba Yeruzalema.+
14 Ifatenge ndraʼugö Razo hegöi si dafitu sameʼe mene-mene khönia weʼamöi ba Yeruzalema enaʼö ötatugöi wa no mufalua Goroisa Lowalangimö andrö si so ba dangau ba Yehuda hegöi ba Yeruzalema.
15 Halö dolo-tolo si no aoha gölö fameʼe moroi khö Razo hegöi khö ndra sameʼe mene-mene khönia, yaʼia daʼö firö ba anaʼa. Beʼe daʼö khö Lowalangi Gizaraʼeli si toröi ba Yeruzalema.
16 Ohe fefu wirö hegöi anaʼa nitemau moroi ba provinsi Mbabilona awö dolo-tolo si no aoha gölö fameʼe moroi ba nono mbanua hegöi ere, nibeʼe ba nomo Lowalangira si so ba Yeruzalema.+
17 Ogunaʼö fefu daʼö ba wowöli sawi si matua,+ biri-biri si matua,+ ono mbiri-biri+ awö zumange niʼa*+ ba sumange nibadu.+ Beʼe fefu daʼö ba naha wanunu sumange si so ba nomo Lowalangiu ba Yeruzalema.
18 ”Balazi ndraʼugö awö ndra talifusöu hezo miʼogunaʼö wirö hegöi anaʼa si töra, moloʼö somasi Lowalangimi.
19 Fefu gama-gama si no mubeʼe khöu sinangea öʼogunaʼö ba wangai halöwö ba nomo Lowalangiu, lö tola löʼö öʼohe daʼö föna Lowalangiu ba Yeruzalema.+
20 Na so danö böʼö soguna ba nomo Lowalangiu sinangea öbeʼe, halö manö gefe ba gödo razo.+
21 ”Yaʼodo Razo Aretazasa, no ubeʼe fareta khö ndra sololohe kefe ba mbanua Yefo Nungo Nidanö, gofu hadia ia niʼandrö gere sotöi Esera+ sonekhe manura Oroisa Lowalangi samatörö sorugo, hasambalö mubeʼe,
22 irugi 3,42 ton* wirö, 17.000 kilogram* gandru, 2.200 liter* nagu,+ 2.200 liter wanikha,+ ba asio+ gofu hawaʼoya muʼogunaʼö.
23 Fefu goroisa moroi khö Lowalangi samatörö sorugo+ sanandrösa ba nomonia hasambalö mufalua si fao faʼowölö-ölö, enaʼö lö mofönu Lowalangi ba niha si so ba mbanua nifatörö razo hegöi ba ndraononia.+
24 Ubeʼe göi fareta khömi enaʼö lö lahalö pajak ero samösa, beʼelö,+ mazui pajak lala moroi ba niha Lewi, ere, samoli fakake zinunö,+ sanaro bawandruhö, enoni ba gosali*+ hegöi sohalöwö ba nomo Lowalangi.
25 ”Ba yaʼugö Esera, ogunaʼö waʼatua-tua moroi khö Lowalangi ba wamataro niha sohalöwö ba gödo zanguhuku hegöi sangetuʼö huku, enaʼö tola laʼetuʼö huku ba mbanua Yefo Nungo Nidanö. Yaʼira andre niha sangila oroisa Lowalangi. Moguna mifahaʼö dozi niha enaʼö tola laʼila.+
26 Dozi niha si lö moloʼö Oroisa Lowalangimö hegöi oroisa Razo, laʼetuʼö huku famunu khönia mazui lafofanö ia, mazui lafoʼömö ia, mazui lafakuruʼö ia.”
27 Tesuno Yehowa Lowalangi ndra tuama si no mamarou tödö razo enaʼö itugu sökhi nomo Yehowa si so ba Yeruzalema!+
28 No iforomaʼö waʼomasi si lö faröi khögu föna Razo,+ föna ndra sameʼe mene-mene+ hegöi ira sondröniaʼö. Andrö wa barani ndraʼo* börö danga Yehowa Lowalangigu si fao khögu. Aefa daʼö, ufarou dödö ndra sondröniaʼö ba Gizaraʼeli enaʼö fao ira khögu.
Nisura ba gahe zura
^ Eluahania ”Fanolo”.
^ Mazui ”niha Netini”. Sin.: ”niha nibeʼe”.
^ Mazui ”No ihalö gangetula ba dödönia”.
^ Esr 7:12 irugi 7:26 si oföna sibai tesura ba li Garamo.
^ Mazui ”zumange bua nowi”.
^ Mazui ”niha Netini”. Sin.: ”niha nibeʼe”.
^ Mazui ”wa abeʼe dödögu”.
