Esera 9:1-15
9 Ba me no awai daʼö fefu, laʼondrasi ndraʼo ira sondröniaʼö ba lamane khögu, ”Lö lafasafi ira iraono Gizaraʼeli, ere hegöi niha Lewi moroi ba soi ba zi fasuira hegöi si toʼölö lafalua+ ira niha Ganaʼana, Kheti, Feresi, Yebusi, Amoni, Moabi, Miserai+ ba Amori.+
2 Mangowalu ira khö ndraono alawe ba soi andrö ba lafangowalu göi nonora matua ba daʼö.+ No faruka soi niʼamoniʼö andrö+ ba soi böʼö.+ Ira sondröniaʼö hegöi salahi ndra samatörö zi oföna mamalua horö andre.”
3 Me urongo daʼö usika nukhagu hegöi barugu sanau si lö taʼio, aefa daʼö udöni mbu högögu awö gambigu, ba modadao ndraʼo lö hede-hedegu börö waʼatokeagu.
4 Aefa daʼö, owulo niha sangataʼufi fehede Lowalangi ndraono Gizaraʼeli, ba laʼondrasi ndraʼo börö gamuata niha si faröi sangawuli moroi ba nahia wangoloiʼö andrö. Modadao ndraʼo lö hede-hedegu irege alua ginötö wameʼe sumange niʼa* ba zi bongi.+
5 Me irugi inötö wameʼe sumange niʼa ba zi bongi,+ me no uʼide-ideʼö ndraʼo simane daʼö ba me no usika nukhagu, mozizio ndraʼo, aefa daʼö utuhi danö ba ufazawa dangagu khö Lowalangigu Yehowa.
6 Umane, ”He Lowalangigu, aila sibai ndraʼo, tenga sinangea uʼondrasi ndraʼugö ba wangandrö, börö me ebua golalöwama irege alawa ia moroi ba högöma, ba no ebua sibai horö nifaluama irugi mbanua si yawa.+
7 Iʼotarai ndra tuama irugi maʼökhö, ba no ebua sibai horöma.+ Börö lalöma andrö wa tebeʼe ndraʼaga ba danga soi böʼö, yaʼaga, razoma hegöi ira ere. Mate ndraʼaga ba mbawa wöda,+ laʼoloiʼö,+ larabu+ ba laʼoʼaya irugi maʼökhö.+
8 Hizaʼi, ha ba zi lö arara, falukha ndraʼaga waʼahakhö dödö Yehowa Lowalangima, ba so ösa zi no teʼefaʼö ba öbeʼe ndraʼaga ba zahono dödö ba nahia niʼamoniʼö+ enaʼö mohaga höröma, he yaʼugö Lowalangima, ba enaʼö öbeʼe khöma maʼifu waʼahono dödö moroi ba wangosawuyu andre.
9 Hewaʼae tobaliga sawuyu,+ ba lö si faröi ndraʼugö khöma sagötö teʼosawuyu ndraʼaga. Öforomaʼö khöma waʼomasimö si lö faröi föna razo-razo Weresia+ ba wangefaʼö yaʼaga enaʼö tola mafuli mafazökhi nomomö si no adudu,+ ba enaʼö ölumöʼö ndraʼaga* ba mbanua Yehuda hegöi ba Yeruzalema.
10 ”Iadaʼa, hadia zinangea mawaʼö khöu yaʼugö Lowalangima me no alua daʼö fefu? No maböhöli wamalua oroisamö,
11 si no öfaʼema khö ndra enonimö, ira samaʼeleʼö khöu. Ömane, ’Tanö andrö nirugimi dania ba wangokhögö yaʼia, no tobali tanö si raʼiö börö waʼaraʼiö gamuata niha si so ba daʼö. Iʼotarai mbalö faföfö, no afönu si raʼiö soi daʼö börö gamuatara si raʼiö.+
12 Andrö, böi mifangowalu nonomi alawe khö ndraonora matua, ba böi mihalö umönömi nonora alawe.+ Böi mitolo ira ba wanöndra faʼatulö ba faʼohahau dödö.+ Na mifalua daʼö, abölö ami ba miʼa mbua si sökhi ba danö andrö ba mibeʼe ba ngaʼötömi irugi zi lö aetu.’
13 Iadaʼa, no marasoi lua-lua zala ba horö si no mafalua, ba aboto ba dödöma wa lö öhuku ndraʼaga moloʼö horö si no mafalua,+ ba yaʼugö Lowalangima no ötehegö khöma enaʼö teʼefaʼö ndraʼaga.+
14 Hadia mafuli masawö goroisamö ba falulu fohalöwö ndraʼaga ba niha samalua amuata si raʼiö, yaʼia me mongambatö ndraʼaga khöra?+ Ba hadia lö abölö-bölö wönumö ba öhori ndraʼaga irege lö si tosai ba lö sauri saʼae?
15 He Yehowa, Lowalangi Gizaraʼeli, no satulö ndraʼugö,+ börö ndraʼugö wa teʼorifi ndraʼaga irugi maʼökhö tobali niha si tosai. Iadaʼa, maʼondrasi ndraʼugö me no mafalua zala börö me lö hadöi ba gotaluama sinangea mangondrasi yaʼugö.”+
