Esitera 1:1-22
1 Alua waö-waö daʼa me götö Ahasiwero,* yaʼia daʼö Ahasiwero samatörö ba zi 127 provinsi+ iʼotarai India irugi Gaitiofia.*
2 Me luo daʼö, modadao Razo Ahasiwero ba dadaoma waʼarazo si so ba Gödo Zusa.+
3 Me no irugi tölu fakhe mamatörö ia, ilau gowasa sebua khö ndra sondröniaʼö awö genoninia. Fefu zaradadu Weresia+ ba Media,+ tuhenöri awö zondröniaʼö ba provinsi, möi ira ba gowasa daʼö.
4 Iforomaʼö fefu waʼakayo ba wamatörönia sebua awö lakhöminia sahöli-höli dödö ba zi 180 hari.
5 Me no awai fefu daʼö, ifalua zui gowasa* ba golayamania si sökhi fitu hari waʼara, ikaoni fefu niha si so ba Zusa, he sebua faka hegöi niha mbanua.
6 Lahaogö nahia daʼö, lafasa lembe si sökhi safusi, sobalau awö lembe tanö böʼö niböbö faoma sinali moroi ba nukha si sökhi hegöi nukha nifazökhi moroi ba gafasi si ungu laʼa-laʼa.* Latawigö lembe daʼa ba dawi-tawi firö nifakhai ba gehomo mara-mara. So göi gurusi saganau nifazökhi moroi ba ganaʼa hegöi firö nifedadao ba zalo kara forofiria,* mutiara, mara-mara safusi ba saitö.
7 No labeʼe nagu ba mako anaʼa si faböʼö-böʼö. Oya sibai nagu nihöna ba gödo razo andrö moloʼö faʼakayonia.
8 Lö hadöi mutatugöi ba niha hawaʼoya zi tola labadu. No ihonogöi daʼa Razo si fao ira sohalöwö ba gödo razo, wa tola lafalua manö zomasi-masi dödöra gofu haniha zangondrasi.
9 Ifalua göi gowasa Ratu Wasi+ ba gödo Razo Ahasiwero khö ndra alawe si so ba daʼö.
10 Ba ngaluo si fitu, me omuso sibai dödö Razo ba wamadu agu, ifaretakö Mehuma, Bisita, Harabona,+ Bigita, Abagata, Setara hegöi Kharaka, yaʼia daʼö si dafitu sondröniaʼö ba gödo razo sangai halöwö khönia yomo,
11 ba wolohe Ratu Wasi föna Razo, ifake dakula waʼarazo. Börö me no baga-baga sibai Ratu, andrö wa omasi Razo iforomaʼö waʼabaga-baga Ratunia föna niha mbanua hegöi khö ndra sondröniaʼö.
12 Me lafaʼema goroisa Razo andrö ira sondröniaʼö, tenga ha sakali itimbagö Ratu Wasi weʼamöi. Börö daʼö, abao sibai dödö Razo ba mofönu ia.
13 Fahuhuo Razo khö ndra niha sagatua-tua sangila si toʼölö mufalua ba zilalö. (Na so hadia ia khö Razo, hasambalö iʼandrö mbua gera-era zogonekhe ba huku ba sangai angetula huku,
14 ba sabölö ahatö khö Razo yaʼia daʼö Kharesena, Seatara, Adamata, Tarisi, Meresi, Maresena, ba Memukha. Dafitu ira zondröniaʼö+ ba Weresia hegöi Media, si dadao ba dadaoma salawa ba wamatörö, ba tola laʼondrasi Razo.)
15 Manofu Razo, ”Moloʼö huku, hadia zinangea mufalua khö Ratu Wasi börö me lö iʼoʼö fareta Razo Ahasiwero nifaʼema ndra sondröniaʼö ba gödo razo?”
16 Imane Memukha khö Razo hegöi khö ndra sondröniaʼö, ”Tenga ha khömö fasala Ratu Wasi,+ hizaʼi khö ndra sondröniaʼö ba fefu nono mbanua si toröi ba provinsi nifatörö Razo Ahasiwero.
17 Ahori dania larongo nifalua Ratu andre foʼomo ira alawe. Lua-luania, laʼaohasi ba dödö woʼomora ba lamane, ’Ratu Wasi manö lö möi ia me ikaoni ia Razo Ahasiwero.’
18 Maʼökhö daʼa, ato ba gotalua woʼomo ndra sondröniaʼö niha Weresia hegöi Media sangila nifalua Ratu, ba lagoʼö-goʼö daʼö dania na fahuhuo ira khö woʼomora ira matua. Tobali fangaila daʼa ba möi börö waʼudusa.
19 Na lö fatimba khöu, halö gangetula ba sura daʼö ba huku Weresia hegöi Media faböi mufawuʼa ia,+ wa tebai saʼae möi Wasi ba wangondrasi Razo Ahasiwero. Heta khönia dadaoma waʼaratu ba beʼe khö ndra alawe tanö böʼö sabölö sökhi moroi khönia.
20 Na terongo fefu gangetula daʼa ba zi sagörö famatörömö, fefu woʼomo ira alawe oi zara lafosumange woʼomora, hewaʼae na sebua faka woʼomonia andrö mazui tenga.”
21 Fao dödö Razo hegöi ira sondröniaʼö ba mbua gera-era nibeʼe Memukha.
22 Börö daʼö, ifaʼoheʼö zurania Razo ba zi sagörö provinsi+ nifatörönia enaʼö fefu woʼomo ira matua, daʼö zi tobali högö* yomo ba nomo ba laʼogunaʼö li si so ba soira. Ero sambua provinsi, latema zura andrö moloʼö hurufo niʼogunaʼöra, ba ero sambua soi latema ba li niʼogunaʼöra samösa.
Nisura ba gahe zura
^ Te Xerxes I, ono Dario Sebua (Dario Histaspis).
^ Mazui ”Gusi”.
^ Tola daʼa geluahania owasa nitutunö ba ayati 3.
^ Mazui ”sobowo doru”.
^ Kara sabeʼe daʼa, si toʼölönia oyo laʼa-laʼa ba faruka zafusi, ba ebua sibai mböli.
^ Mazui ”sondröniaʼö”.
