Esitera 4:1-17
4 Me iʼila Morodokhai+ hadia zalua,+ isika nukhania, iʼonukha goni ba ilau nawu ba högönia. Aefa daʼö, möi ia ba golayama mbanua ba muʼao-ao ia si fao faʼabu dödö.
2 Ha ba mbawa göli gödo razo irugi, börö me tebai möi bakha niha samake nukha goni.
3 Abu sibai dödö niha Yahudi si so misa ba provinsi+ me no latema gangetula hegöi fareta Razo. Fuasö ira,+ mege-ege ba mangenu-ngenu. Ato zi mörö ba dete goni hegöi ba nawu.+
4 Me tohare ndraono alawe sangai halöwö khönia hegöi kafalo sozago ba nomo ndra alawe ba wamatunö khö Gesitera hadia zalua, abu sibai dödönia. Andrö, ifaʼoheʼö nukha si tola ifake Morodokhai faböi iʼonukha goni, hizaʼi lö omasi Morodokhai.
5 Mohede Gesitera khö Hatakha, samösa ba gotalua gafalo sozago ba nomo ndra alawe, nifataro ba wangai halöwö khö Gesitera. Ifatenge ia Esitera ba wanofu khö Morodokhai hadia geluaha daʼa fefu ba hadia zalua.
6 Ba möi Hatakha wamalukhaisi Morodokhai ba golayama mbanua, föna mbawa göli gödo razo.
7 Ifatunö khönia Morodokhai hadia zalua awö waʼebua gefe+ si no izazi Hamano nibeʼenia ba naha girö-girö khö Razo enaʼö tola tehori niha Yahudi.+
8 Ibeʼe göi sagörö zura sanandrösa ba wamunu si no laʼetuʼö ba Gödo Zusa.+ Iʼandrö khö Hatakha enaʼö iforomaʼö zura daʼö khö Gesitera, itutunö ba ifatenge Gesitera+ wangondrasi Razo ba wangandrö faʼahakhö dödö enaʼö teʼorifi soinia.
9 Aefa daʼö, mangawuli Hatakha wamatunö khö Gesitera hadia niwaʼö Morodokhai.
10 Ifuli zui ifatenge Hatakha ba wangombakha khö Morodokhai,+
11 ”No ahori aboto ba dödö genoni Razo hegöi niha mbanua misa ba provinsi wa ha sambua huku nifalua khö ndra matua mazui khö ndra alawe gofu haniha ia zi möi bakha ba golayama gödo razo+ na lö mukaoni, yaʼia daʼö huku famunu. Tola teʼorifi ia na iʼoroʼö ziʼonia anaʼa Razo ba niha daʼö.+ Hizaʼi, no 30 hari lö nikaoni Razo ndraʼo.”
12 Me no aefa itema goroisa Gesitera,
13 imane Morodokhai, ”Hewaʼae no farahu ndraʼugö ba nösi nomo razo, böi waʼö tödöu wa tola teʼefaʼö ndraʼugö moroi ba niha Yahudi tanö böʼö.
14 Na ölau zi lö hede-hede iadaʼa, lasöndra wangefa ba fangorifi ira niha Yahudi moroi ba danö böʼö.+ Hizaʼi, mate ndraʼugö hegöi si sambua ösi nomo namau. Ma daʼa mbörö wa tefili ndraʼugö tobali ratu.”+
15 Imane Esitera,
16 ”Owuloi fefu niha Yahudi si so ba Zusa enaʼö fuasö ira börö ndraʼo.+ Böi milau manga mazui mamadu idanö bongi maʼökhö sagötö zi tölu hari.+ Yaʼo hegöi ira alawe sangai halöwö khögu, mafalua wuasö. Möido ufalukhaisi dania Razo hewaʼae na tebai daʼö moloʼö huku. Na mate ndraʼo ba hana na mate.”
17 Börö daʼö, mofanö Morodokhai ba ifalua fefu niwaʼö Gesitera.
