Esitera 5:1-14
5 Ba ngaluo si tölu,+ ifake Esitera nukha waʼaratu ba möi ia bakha ba golayama, ba zi tambai gödo razo. No modadao Razo ba dadaomania sangotahögö bawandruhö.
2 Omuso dödö Razo me iʼila no mosindro Gesitera ba golayama. Iʼoroʼö khö Gesitera ziʼonia anaʼa,+ ihatöʼö ia Esitera ba ibabaya mbalö ziʼo andrö.
3 Manofu Razo, ”Hana wa möiʼö ba daʼa Ratu Esitera? Hadia niʼandrömö? Hewaʼae öʼandrö matonga moroi ba wamatörögu, hasambalö ubeʼe khöu!”
4 Imane Esitera, ”Na fao dödöu Razo, aeʼe maʼökhö ba gowasa nifaʼanögu khöu, ohe awöu Hamano.”+
5 Ibeʼe fareta Razo, ”Waʼö khö Hamano enaʼö iʼaliokö weʼamöi ba daʼa simane niʼandrö Gesitera.” Ba möi Razo hegöi Hamano ba gowasa nifalua Gesitera.
6 Me labadu nagu, manofu Razo khö Gesitera, ”Hadia zomasiʼö? Hasambalö ubeʼe khöu. Hadia niʼandrömö? Hewaʼae öʼandrö matonga moroi ba wamatörögu, hasambalö ubeʼe khöu!”+
7 Imane Esitera, ”Daʼa zomasi ndraʼo hegöi angandröwagu,
8 na ebua dödöu khögu, ba na omasiʼö öfalua zomasi ndraʼo ba öfondrondrongo gangandröwagu, aeʼe mahemolu ba gowasa nifaʼanögu khömi, ohe awöu Hamano, ba daʼö dania ufatunö gangandröwagu.”
9 Omuso sibai dödö Hamano ba lö noro dödönia me mangawuli ia. Hizaʼi, me iʼila lö mosindro Morodokhai ba zinga mbawa göli gödo razo ba lö khönia faʼataʼu me itörö Hamano, mofönu sibai ia.+
10 Itaha dödönia Hamano ba mangawuli ia ba nomo. Aefa daʼö, ikaoni ndra awönia hegöi foʼomonia sotöi Seresi.+
11 Ihöni waʼebua gokhötania Hamano, faʼato ndraononia matua+ hegöi me idouʼö fakania Razo ba me tebeʼe khönia dadaoma sebua ba gotalua ndra sondröniaʼö tanö böʼö awö genoni Razo.+
12 Imane nasa Hamano, ”Baero daʼö, ha yaʼo faoma Razo nikaoni Ratu Esitera weʼamöi ba gowasa khönia.+ Ba mahemolu, ha yaʼo zui nikaoni awö Razo.+
13 Hizaʼi, lö ahono dödögu na uʼila Morodokhai niha Yahudi andrö na modadao ia nasa ba zinga mbawa göli gödo razo.”
14 Andrö, imane Seresi hegöi ira awönia, ”Fazökhi gatunga, mato 22 meter* waʼalawa. Mahemolu sihulö wongi, waʼö khö Razo wa lö tola löʼö latawi mbagi Morodokhai ba gatunga andrö.+ Aefa daʼö, mifao Razo weʼamöi ba gowasa ba miʼomusoiʼö dödömi.” Fao dödö Hamano ba niwaʼöra, ba ifaretakö niha enaʼö lafazökhi gatunga andrö.
