Esitera 8:1-17
8 Maʼökhö daʼö, ibeʼe Razo Ahasiwero khö Ratu Esitera fefu gokhöta Hamano,+ udu niha Yahudi andrö.+ Aefa daʼö, tohare Morodokhai iʼondrasi Razo, börö me no iʼombakhaʼö Esitera wa talifusönia Morodokhai andrö.+
2 Iheta laedurunia Razo,+ laeduru si so tandro nihalönia moroi khö Hamano ba ibeʼe khö Morodokhai. Ifataro göi Morodokhai andrö Esitera ba wamaigi-maigi okhöta Hamano.+
3 Aefa daʼö, ifuli fahuhuo Gesitera khö Razo. Ituhi danö föna Razo si fao feʼe, iʼandrö waʼahakhö dödö Razo enaʼö lö alua waʼalösökhi niʼera-era Hamano niha Agagi andrö khö ndra niha Yahudi.+
4 Iʼoroʼö ziʼonia anaʼa Razo khö Gesitera,+ ba mosindro Gesitera föna Razo.
5 Imane, ”Na fao dödöu ba na ebua dödöu khögu, na sökhi daʼa ba wamaigiu, na ahakhö dödöu ndraʼo, fazökhi zura, oroiʼö enaʼö mangawuli zura nifaʼoheʼö Hamano+ andrö, ono Hamedata niha Agagi,+ ba wangohori niha Yahudi misa ba provinsi nifatörö Razo.
6 Hewisa wa tola utaögö wamaigi famakao salua ba soigu, ba hewisa wa tola utaögö wamaigi fangohori salua khö ndra talifusögu?”
7 Imane Razo Ahasiwero khö Gesitera hegöi khö Morodokhai, niha Yahudi andrö, ”No ubeʼe fefu khö Gesitera+ gokhöta Hamano, no göi ufabunuʼö Hamano ba gatunga+ börö me iʼera-era wamunu niha Yahudi.
8 Iadaʼa, tola ösura gofu hadia ia ba döigu soguna ba niha Yahudi, gofu hadia ia zi sökhi ba wamaigimö, ba fotandro daʼö faoma laeduru si so tandro khö Razo, börö me tebai mufawuʼa gangetula nisura ba döi Razo hegöi si no mufotandro faoma laeduru andrö.”+
9 Ba ngaluo si 23 ba mbaŵa si 3, yaʼia daʼö baŵa Siwana,* lakaoni fefu sekretaris Razo. Lasura goroisa Morodokhai nifaʼema khö ndra niha Yahudi hegöi khö ndra samatörö ba zi sambua provinsi,+ ira gubernur, awö zondröniaʼö ba provinsi+ iʼotarai India irugi Gaitiofia, so 127 provinsi. Ero sambua provinsi, latema zura andrö moloʼö hurufo niʼogunaʼöra, ero sambua soi latema ba li niʼogunaʼöra samösa, ba latema zura andrö ira niha Yahudi ba li hegöi hurufo niʼogunaʼöra.
10 Isura daʼö ba döi Razo Ahasiwero ba lafotandro faoma laeduru nifotandro khö Razo.+ Lafaʼoheʼö zura andrö khö ndra tenge-tenge sangogunaʼö kudo sagabölö khö Razo.
11 Ba zura andrö, itehegö Razo ba niha Yahudi si so ba mbanua misa enaʼö owulo ira ba wolumöʼö faʼaurira. Tola lahori, labunu, ba lafakiko zaradadu mazui soi awö provinsi sanuwö yaʼira, simanö göi ndra alawe hegöi iraono, itehegö khöra ba worabu okhöta ndra niha daʼö.+
12 Teʼombakhaʼö fareta daʼa ba provinsi nifatörö Razo Ahasiwero ba ngaluo si 13 ba mbaŵa si 12, yaʼia daʼö baŵa Adara.*+
13 No lahonogöi zura daʼö tobali huku misa ba provinsi. Lö tola löʼö muʼombakhaʼö daʼö ba soi fefu, enaʼö tefaʼanö niha Yahudi ba wanulöni nifalua nudu ba luo daʼö.+
14 Iʼanemaiʼö mofanö denge-tenge si fakudo andrö börö fareta Razo. Lahonogöi huku andrö ba Gödo Zusa.+
15 Ba mofanö Morodokhai iröi Razo. No ifake nukha waʼarazo nifazökhi moroi ba nukha sobalau ba safusi, takula anaʼa sebua hegöi baru sebua si sökhi sibai si ungu laʼa-laʼa.*+ Omuso dödö niha si toröi ba mbanua Zusa.
16 Ahono dödö niha Yahudi. Falukha ira waʼohahau dödö ba faʼomuso dödö, ba lafosumange ira.
17 Dozi niha Yahudi si toröi ba provinsi misa hegöi ba mbanua sebua, ohahau dödöra ba omuso dödöra me no latema huku hegöi angetula nifakhoi Razo. Ato niha böʼö zataʼu khö ndra niha Yahudi,+ andrö labaliʼö ira niha Yahudi.