Esitera 9:1-32
9 Ba ngaluo si 13 ba mbaŵa si 12, yaʼia daʼö baŵa Adara,*+ me laʼoʼö wehede hegöi huku Razo,+ latötöna udu niha Yahudi wa möna ira, hizaʼi faböʼö zalua. Ira niha Yahudi zokalaisi niha si fatiu tödö khöra.+
2 Owulo niha Yahudi ba mbanuara, ba provinsi nifatörö Razo Ahasiwero+ ba wamunu fefu sedöna mamaʼala yaʼira. Lö hadöi si tola molawa yaʼira börö me ataʼu fefu soi khöra.+
3 Laʼoʼawögö niha Yahudi ira sondröniaʼö, ira samatörö ba zi sambua provinsi,+ gubernur hegöi samaigi-maigi halöwö Razo, börö waʼataʼura Morodokhai.
4 No tebeʼe kuaso khö Morodokhai+ ba gödo razo, tehöngö ia misa ba provinsi börö me itugu ebua kuasonia.
5 Lasuwö nudura ira niha Yahudi faoma föda, labunu, ba lahori. Lafalua zomasi dödöra ba niha si fatiu tödö khöra.+
6 Ba Gödo Zusa,+ so 500 ndra matua nibunu niha Yahudi.
7 Labunu göi Farasandrata, Dalafono, Asafata,
8 Forata, Adalia, Aridata,
9 Faramasa, Arisai, Aridaʼi hegöi Wayesata,
10 yaʼia daʼö iraono matua si dafulu khö Hamano ono Hamedata, udu niha Yahudi.+ Hizaʼi, lö nihalö niha Yahudi gokhötara me no aefa labunu ira.+
11 Maʼökhö daʼö, laʼombakhaʼö khö Razo hawaʼato nibunu ba Gödo Zusa.
12 Imane Razo khö Ratu Esitera, ”So 500 ndra matua nibunu niha Yahudi ba Gödo Zusa, simanö göi ndraono matua si dafulu khö Hamano, mendrua manö saʼae ba provinsi tanö böʼö ba wamatörögu andre.+ Hadia zomasiʼö iadaʼa? Hasambalö ubeʼe khöu. Hadia niʼandröu nasa? Hasambalö ubeʼe khöu.”
13 Imane Esitera, ”Na fao dödöu Razo,+ yalafalua mahemolu huku si no öfakhoi maʼökhö andre+ ira niha Yahudi si so ba Gödo Zusa. Baero daʼö, tawi mbagi nono Hamano si dafulu ba gatunga.”+
14 Ifaretakö niha Razo enaʼö lafalua daʼö. Lahonogöi huku ba Zusa ba latawi mbagi nono Hamano si dafulu.
15 Ba ngaluo si 14 ba mbaŵa Adara,+ ifuli owulo niha Yahudi si so ba Zusa ba labunu 300 ndra matua ba daʼö, hizaʼi lö lahalö gokhötara.
16 Owulo göi ndra niha Yahudi si so ba provinsi tanö böʼö ba wolumöʼö faʼaurira.+ Lahori fefu nudura.+ Labunu 75.000 zi fatiu tödö khöra, hizaʼi lö lahalö gokhötara.
17 Lafalua daʼö ba ngaluo si 13 ba mbaŵa Adara. Ba ngaluo si 14, laböhöli wasuwöta ba laʼowasaini ngaluo andrö si fao faʼomuso dödö.
18 Owulo niha Yahudi si so ba Zusa ba ngaluo si 13+ hegöi si 14,+ lalau fasuwö. Laböhöli wasuwöta ba ngaluo si 15 ba laʼowasaini ngaluo andrö si fao faʼomuso dödö.
19 Daʼö mbörö wa lahonogöi ngaluo si 14 ba mbaŵa Adara andrö ira niha Yahudi si so ba mbanua si gide-ide, tobali ngaluo waʼomuso dödö ba wamalua owasa,+ daʼa ngaluo si sökhi ba mamuala ira ba niha, ba faoma labeʼe gö nawöra.+
20 Isura fefu zalua andre Morodokhai+ ba ibeʼe zura ba niha Yahudi si so ba provinsi nifatörö Razo Ahasiwero, he sahatö hegöi sagaröu.
21 Ifaretakö ira enaʼö laʼowasaini ngaluo si 14 hegöi si 15 ba mbaŵa Adara, ero röfi,
22 börö me ba ngaluo daʼö laböhöli ira niha Yahudi wolawa udura, ba ngaluo daʼö göi tefaböʼöni waʼabu dödöra tobali faʼomuso dödö ba fangabu dödöra+ tobali ngaluo ba wamalua owasa. Lö tola löʼö laʼowasaini ngaluo andrö si fao faʼomuso dödö, ba daʼö ginötö wamaʼoheʼö gö ba mamuala ira ba niha si tosasa.
23 Fao dödö niha Yahudi ba wanohugö owasa si no lafalua andrö ba lafalua nisura Morodokhai khöra.
24 Börö me fatuwu sibai Hamano,+ ono Hamedata, niha Agagi+ khö ndra niha Yahudi, me lö sökhi gera-erania ba wangohori yaʼira+ ba ifaretakö niha ba wamazaumba Wuri+ yaʼia daʼö dahö-dahö, enaʼö ataʼu niha Yahudi ba lahori ira.
25 Hizaʼi, isura goroisania Razo me iʼondrasi ia Esitera,+ ”Yamangawuli khönia gera-erania si lö sökhi sedöna ifalua ba niha Yahudi andrö,”+ ba latawi mbaginia hegöi iraononia.+
26 Daʼö mbörö wa lafotöi ngaluo andrö Wurimi, nihalö moroi ba ngawua wehede Wuri.*+ Börö wehede Morodokhai andrö ba zura, ba börö me no laʼila gera-era Hamano si lö sökhi ba wolawa niha Yahudi hegöi salua khöra,
27 andrö wa lahalö gangetula ira niha Yahudi. Yaʼira hegöi ngaʼötöra awö zi fao khöra,+ tebai lataluʼi wangowasaini si dua ngaluo andrö ero röfi, ba lafalua fefu nisura Morodokhai sanandrösa ba ngaluo daʼö ero röfi ba ginötö si no muhonogöi.
28 Hasambalö laʼowasaini ngaluo andrö götö-götö waʼara dozi omo, dozi provinsi, ba dozi banua. Tebai muʼosiwawöi wamalua ngaluo Wurimi ba gotalua niha Yahudi, ba tebai laböhöli wamalua daʼö ba ngaʼötöra.
29 Aefa daʼö, Ratu Esitera ono Gabihailo, ba Morodokhai niha Yahudi andrö, lasura zura si mendrua sanandrösa ba Wurimi börö me no tebeʼe khöra kuaso ba wangaʼaroʼö sura si oföna.
30 Lafaʼoheʼö zura andrö ba niha Yahudi fefu ba zi 127 provinsi+ nifatörö Ahasiwero+ si fao fehede si sökhi ba si tola mufaduhusi tödö,
31 ba wangohonogöi fangowasaini ngaluo Wurimi ba ginötö si no mutatugöi, simane si no ifaretakö Morodokhai niha Yahudi andrö hegöi Ratu Esitera,+ ba simane si no latatugöi wa lö tola löʼö lafalua daʼö hegöi ngaʼötöra.+ Lafalua göi wuasö+ ba mangandrö ira.+
32 Fareta Gesitera andrö zangaʼaroʼö nihonogöi sanandrösa ba Wurimi,+ ba lasura daʼa ba zi sambua buku.
