Khö Wilemo 1:1-25
1 Moroi khö Waulo nikuru andrö+ börö Keriso Yesu ba moroi khö Dimoteo+ talifusöda, khö Wilemo awöma wohalöwö niʼomasiʼöma,
2 khö Gafia talifusöda ira alawe, khö Garikhifo+ awöma ba wasöndrata, ba banua niha Keriso samosumange Lowalangi ba nomomö:+
3 Yamitema waʼasökhi dödö sebua* ba faʼohahau dödö moroi khö Lowalangi, Amada, ba moroi khö Zoʼaya yaʼita Yesu Keriso.
4 Lö uböhöli wangandrö saohagölö khö Lowalangigu me utötöi ndraʼugö ba wangandrögu,+
5 börö me asese urongo wamati ba faʼomasimö khö Zoʼaya Yesu hegöi ba niha niʼamoniʼö fefu.
6 Mangandrö ndraʼo enaʼö ibeʼe khömi waʼaboto ba dödö famati niʼokhögömi andrö börö waʼoya zi sökhi si no tatema moroi khö Keriso.
7 He talifusögu, urasoi waʼomuso dödö sebua ba terara dödögu me urongo waʼomasimö, börö me öʼokafui dödö niha niʼamoniʼö.
8 Hewaʼae tola manö uʼandrö khöu wamalua sinangea börö me sinenge Keriso ndraʼo, hizaʼi
9 abölö omasido wangandrö khöu si fao faʼomasi, yaʼo sotöi Faulo, niha si no atua, ba iadaʼa ba gurunga so ndraʼo börö Keriso Yesu.
10 Uʼandrö khöu börö nonogu Onesimo,+ me hulö namania ndraʼo+ sagötö feʼasogu ba gurunga.*
11 Lö moguna ia khöu mböröta, hizaʼi moguna ia khöu hegöi khögu iadaʼa.
12 Ufatenge wondrege niʼomasiʼögu andrö enaʼö mangawuli ia khöu.
13 Sindruhunia, omasido utaha ia ba daʼa, enaʼö tola isalahini ndraʼugö ba wanolo yaʼo gasa-gasa weʼasogu ba gurunga börö duria somuso dödö andrö.+
14 Hizaʼi, lö omasido ufalua manö na lö fao dödöu enaʼö aoha gölöu wamalua si sökhi, ba tenga nifaso.+
15 Te daʼa mbörö wa fabali ia khöu ba zi sabata,* enaʼö tola mangawuli ia khöu sagötö faʼara,
16 tenga saʼae tobali sawuyumö,+ hizaʼi töra moroi khö zawuyu, yaʼia daʼö talifusö.+ Uʼomasiʼö sibai ia, ba abölö öʼomasiʼö ia nasa ba waʼaniha hegöi ba khö Zoʼaya.
17 Na öbaliʼö ndraʼo si fahuwu khöu, haogö wanemaʼö yaʼia simane fanemaʼöu yaʼo.
18 Baero daʼö, na no irai fasala ia mazui so gömönia khöu, akha yaʼo zamuʼa.
19 Yaʼo, Faulo, sanura daʼa faoma tangagu: Hasambalö ufuli ubuʼa. Lö moguna ufatunö khöu wa moʼömö faʼauri göi ndraʼugö khögu.
20 He talifusö, tolo ndraʼo ba daʼa börö me awögu ndraʼugö ba khö Zoʼaya. Okafui dödögu me si fao ita ba woloʼö Keriso.
21 Faduhu dödögu wa fao dödöu, andrö wa usura daʼa börö me uʼila wa abölö oya dania nifaluamö moroi ba niwaʼögu.
22 Baero daʼö, henaigö faʼanö nahia waʼatoröigu börö me utötöna teʼefaʼö* ndraʼo khöu börö wangandrömö.+
23 Iʼowai ndraʼugö Efafera+ awögu nikuru börö me ha sambua ndraʼaga ba khö Keriso Yesu,
24 simanö göi Mareko, Arisaro,+ Dema,+ hegöi Luka+ awögu wohalöwö andrö.
25 Yaʼötema waʼasökhi dödö sebua* moroi khö Zoʼaya yaʼita Yesu Keriso ba waʼowölö-ölö niforomaʼöu.
Nisura ba gahe zura
^ Faigi Geluaha Ngawua Wehede.
^ Sin.: ”sagötö so ba dangagu mbilagu”.
^ Sin.: ”ba zi sambua za”.
^ Mazui ”utötöna lafangawuli”.
^ Faigi Geluaha Ngawua Wehede.
