Ba Mbanua Niha Keriso ba Wilifi 2:1-30
2 Börö me faoma mifarou dödö nawömi ba woloʼö Keriso, mirara dödö nawömi börö waʼomasi, miʼameʼegö tödö, miʼomasiʼö ba faoma mihakhösi tödö nawömi,
2 miʼomusoiʼö dödögu ba miʼoromaʼö wa fagölö gera-erami hegöi faʼomasimi, sindruhu-ndruhu hasara dödömi ba ha sambua gohitö dödö.+
3 Böi mifaʼudu+ mazui miʼosebua.+ Si sökhinia miʼide-ideʼö ami, enaʼö alawa niha böʼö miwaʼö tödömi,+
4 ba miʼangeragö zoguna ba niha böʼö,+ tenga ha soguna khömi manö.+
5 Miʼokhögö wangera-ngera ba amuata daʼa ba waʼaurimi, simane niʼokhögö Keriso Yesu.+
6 Hewaʼae hulö simane Lowalangi ia,+ hizaʼi lö irai so ba wangera-ngerania ba lö itandraigö ifagölösi ia khö Lowalangi.+
7 Löʼö. Iröi dadaomania hegöi niʼokhögönia, ifagölösi ia simane sawuyu,+ ba tobali ia niha.+
8 Me tobali ia niha, iʼide-ideʼö ia ba lö faröi irege mate.+ Sindruhu sa, mate ba döla geu famakao.*+
9 Daʼö mbörö wa ibeʼe khönia Lowalangi dadaoma sabölö alawa moroi ba zi oföna,+ ba iʼamualagö döi sabölö ebua moroi ba döi tanö böʼö,+
10 irege fefu zi so ba zorugo, ba gulidanö, hegöi barö danö, mangalulu ira ba döi Yesu,+
11 ba lafaduhuʼö fefu föna zato wa Yesu Keriso andrö Soʼaya+ ba wamolakhömi Amada Lowalangi.
12 Ira talifusö niʼomasiʼögu, simane foloʼömi me so ndraʼo, ba mendrua manö abölö miʼoʼö iadaʼa me lö yaʼo, miforege wangalui fangorifimi si fao faʼataʼu ba fanizi-nizi.
13 Lowalangi zamarou tödömi, ibeʼe khömi waʼedöna ba faʼabölö ba wamalua somasi ia.
14 Böi miböhöli wamalua fefu hadia ia, ba böi miʼokökö-kökö+ mazui fabuʼa-buʼa,+
15 enaʼö lö mosinegu ami ba atulö, tobali ono Lowalangi+ si lö raʼiö ba gotalua ngaʼötö niha si lö sökhi ba safaito,+ me yaʼami haga ba niha gulidanö,+
16 miʼaroʼö wololohe taromali fangorifi.+ Daʼö mbörö wa omuso dödögu ba ngaluo Keriso börö me uʼila wa tenga zaya-zaya gölö wagohisagu mazui faʼerege dödögu.
17 Hewaʼae tobali ndraʼo sumange nibadu nifaduwa+ ba naha zumange khömi,+ yaʼia daʼö halöwö niʼamoniʼö nifaluami börö wamati, omuso dödögu ba owua-wua dödögu wefao khömi.
18 Miʼomusoiʼö dödömi ba miʼowua-wuaʼö dödömi göi khögu.
19 Manötöna ndraʼo ba khö Zoʼaya Yesu ba wamatenge khömi Timoteo,+ enaʼö terou dödögu na urongo duriami.
20 Lö hadöi khögu niha böʼö simane yaʼia, soʼameʼegö tödö yaʼami soroi ba dödö.
21 Tanö böʼö oi ha tana khöra laʼera-era, tenga soguna khö Keriso Yesu.
22 Hizaʼi, no miʼila hewisa wamaduhuʼö ba faʼerege dödö Dimoteo me fao ndraʼaga wanuriaigö turia somuso dödö, simane ono+ khö namania.
23 Utötöna wa yaʼia nifatengegu, na no uʼila hewisa zalua khögu dania.
24 Faduhu dödögu khö Zoʼaya wa alio tohare ndraʼo.+
25 Hizaʼi, umane tödögu iadaʼa, moguna ufatenge khömi dalifusögu Efaforodito, awögu wohalöwö, awögu saradadu ba khö Keriso, si no irai mifatenge ba wanolo yaʼo ba zoguna khögu,+
26 börö me omasi sibai ia falukha khömi ba abu dödönia börö me no mirongo wa mofökhö ia.
27 Duhu wa mofökhö ia ba arakhagö mate, ba iʼoromaʼö waʼahakhö dödönia Lowalangi, tenga ha khönia hizaʼi khögu göi, enaʼö lö monönö waʼabu dödögu.
28 Andrö wa alio ufatenge ia khömi, enaʼö omuso dödömi na falukha ami khönia ba ahono göi dödögu.
29 Börö daʼö, mitemaʼö ia si fao faʼomuso dödö simane na mitemaʼö zoloʼö khö Zoʼaya, ba böi miböhöli wamosumange ira talifusö simane daʼö,+
30 börö me arakhagö mate ia wangai halöwö khö Keriso.* Itehegö waʼaurinia* ba wamönökhi soguna khögu, isalahini ami me lö yaʼami ba daʼa.+
