Ba Mbanua Niha Keriso ba Wilifi 4:1-23
4 Börö daʼö, yaʼami ira talifusö niʼomasiʼögu ba sedöna ufalukhaisi, umbu waʼomuso dödögu si no amaedola dakula,+ yaʼaro ami+ ba wangai halöwö Zoʼaya simane si no uwaʼö khömi.
2 Uʼandrö khö Gewodia ba Sitikhe enaʼö hasara dödöra ba wangai halöwö khö Zoʼaya.+
3 Börö me awögu wohalöwö si lö faröi ami, uʼandrö enaʼö böi miböhöli wanolo ira talifusöda alawe andrö si no fao khögu ba wamorege fanuriaigö turia somuso dödö, simanö göi Kelemeno ba awögu tanö böʼö si no tesura töi ba mbuku waʼauri.+
4 Böi mamalö-malö waʼomuso dödömi ba khö Zoʼaya. Sakali tö uwaʼö: Miʼomusoiʼö dödömi!+
5 Böi fatandro ami+ ba niha fefu. No ahatö Zoʼaya andrö.
6 Böi mibusi tödö hadia ia,+ mibokai khö Lowalangi ba wangandrö si fao fangalulu na so zabu dödömi ba ngawalö hadia ia, yafao wangandrö saohagölö,+
7 irorogö dödömi+ awö gera-erami faʼohahau dödö+ andrö khö Lowalangi, sabölö moroi ba gera-era niha fefu ba khö Keriso Yesu.
8 Fozunia ira talifusö, hadia zi duhu, hadia zabölö moguna, hadia zatulö, hadia zohau-hau, hadia zondrouʼö faʼomasi, hadia zinangea mufatunö, hadia mbua-bua si sökhi, hadia ia nisuno, daʼö mifatou-tou tödömi.*+
9 Böi miböhöli wamalua si no mifahaʼö yaʼami, si no mitema, si no mirongo, si no miʼila moroi khögu,+ enaʼö fao khömi Lowalangi waʼohahau dödö andrö.
10 Omuso dödögu ba khö Zoʼaya börö me itörö tödömi ndraʼo zui.+ Hewaʼae itörö tödömi ndraʼo mböröta, lö lalami wangoromaʼö faʼomasi.
11 Wa uwaʼö daʼa tenga börö me tosasa ndraʼo, börö me no ufahaʼö ndraʼo waʼahono dödö ba* zi no so gofu hadia ia zalua.+
12 No irai utörö waʼatosasa+ hegöi faʼafahöna. Gofu hadia zalua, he na abuso ndraʼo mazui olofo, fahöna mazui moʼamböta, uʼila hewisa enaʼö ahono dödögu ba zi no so.
13 Tola utaögö fefu hadia ia börö waʼabölö nitemagu moroi khö Lowalangi.+
14 Hewaʼae simanö, sökhi sibai gamuatami börö me mitolo ndraʼo sagötö alua khögu wamakao.
15 Yaʼami niha Wilifi, no aboto ba dödömi me awena mirongo duria somuso dödö, lö hadöi banua niha Keriso sanolo yaʼo hegöi sanemaʼö fanolo moroi khögu baero ami, me mofanö ndraʼo moroi ba Makedonia.+
16 Me so ndraʼo ba Desalonika, mifaʼoheʼö khögu wanolo, tenga ha sakali hizaʼi dua kali.
17 Tenga daʼa geluahania manötöna ndraʼo enaʼö so nibeʼemi khögu, omasido na monönö haremi börö gamuatami si sökhi.
18 Iadaʼa, no ahori so zoguna khögu, töra naʼi. Tebönökhi zoguna khögu me no utema nifaʼoheʼömi khö Gefaforodito,+ si no amaedola zumange somuhua+ somasi Lowalangi.
19 Börö waʼakayo Lowalangi solakhömi,+ iʼogunaʼö Keriso Yesu ba wameʼe soguna khömi.
20 Yatefolakhömi Lowalangi, Amada, irugi zi lö aetu. Yaduhu.
21 Mifaʼema wangowaigu ba niha niʼamoniʼö si hasara tödö ba khö Keriso Yesu. Laʼowai ami göi ira talifusö si fao khögu.
22 Laʼowai ami fefu niha niʼamoniʼö, mendrua manö zi so ba gödo Kaisaro.+
23 Yafao khömi waʼasökhi dödö sebua* moroi khö Zoʼaya yaʼita Yesu Keriso börö waʼowölö-ölö niforomaʼömi.
Nisura ba gahe zura
^ Mazui ”miʼangerönusi”.
^ Mazui ”wa tobönö khögu”.
^ Faigi Geluaha Ngawua Wehede.
