Ba Mbanua Niha Keriso ba Galatia 2:1-21
2 Me no 14 fakhe aefa daʼö möi ndraʼo ba Yeruzalema. Faoga Mbaranaba,+ ba uʼohe göi Dito.+
2 Wa möi ndraʼo ba daʼö börö me so nifaʼeleʼö Zoʼaya, ba uʼombakhaʼö khöra duria somuso dödö nituriaigögu ba soi böʼö. Hizaʼi, ufalua daʼö föna ndra talifusö nifosumange ba wotatugöi wa tenga zaya-zaya gölö halöwö nifaluagu me mböröta hegöi iadaʼa.
3 Sanandrösa khö Dito+ si fao khögu, lö hadöi samaso yaʼia enaʼö lasuna+ hewaʼae niha Yunani ia.
4 Hizaʼi, lafadunö-dunö daʼö ira talifusö faya samasoli yaʼira weʼamöi bakha ba gorahua+ tobali samauze, somasi mangila fangefa+ nitemada börö me ha sambua ita khö Keriso Yesu, enaʼö tola laʼosawuyu ita.+
5 Hewaʼae simanö, lö awuwu ndraʼaga mazui maʼoʼö niwaʼöra,+ maʼifu* löʼö, enaʼö lö tebulö miʼokhögö zindruhu andrö sanandrösa ba duria somuso dödö.
6 Sanandrösa khö ndra talifusö si so töi andrö,+ gofu haniha ira me mböröta, lö ba dödögu daʼö, börö me lö ifaigi mbawa niha Lowalangi. Lö hadöi göi usöndra zi bohou nifaʼemara.
7 Tobali, laʼila wa no lafaduhusi tödö khögu wamaʼema turia somuso dödö ba zi lö nisuna,+ simane Fetero nifaduhusi tödö ba wamaʼema turia somuso dödö ba zi no lasuna.
8 Lowalangi zameʼe khö Wetero faʼabölö enaʼö tobali ia sinenge ba niha nisuna. Simanö göi, ibeʼe khögu waʼabölö enaʼö tobali ndraʼo sinenge ba soi böʼö.+
9 Laʼila wa no iforomaʼö khögu waʼasökhi dödönia sebua* Lowalangi.+ Börö daʼö, Yakobo,+ Kefa,* ba Yohane, niha si tobali toga ba mbanua niha Keriso, faraʼu tanga ira khögu hegöi khö Mbaranaba,+ tandra wa fao dödöra na yaʼaga zi möi ba soi böʼö misa, ba yaʼira zi möi ba niha nisuna.
10 Ha daʼö niʼandröra khöma, enaʼö matörö-törö tödöma ndra talifusöda si numana ba uforege sibai wamalua daʼö.+
11 Me tohare Gefa*+ ba Gandriokhia,+ lö ubiniʼö wameʼe khönia tegu-tegu börö me sindruhu-ndruhu fasala ia.
12 Si toʼölönia, fao ia wemanga ba niha baero.+ Hizaʼi, me tohare niha nifatenge Yakobo,+ lö fariawö ia khöra saʼae. Ifandröndröu ia börö waʼataʼunia ba niha nisuna.+
13 Fao niha Yahudi tanö böʼö ba wamini tödö andrö, ba adöni göi dödö Mbaranaba.
14 Me uʼila lö saʼae tefaudu nifaluara moloʼö sindruhu ba duria somuso dödö,+ umane khö Gefa* föna niha sato, ”Na yaʼugö manö samösa niha Yahudi öfalua gamuata niha baero si lö toʼölö lafalua ira niha Yahudi, hana wa öfarou niha baero enaʼö laʼoʼö zi toʼölö ba niha Yahudi?”+
15 Yaʼita zindruhu niha Yahudi, tenga niha si so horö moroi ba niha baero.
16 Aboto ba dödöda wa atulö zi samösa niha na mamati ia+ khö Yesu Keriso,+ tenga börö woloʼönia oroisa. Andrö wa mamati ita khö Keriso Yesu, enaʼö tefaduhuʼö wa atulö ita börö wamati khö Keriso, tenga börö woloʼö oroisa. Samösa lö satulö ba woloʼö oroisa.+
17 Na labaliʼö ita sebua horö hewaʼae no taʼodödögö enaʼö atulö ita ba khö Keriso, hadia daʼö geluahania wa Keriso andrö sawuyu horö? Tatu tenga!
18 Na ufuli ufazökhi zi no ududugö, no uforomaʼö wa sanawö huku ndraʼo.
19 Si mate ndraʼo ba goroisa.+ Hizaʼi, börö goroisa wa sauri ndraʼo khö Lowalangi.
20 No laʼosö ndraʼo ba döla geu awö Keriso.+ Börö daʼö, tenga yaʼo zauri saʼae,+ hizaʼi Keriso zauri ba khögu. Ufaudugö waʼaurigu iadaʼa moloʼö famati khö Nono Lowalangi+ si no mangomasiʼö yaʼo ba sameʼe faʼaurinia ba khögu.+
21 Lö utimbagö waʼasökhi dödö sebua* moroi khö Lowalangi.+ Na atulö zi samösa niha börö woloʼönia oroisa, eluahania zaya-zaya gölö waʼamate Keriso.+
Nisura ba gahe zura
^ Sin.: ”sambua za”.
^ Faigi Geluaha Ngawua Wehede.
^ Töi böʼö khö Wetero.
^ Töi böʼö khö Wetero.
^ Töi böʼö khö Wetero.
^ Faigi Geluaha Ngawua Wehede.
