Ba Mbanua Niha Keriso ba Galatia 4:1-31
4 Sagötö wa iraono nasa zanema ondröita, lö faböʼö ia moroi khö zawuyu, hewaʼae na yaʼia zangokhögö fefu dania,
2 börö me so ia barö mbawa zondröniaʼö awö zondrorogö, irugi luo nihonogöi namania.
3 Simanö göi me iraono ita nasa, iʼosawuyu ita fangera-ngera niha hegöi lala waʼauri ba gulidanö andre.+
4 Hizaʼi, me no irugi luo nihonogöi andrö, ifatenge Nononia Lowalangi si tumbu moroi khö ndra alawe+ si so barö mbawa goroisa,+
5 enaʼö tola ihöli niha si so barö mbawa goroisa,+ irege tobali ita ono Lowalangi.+
6 Börö me ono Lowalangi ami, ifatenge geheha niʼamoniʼö+ ba dödömi+ si so khö Nononia, ba eheha andrö mbörö wa muʼao ita, ”He Abba,* Ama!”+
7 Börö me ono ami, tenga sawuyu saʼae, tobali ami sanema ondröita khö Lowalangi.+
8 Hewaʼae simanö, fatua lö saboto ba dödömi Lowalangi, iʼosawuyu ami lowalangi faya andrö.
9 Iadaʼa, me no aboto ba dödömi Lowalangi, mazui sabölö tefaudunia no aboto ba dödö Lowalangi ami, hana wa mifuli miʼoʼö lala wangera-ngera hegöi faʼauri si tobali zaya-zaya gölö+ ba si lö eluaha, ba omasi ami tobali sawuyura zui?+
10 No mihaogö miʼosisiʼö ba wangowasaini ngaluo, baŵa,+ inötö, awö ndröfi.
11 So so dödögu ami, alai na zaya-zaya gölö waʼerege dödögu khömi.
12 Uʼandrö khömi yaʼami ira talifusö, miʼoʼö ndraʼo, börö me simane yaʼami ndraʼodo mböröta.+ Lö horömi khögu.
13 Aboto ba dödömi wa börö wökhögu, andrö wa so ginötögu wanuriaigö turia somuso dödö khömi me awena falukha ita.
14 Hewaʼae tobali abula dödömi wökhögu, lö anuzu dödömi* ba lö miʼositengagö ndraʼo. No mitemaʼö ndraʼo simane malaʼika Lowalangi, hulö Keriso Yesu.
15 Hezo waʼomuso dödömi mböröta? Faduhu dödögu, na tola, mitehegö mikoe hörömi me luo daʼö ba mibeʼe khögu.+
16 Hadia mibaliʼö udumi ndraʼo iadaʼa me no uwaʼö khömi zindruhu?
17 Laforege wangai tödömi, lö sökhi gera-erara. Omasi ira na fabali ita enaʼö miʼoʼö ira.
18 Sindruhunia, lö salania na laforege wondrönisi yaʼami ba zi sökhi, ba tenga ha tefaudu so ndraʼo khömi.
19 Yaʼami iraonogu,+ sakali tö urasoi waʼafökhö simane nirasoi ndra alawe soʼono, irege tola miʼoʼö mbua-bua Keriso.
20 Utötöna enaʼö so ndraʼo ba gotaluami iadaʼa, uhaogö fahuhuo khömi börö me alangu dödögu ami.
21 Hadia omasi ami so barö mbawa goroisa, mifatunö khögu: Hadia lö aboto ba dödömi niwaʼö ba Goroisa Moze?
22 Duma-dumania, so ba zura wa darua nono matua khö Gaberahamo, samösa moroi khö zawuyunia ira alawe,+ ba samösa moroi khö ndra alawe si tenga sawuyu.+
23 Ono moroi khö zawuyunia ira alawe andrö, tumbu simane si toʼölö,+ ba ono moroi khö ndra alawe si tenga sawuyu, tumbu börö mbuʼusa li Lowalangi.+
24 Ha duma-duma daʼa, börö me ira alawe si darua andrö eluahania dombua mbuʼusa li. Buʼusa li nibeʼe ba Hili Zinaʼi+ yaʼia daʼö Hagara, ba fefu zi so barö mbuʼusa li daʼö tobali sawuyu.
25 Hagara eluahania Hili Zinaʼi+ si so ba mbanua Garabi, ba fagölö ia ba Yeruzalema iadaʼa, börö me tobali ia sawuyu hegöi ononia.
26 Hizaʼi, Yeruzalema si yawa andrö tenga sawuyu, ba yaʼia ninada.
27 So ba zura, ”Omusoiʼö dödöu yaʼugö ira alawe si lö irai moʼono; owua-wuaʼö dödöu yaʼugö ira alawe si lö morasoi faʼafökhö ba woʼono; börö me oya nono ndra alawe nitiboʼö moroi khö ndra alawe si no muhalö.”+
28 He ira talifusö, yaʼami ndraono si tumbu börö mbuʼusa li Lowalangi simane Izaʼaki.+
29 Me mböröta, ono si tumbu simane si toʼölö andrö moroi khö ndra alawe, ibörögö ifakao nono si tumbu moroi ba geheha+ irugi iadaʼa.+
30 Hewaʼae simanö, hadia niwaʼö ayati daʼö? ”Fofanö zawuyu ira alawe andrö hegöi ononia, börö me lö itema gondröita ono zawuyu andrö si fao ono si tumbu khö ndra alawe si tenga sawuyu.”+
31 Börö daʼö yaʼami ira talifusö, tenga ono zawuyu ira alawe andrö ita, hizaʼi ono ndra alawe si tenga sawuyu.