Habakuki 2:1-20
2 Lö tebulö mozizio ndraʼo ba naha wanaro,+Ba so ndraʼo ba dete göli mbanua.
Lö mörö ndraʼo enaʼö tola uʼila hadia niwaʼö Lowalangi khögu,Ba hadia wanema li nibeʼegu na lategu ndraʼo.
2 Aefa daʼö, imane khögu Yehowa,
”Sura gangilata andre, haogö wanura yaʼia ba gara wanura,*+Enaʼö aoha ba niha wombaso yaʼia si fao faʼebua li.+
3 Hasambalö alua gangilata daʼa ba ginötönia,Ba lö ara tö ginötönia;* tenga angilata faya daʼa.
Hewaʼae tetaha ia,* böi böhöli wanötöna yaʼia si fao faʼafaduhu dödö!*+
Börö me hasambalö alua daʼö.
Lö zi lö alua ba ginötö si no muhonogöi!
4 Faigi atö niha sasiliyawa;Lö khönia faʼadölö dödö.
Hizaʼi, lö tebulö auri niha samalua satulö börö waʼalöfaröinia.*+
5 Tebai mufaduhusi tödö niha sasiliyawa mendrua manö na no mabu ia.
Lö aʼozu gohitö dödönia.
Hulö simane faʼamate ia si lö irai mangokhögö faʼahono dödö,Ba hulö simane Lewatö* waʼoluʼa-luʼania.
Lö aetu iʼowuloi ngawalö soi
Simanö göi niha enaʼö tobali okhötania.+
6 Dozi niha lakata-kataʼö ia, lafatörö khönia li ba laʼoʼaya ia.+
Lamane,
’Hawaʼara iböhöli wangowuloiOkhöta si tenga khönia?
Alai ndraʼo ia börö me itugu ebua woʼömönia!
7 Ba zi lö mudöna-döna, tohare dania zanugi foʼömöu.
Lasusugi ndraʼugö ba lafadögö-dögö.
Larabu gokhötau.+
8 Ato niha si no öduwagö do,Öfalua waʼalösökhi ba gulidanö, ba mbanua sebua hegöi ba nono mbanuania,+Ba oya soi si no örabu.
Daʼö mbörö wa larabu göi ndraʼugö niha si toröi ba soi daʼö.+
9 Alai niha si falimo ba wangalui hare soguna ba nösi nomonia,*Ifazökhi gazuninia ba nahia salawa,Enaʼö lö göna ia famakao!
10 Aila nösi nomou* börö niʼera-era dödöu.
No öfalua horö ba wangohori ngawalö soi.+
11 Muʼao dania gara si so ba dowa,Ba itema linia eu si so ba mbumbu nomo.
12 Alai niha sanuwagö do ba wamazökhi banua sebua,Ba samasindro banua si fao faʼalösökhi!
13 Laforege wohalöwö, hizaʼi ahori akhozi daʼö ba galitö;Fefu soi laforege wohalöwö ba lö lasöndra hadia ia.
Hadia tenga Yehowa samatörö saradadu zorugo zamalua daʼa fefu?+
14 Anönö sa dania danö faʼaboto ba dödö lakhömi Yehowa,Simane faʼanönö doyo nasi andrö asi.+
15 Alai niha samasoli fönu ba faʼabao dödö bakha ba nidanö nibadu,Ba ibeʼe khö ndra awönia enaʼö mabu ira,Ba enaʼö iʼila ira lö nukha!
16 Abuso dania ndraʼugö fangoʼaya, tenga lakhömi.
Öbadu dania daʼö ba laʼila niha wa lö nukhamö ba lö nisuna ndraʼugö.*
Irugi inötönia khöu ba wamadu ösi mako andrö si so ba gambölö danga Yehowa.+
Tobali fangoʼaya dania lakhömi niʼokhögöu.
17 Göna khöu wamakao nifaluamö ba Libano;Göna göi khöu wamakiko sebua sametaʼu ngawalö gurifö,Börö me ato niha si no öduwagö do,Ba no öfalua waʼalösökhi ba gulidanö, ba mbanua sebua hegöi ba nono mbanuania.+
18 Faduhu dödö niha ba nadu si no lafazökhi.
Fefu daʼö tefazökhi moroi ba geu, kara awö loga.
Faya mene-mene nibeʼera;Lö iʼila mohede adura andrö;Hadia gunania daʼö ba niha samazökhi yaʼia?+
19 Alai niha sangumaʼö ba mbalö geu, ”Faoso!”
Mazui sangumaʼö ba gara si lö mangila mohede, ”Fahaʼö ndraʼaga!”
Sindruhu sa, no mufoʼuli anaʼa nadu andrö awö wirö,+Hizaʼi lö mohanu-hanu ira.+
20 Hizaʼi, so Yehowa ba gosalinia niʼamoniʼö.+
Enaʼö ahono fönania fefu zi so ba gulidanö!’”+
Nisura ba gahe zura
^ Mazui ”wafa wanura”.
^ Mazui ”alua”.
^ Mazui ”hulö zi no tetaha ia ba wamaigi niha”.
^ Mazui ”fehulu dödö”.
^ Mazui te ”wamatinia; waʼafaduhu dödönia”.
^ Mazui ”Syeol”. Faigi Geluaha Ngawua Wehede.
^ Mazui ”soinia”.
^ Mazui ”soimö”.
^ Mazui te ”Öbadu dania daʼö ba mangole-ngolea gaheu”.
