Hezekieli 1:1-28
1 Me döfi si 30 ba mbaŵa si 4, ba ngaluo si 5, me so ndraʼo ba zinga Nungo Nidanö Khebara+ ba gotalua niha niʼoloiʼö,+ teboka mbanua si yawa ba utema gangilata moroi khö Lowalangi.
2 Ba ngaluo si lima ba mbaŵa daʼö, me no lima fakhe teʼoloiʼö Razo Yoyakhi,+
3 mohede Yehowa khö Hezekieli* ono gere sotöi Busi, ba zinga Nungo Nidanö Khebara ba mbanua niha Galedaia.+ Ba daʼö, urasoi waʼabölö* Yehowa.+
4 Ba uʼila nangi sabölö-bölö+ moroi yöu. So lawuo sebua awö gari mbanua+ ba no ifasui ia haga. Ba gotalua galitö daʼö, so zi takile simane anaʼa safusi.*+
5 Ba gotalua galitö daʼö, so daöfa malaʼika+ si fakhili-khili ba niha.
6 Ba dozi ira, so öfa mbawa ba öfa göi gafira.+
7 Adölö gahera, ba hulö laluʼa nono zawi laluʼa kahera. Takile gahera simane tembaga si no mudekha.+
8 Ero samösa ira, mobawa ba moʼafi. Ba narö gafira si öfa ngawua, so dangara si hulö danga niha.
9 Oi zara fatöfa gafira. Lö laholeʼö ira na mofanö, adölö manö miföna.+
10 Ero samösa malaʼika so öfa ngawua mbawara: bawa niha, ba gambölö bawa zingo,+ ba gabera bawa zawi si matua+ ba so göi mbawa+ moyo.+
11 Simane daʼö zikhalara, ba no labologö gafira miyawa. Ero samösa, so dombua gafira si no fatöfa ba dombua gafi samalugö botora.+
12 Adölö wofanöra ba laʼoʼö gofu hezo iʼohe ira eheha niʼamoniʼö.+ Lö laholeʼö ira wofanö.
13 Hulö mbo galitö si hola-hola malaʼika andrö. So zi hulö solo sohaga samangörö-ngörö yaʼia ba gotaluara. Moroi ba galitö daʼö, so haga gari mbanua.+
14 Hulö haga gari mbanua na mofanö hegöi na mangawuli ndra malaʼika andrö.
15 Me unehegö ndra malaʼika si öfa bawa andrö, uʼila ba zi fatambaira sambua gaolo-gaolo si so ba dete danö.+
16 Fagölö waʼatakile fefu zi öfa ngawua gaolo-gaolo andrö hulö gara kirisoli. Khala-khala hegöi famazökhi yaʼia simane gaolo-gaolo si dombua si no mufasoli.
17 Tola mofanö gaolo-gaolo daʼö gofu hezo ba lö moguna laholeʼö ira.
18 Alawa sibai gaolo-gaolo daʼö irege ahöli dödö zamaigi. Afönu hörö zinga gaolo-gaolo andrö fasui.+
19 Na mofanö malaʼika andrö, ba mofanö göi gaolo-gaolo daʼö. Ba na muzawa ira si yawa ba muzawa göi gaolo-gaolo daʼö.+
20 Laʼoʼö gofu hezo ifatenge ira eheha niʼamoniʼö. Na muzawa ira ba muzawa göi gaolo-gaolo daʼö börö me eheha niʼamoniʼö zamofaʼabölö malaʼika andrö* awö gaolo-gaolonia.
21 Na mofanö ira, mofanö göi gaolo-gaolo daʼö. Na tebato ira, ba tebato göi gaolo-gaolo daʼö. Na muzawa ira ba danö ba muzawa gaolo-gaolo daʼö, börö me eheha niʼamoniʼö zamofaʼabölö malaʼika andrö awö gaolo-gaolonia.
22 So zalo si takile si hulö esi ba dete högö malaʼika daʼö. No tebologö daʼö ba högöra.+
23 Barö zalo andrö, no lafadölö wamologö afira ba oi zara fatöfa. Ero samösa, so dombua gafira niʼogunaʼö ba wamalugö botora si tambai ba si dombua ibalugö mbotora si tambai.
24 Ba urongo ruru gafira hulö goso-goso nidanö sabölö-bölö, simane li Wondrege Zabölö.+ Na mofanö ira, hulö ruru zaradadu sato. Na molombase ira ba ladada tou gafira.
25 Aefa daʼö, terongo li moroi ba zalo andrö si so ba dete högöra. (Na molombase ira, ladada tou gafira.)
26 Ba zalo si so ba dete högöra andrö, so zi hulö gara safiro+ si fakhili-khili ba dadaoma waʼarazo,+ so samösa zi hulö niha si dadao ba daʼö.+
27 Ba wamaigigu, hulö ganaʼa safusi*+ si takile ia ba si no ifasui alitö iʼotarai löwi-löwi numalö miyawa. Iʼotarai löwi-löwi numalö mitou ba hulö galitö.+ So haga ba zi fasuinia
28 hulö ndrumi+ si so ba lawuo na moteu. Simane daʼö haga si so ba zi fasuinia. Hulö lakhömi Yehowa.+ Me uʼila daʼö, mangalulu ndraʼo. Aefa daʼö, urongo samösa zi fahuhuo.
Nisura ba gahe zura
^ Eluahania ”Lowalangi Zangabölöʼö”.
^ Sin.: ”danga”.
^ Sin.: ”elektrum”, yaʼia daʼö anaʼa si no mufaruka firö.
^ Mazui ”börö me faʼabölö malaʼika andrö”.
^ Sin.: ”elektrum”, yaʼia daʼö anaʼa si no mufaruka firö.
