Hezekieli 10:1-22
10 Me ufakhölö ndraʼo wamaigi salo si so ba dete högö kerubi, so ba daʼö zi hulö gara safiro si fakhili-khili ba dadaoma waʼarazo.+
2 Imane khö ndra matua samake nukha si sökhi andrö,+ ”Aeʼe tou ba gotalua gaolo-gaolo si tefuta-futa+ si so barö kerubi. Fomendrua tanga wondraʼui bo galitö si hola-hola+ ba gotalua kerubi, ba fazawili ia ba mbanua daʼö.”+ Ba uʼila me möi ndra matua andrö ba daʼö.
3 Me möi ia bakha, no mozizio ndra kerubi ba gambölö gosali, ba no ihawui lawuo golayama tanö bakha andrö.
4 Aefa daʼö, tefazawa lakhömi Yehowa+ iröi kerubi andrö numalö ba mbawandruhö gosali. Lö isamuzaigö wombalugö osali andrö lawuo+ ba afönu lakhömi Yehowa golayamania.
5 Terongo ruru gafi kerubi ba golayama tanö baero, hulö li Lowalangi Fondrege Zabölö na fahuhuo ia.+
6 Aefa daʼö, imane khö ndra matua samake nukha si sökhi andrö, ”Halö galitö ba gotalua gaolo-gaolo si tefuta-futa ba gotalua kerubi.” Möi bakha ndra matua daʼö ba mozizio ia ba zinga gaolo-gaolo.
7 So samösa kerubi zangoroʼö tangania ba galitö si so ba gotalua kerubi andrö.+ Ihalö ösa galitö daʼö ba ibeʼe ba danga ndra matua samake nukha si sökhi.+ Itema daʼö ira matua andrö ba mofanö ia.
8 Ba narö gafi ndra kerubi, so zi hulö danga niha.+
9 Aefa daʼö, uʼila öfa ngawua gaolo-gaolo ba zinga kerubi, sambua ero samösa kerubi. Takile gaolo-gaolo daʼö hulö gara kirisoli.+
10 Fagölö fefu gaolo-gaolo si öfa ngawua andrö, simane gaolo-gaolo si dombua si no mufasoli.
11 Tola mofanö gaolo-gaolo daʼö gofu hezo ba lö laholeʼö ira. Gofu hezo iʼotahögö kerubi andrö ba laʼoʼö, lö moguna laholeʼö ira.
12 Oi mohörö fefu mboto kerubi andrö, hulura, tangara hegöi afira. Ba zinga kerubi si daöfa, so göi gaolo-gaolo si no afönu hörö.+
13 Urongo li siʼao sangumaʼö ba gaolo-gaolo andrö, ”Miʼofanö, yaʼami gaolo-gaolo si tefuta-futa!”
14 Dozi ira,* so öfa mbawara. Si oföna bawa kerubi, si dua bawa niha, si tölu bawa zingo, ba si öfa bawa moyo.+
15 Yaʼira andre fagölö simane malaʼika niʼilagu ba Nungo Nidanö Khebara.+ Tola möi miyawa kerubi daʼa.
16 Na mofanö kerubi andrö, mofanö göi gaolo-gaolo si so ba zingara. Na labologö gafira ba wamazawa yaʼira moroi ba danö, lö iholeʼö ia gaolo-gaolo andrö ba lö tebulö ia ba ngaira.+
17 Na tebato ira, tebato göi gaolo-gaolo daʼö. Na tefazawa ira, fao göi khöra gaolo-gaolo andrö. Börö me so ba gaolo-gaolo daʼö geheha niʼamoniʼö samofaʼabölö ira malaʼika andrö.
18 Aefa daʼö, mofanö lakhömi Yehowa+ moroi ba mbawandruhö gosali ba tebato ia ba dete kerubi.+
19 Uʼila kerubi andrö no labologö gafira ba wamazawa yaʼira moroi ba danö. Lö tebulö ba ngaira gaolo-gaolo andrö me mofanö ira. Tebato ira ba lala si numalö ba mbawa göli gatumbukha ba nomo Yehowa. So khöra lakhömi Lowalangi ndraono Gizaraʼeli.+
20 Yaʼira andre malaʼika si no irai uʼila barö dadaoma Lowalangi ndraono Gizaraʼeli ba Nungo Nidanö Khebara.+ Awena aboto ba dödögu wa kerubi ira.
21 Dozi ira, so öfa mbawara ba öfa gafira. So göi zi hulö danga niha ba narö gafira.+
22 Bawara andrö fagölö simane niʼilagu ba zinga Nungo Nidanö Khebara.+ Adölö miföna wofanöra.+
Nisura ba gahe zura
^ Eluahania ero samösa kerubi.
