Hezekieli 12:1-28
12 Imane nasa khögu Yehowa,
2 ”He ono niha, toröi ndraʼugö ba gotalua soi samadaö. So höröra ba wamaigi hizaʼi lö laʼila, so dögi dalingara ba wamondrondrongo hizaʼi lö lafondrondrongo,+ börö me soi samadaö ira.+
3 He ono niha, faʼanö gama-gamamö simane niha niʼoloiʼö. Ba zi maʼökhö, enaʼö hulö niha niʼoloiʼö ndraʼugö. Na laʼila ndraʼugö, ofanö moroi ba nomomö ba aeʼe ba nahia tanö böʼö, simane sibai niha niʼoloiʼö. Te dania lanehegö ndraʼugö, hewaʼae soi samadaö ira.
4 Ba zi maʼökhö na laʼila ndraʼugö, ohe baero fefu gama-gamamö si no öfaʼanö hulö na edöna teʼoloiʼö ndraʼugö. Na laʼila ndraʼugö ba zi bongi, ofanö simane niha niʼoloiʼö.+
5 ”Na laʼila ndraʼugö, tölaʼö dowa nomomö ba törö daʼö weʼamöi baero ba ohe göi gama-gamau.+
6 Na laʼila ndraʼugö, beʼe ba galisimö gama-gamau, ba beʼe baero daʼö na bongi. Balugö mbawamö enaʼö lö öʼila lalau börö me ubaliʼö ndraʼugö tandra ba ndraono Gizaraʼeli.”+
7 Ba ufalua fefu simane sibai niwaʼönia khögu. Ba zi maʼökhö, ubeʼe baero gama-gamagu hulö niha niʼoloiʼö. Ba zi bongi utölaʼö dowa faoma tangagu. Na no bongi, uʼohe baero gama-gamagu, ba uʼangalisigö föna duduma höröra.
8 Ba zihulö wonginia, imane khögu Yehowa,
9 ”He ono niha, hadia tenga no manofu ndraono Gizaraʼeli samadaö andrö khöu ba lamane, ’Hadia nifaluamö?’
10 Ömane khöra, ’Daʼa niwaʼö Yehowa Lowalangi Fondrege Zalawa: ”So goroisa sofeta khö ndra sondröniaʼö+ ba Yeruzalema hegöi ba ndraono Gizaraʼeli maʼafefu si so ba mbanua daʼö.”’
11 ”Ömane, ’Tobali tandra khömi nifaluagu andre.+ Alua dania khöra nifaluagu andre. Teʼoloiʼö ira.+
12 Iʼangalisigö dania gama-gamania sondröniaʼö ba mofanö ia ba waʼogömi-gömi. Itölaʼö göli, daʼö itörö weʼamöi baero ba iʼohe gama-gamania.+ Ibalugö mbawania irege lö iʼila lalania.’
13 Ufazaumba ndrialagu khönia, ba alau ia ba ndriala andrö.+ Uʼohe ia ba Mbabilona ba mbanua niha Galedaia. Hizaʼi, lö iʼila mbanua daʼö, ba daʼö dania mate ia.+
14 Ufazawili misa fefu zi so ba zi fasuinia, simanö göi ndra saradadunia.+ Usöbi wöda ba wolohi yaʼira.+
15 Awena dania aboto ba dödöra wa yaʼo Yehowa, na ufabali ba ufazawili ira misa ba gotalua soi böʼö.
16 Hizaʼi, utehegö so niha soloi moroi ba mbawa wöda, lofo hegöi fökhö waba. Ufalua daʼö enaʼö tola ladunö-dunö fefu gamuatara si raʼiö ba mbanua nirugira, ba awena dania aboto ba dödöra wa yaʼo Yehowa.”
17 Imane nasa khögu Yehowa,
18 ”He ono niha, sanizi-nizi ba waʼataʼu dania ndraʼugö wemanga göu,* ba lö sökhi-sökhi dödöu ba sabu tödö ndraʼugö ba ginötö öbadu nidanö.+
19 Ömane ba nono mbanua soi daʼa, ’Daʼa niwaʼö Yehowa Lowalangi Fondrege Zalawa sanandrösa ba niha Yeruzalema si so ba danö Gizaraʼeli: ”Sabu tödö ira wemanga göra ba sanizi-nizi ba waʼataʼu ira wamadu idanö. Tobali tanö si lö niha-niha dania danöra+ börö waʼalösökhi nifalua nono mbanuania.+
20 Tedudugö fefu mbanua si so ba daʼö ba tobali tanö si mate.+ Awena dania aboto ba dödömi wa yaʼo Yehowa.”’”+
21 Imane nasa khögu Yehowa,
22 ”He ono niha, hana wa omasi sibai ndraono Gizaraʼeli wangumaʼö fehede nifoʼamaedola andre, ’Itugu numalö ginötö, hizaʼi lö hadöi salua gangilata andrö si no mufaʼeleʼö’?+
23 Ömane khöra, ’Daʼa niwaʼö Yehowa Lowalangi Fondrege Zalawa: ”Uheta dania wehede nifoʼamaedola andrö ba lö saʼae mutöi-töi ia ba Gizaraʼeli.”’ Hizaʼi fatunö khöra, ’Itugu ahatö ginötö andrö,+ ba hasambalö alua fefu gangilata si no mufaʼeleʼö.’
24 Lö hadöi saʼae angilata faya mazui famaʼeleʼö faya ba gotalua ndraono Gizaraʼeli.+
25 ’”Yaʼo Yehowa zi fahuhuo. Gofu hadia niwaʼögu hasambalö alua, lö sanaha yaʼia.+ He yaʼugö soi samadaö, lö zi lö itörö fefu zi no uwaʼö ba götöu,”+ iwaʼö Yehowa Lowalangi Fondrege Zalawa.’”
26 Imane nasa khögu Yehowa,
27 ”He ono niha, lamane iraono Gizaraʼeli, ’Ara nasa alua gangilata nifaʼemania andrö. Ifaʼeleʼö zalua ba zi so miföna.’+
28 Börö daʼö ömane khöra, ’Daʼa niwaʼö Yehowa Lowalangi Fondrege Zalawa: ”’Lö ahou fefu niwaʼögu andrö. Hasambalö alua fefu gofu hadia niwaʼögu,’ iwaʼö Yehowa Lowalangi Fondrege Zalawa.”’”
Nisura ba gahe zura
^ Sin.: ”roti”.
