Hezekieli 18:1-32
18 Ifuli imane nasa khögu Yehowa,
2 ”Hadia geluahania wa miwaʼö gamaedola daʼa ba mbanua Gizaraʼeli, ’Ama zi manga bua nagu saisö, hizaʼi iraonora zokolingö ifö’?+
3 ”’Faya wa no sauri ndraʼo,’ iwaʼö Yehowa Lowalangi Fondrege Zalawa, ’na ifuli mitöi-töi gamaedola daʼö ba Gizaraʼeli.
4 Okhötagu fefu noso* niha, he noso nama hegöi noso ndraono. Dozi niha samalua horö, daʼö zaetu noso.
5 ”’Na duma-dumania so samösa niha satulö tödö, ifalua zatulö ba sindruhu.
6 Lö iʼa wöfö gö nadu si no mubeʼe sumange yawa ba dete hili.+ Lö mangandrö ia ba nadu niʼogorofi* andrö niʼokhögö ndraono Gizaraʼeli. Lö ihoröni ndronga nawönia+ mazui mörö ia ba ndra alawe safökhö talu.+
7 Lö ifakao niha böʼö.+ Ifuli gama-gama nigadegö khönia si tobali weʼe-weʼe dödö.+ Lö managö ia,+ hizaʼi ibeʼe gönia ba niha solofo+ ba ibeʼe nukha ba niha si lö nukha.+
8 Na ifafizaʼö gefenia, lö ihalö mbunga mazui ifohare.+ Itimbagö ngawalö zi lö atulö,+ ba ifalua wanguhuku satulö.+
9 Lö faröi ia ba ifalua gamakhoitagu ba iʼoʼö gangetula huku nibeʼegu. Atulö niha simane daʼö ba lö tebulö auri ia,’+ iwaʼö Yehowa Lowalangi Fondrege Zalawa.
10 ”’Hizaʼi, na so khönia nono matua sanagö-nagö,+ samunu niha+ mazui samalua ngawalö zimane daʼa:
11 (ba lö irai ifalua ngawalö zi lö sökhi andrö amania) iʼa wöfö gö nadu si no mubeʼe sumange ba dete hili, ihoröni ndronga nawönia,
12 ifakao niha sabu tödö ba si numana,+ managö, lö ifangawuli gama-gama nigadegö khönia, mangandrö ia ba nadu niʼogorofi,+ ifalua ngawalö zi raʼiö,+
13 na ifafizaʼö gefenia, ihalö mbunga mazui ifohare,+ hasambalö mate nono daʼö. Labunu ia börö ngawalö gamuata si raʼiö nifaluania. Mate ia börö horönia samösa.*
14 ”’Hizaʼi, na duma-dumania so samösa ndraono sangila horö nifalua namania, hewaʼae iʼila ba lö fao ia wamalua daʼö.
15 Lö iʼa wöfö gö nadu si no mubeʼe sumange ba dete hili. Lö mangandrö ia ba nadu niʼogorofi nifosumange ndraono Gizaraʼeli. Lö ihoröni ndronga nawönia.
16 Lö ifakao niha böʼö. Ifuli gama-gama nigadegö khönia si tobali weʼe-weʼe dödö. Lö itagö gofu hadia ia, hizaʼi ibeʼe gönia ba niha solofo ba ibeʼe nukha ba niha si lö nukha.
17 Lö ifakao niha si numana. Na ifafizaʼö gefenia, lö ihalö mbunga mazui ifohare. Ifalua gamakhoitagu ba iʼoʼö gangetula huku nibeʼegu. Lö mate niha daʼö börö horö nifalua namania. Hasambalö auri ia.
18 Hewaʼae simanö, börö me no falimo namania, irabu gama-gama dalifusönia, ba ifalua zala ba soinia, mate namania andrö börö horönia samösa.
19 ”’Te manofu ami, ”Hana wa lö iluʼi horö namania ono?” Hasambalö auri nono andrö börö me ifalua zatulö ba sindruhu, iʼoʼö ba ifalua fefu gamakhoitagu.+
20 Niha samalua horö, daʼö zaetu noso.+ Lö tehuku ndraono börö horö namania, ba lö tehuku nama börö horö ndraononia. Tesulöni gamuata si sökhi ba niha samalua si sökhi, ba tesulöni gamuata si lö sökhi ba niha samalua si lö sökhi.+
21 ”’Na so niha si lö sökhi samalalini era-era ba horö si no ifalua ba itöngöni gamakhoitagu andre, ifalua zatulö ba sindruhu, hasambalö auri ia, lö mate.+
22 Lö saʼae itörö tödö zala si no ifalua.+ Hasambalö auri ia börö me no ifalua zindruhu.’+
23 ”Imane Yehowa Lowalangi Fondrege Zalawa, ’Hadia omuso dödögu na mate niha si lö sökhi?+ Abölö omuso dödögu na ifalalini gera-erania ba lö tebulö auri ia.’+
24 ”’Hizaʼi, na so niha satulö si lö saʼae mamalua satulö, ba ifalua zi lö sökhi hegöi ngawalö gamuata si raʼiö simane nifalua niha si lö sökhi, hadia lö tebulö auri ia? Lö mutörö tödö gamuatania si sökhi si no ifalua.+ Hasambalö mate ia börö me faröi ia ba ifalua horö.+
25 ”’Hizaʼi, mimane, ”Lö atulö nifalua Yehowa.”+ Mifondrondrongo yaʼami iraono Gizaraʼeli. Hadia lö atulö nifaluagu?+ Hadia tenga amuatami zi lö atulö?+
26 ”’Na so niha satulö si lö saʼae mamalua satulö, ba ifalua zi lö sökhi, mate ia börö horönia samösa. Sindruhu sa wa mate ia börö horö nifaluania.
27 ”’Na so niha si lö sökhi samalalini era-era ba zi lö sökhi si no ifalua ba ibörögö ifalua zatulö ba sindruhu, no iʼorifi ia samösa.+
28 Na no ibulöʼö ba ifalalini gera-erania, hasambalö auri ia, lö mate.
29 ”’Hizaʼi, lamane dania iraono Gizaraʼeli, ”Lö atulö nifalua Yehowa.” Mifondrondrongo yaʼami iraono Gizaraʼeli. Hadia lö atulö nifaluagu?+ Hadia tenga amuatami zi lö atulö?’
30 ”’Börö daʼö yaʼami Izaraʼeli, uhuku dania ami moloʼö nifaluami zamösana,’+ iwaʼö Yehowa Lowalangi Fondrege Zalawa. ’Mifalalini gera-erami ba miröi fefu zala si no mifalua enaʼö lö fasala ami me no mifaelungu niha ba wamalua sala.
31 Miröi fefu zala si no mifalua.+ Miʼokhögö dödö hegöi fangera-ngera si bohou.+ He yaʼami Izaraʼeli, hana wa edöna mate ami?’+
32 ”’Lö omuso dödögu na mate niha,’+ iwaʼö Yehowa Lowalangi Fondrege Zalawa. ’Börö daʼö, mifalalini gera-erami enaʼö auri ami.’”+
Nisura ba gahe zura
^ Mazui ”waʼauri”.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Mazui ”Iluʼi ndronia samösa”.
