Hezekieli 22:1-31
22 Ifuli zui imane khögu Yehowa,
2 ”He ono niha, hadia no tefaʼanö ndraʼugö ba wangombakha fanguhuku ba mbanua samunu niha* andrö+ hegöi ba wangombakha ngawalö zi raʼiö nifaluara?+
3 Ömane, ’Daʼa niwaʼö Yehowa Lowalangi Fondrege Zalawa: ”He yaʼugö banua sanuwagö do niha,+ no ahatö ginötö khöu.+ No öfazökhi nadu niʼogorofi* ba wotaʼunöisi yaʼugö.+
4 Fasala ndraʼugö börö me no öduwagö ndro,+ ba raʼiö ndraʼugö börö nadu niʼogorofi andrö.+ No öʼadogoiʼö ginötöu. No ahatö ginötö safuria khöu. Börö daʼö, utehegö teʼailasi ba teʼoʼaya ndraʼugö ba gotalua soi böʼö misa.+
5 Yaʼugö andrö banua si tehöngö ba waʼalösökhi hegöi safönu faʼafawuka. Laʼoʼaya ndraʼugö+ soi si fasuimö hegöi soi saröu.
6 Laʼogunaʼö waʼabölöra ira sondröniaʼö iraono Gizaraʼeli si so ba gotaluamö ba wanuwagö do niha.+
7 Laʼoʼaya namara faoma inara.+ Lalimo niha si fatewu ba lafakao ndraono si lö ama* hegöi lakha mbanua.”’”+
8 ”’Fatuwu ndraʼugö nahia niʼamoniʼö khögu ba ötaʼunöisi zabato andrö khögu.+
9 So ba gotaluami niha samöbögö si lö duhu somasi manuwagö do,+ niha si manga föfö zumange ba dete hili awö niha samalua si lö sökhi.+
10 So ba gotaluami zi mörö khö woʼomo namania,+ ba so göi zi mörö khö ndra alawe si raʼiö safökhö talu.+
11 So ba gotaluami ndra matua samalua amuata si raʼiö khö woʼomo nawönia,+ so göi ndra matua samalua si lö sökhi+ ba ihoröni numönönia, ba so göi ndra matua si mörö khö dalifusönia alawe, ono namania.+
12 So ba gotaluami zanema sölö-sölö ba wanuwagö do.+ Na öfafizaʼö gefe,+ öhalö mbunga mazui öfohare. Öfakao nawöu niha ba wanöndra kefe.+ Sindruhu-ndruhu wa no öʼolifugö ndraʼo,’ iwaʼö Yehowa Lowalangi Fondrege Zalawa.
13 ”’Ubözi dawo-tawo ba ogoro ndraʼo me uʼila hare nisöndrau ba walöʼatulö hegöi fanuwagö do salua ba gotaluami.
14 Na ufalua khöu wanguhuku, hadia lö ataʼu ndraʼugö? Hadia lö alö waʼabölö dangau?+ Yaʼo Yehowa zangumaʼö, ba yaʼo göi zamalua yaʼia.
15 Ufazawili ndraʼugö ba gotalua soi böʼö ba mbanua niha baero.+ Uheta dania waʼaraʼiömö andrö.+
16 Teʼide-ideʼö ndraʼugö ba gotalua soi böʼö ba awena dania aboto ba dödöu wa yaʼo Yehowa.’”+
17 Imane nasa khögu Yehowa,
18 ”He ono niha, ba wamaigigu iraono Gizaraʼeli andre hulö zasao* si lö moguna. Yaʼira andrö tembaga, simo safusi hegöi simo saitö si so ba naha galitö. No tobali ira simane sasao.*+
19 ”Börö daʼö, daʼa niwaʼö Yehowa Lowalangi Fondrege Zalawa: ’Börö me no tobali ami simane sasao* si lö moguna,+ uʼowuloi dania ami ba Yeruzalema.
20 Simane firö, tembaga, siʼöli, simo saitö hegöi simo safusi niʼowuloi ba naha galitö ba wangombuyuʼö yaʼia, uʼowuloi göi dania ami ba wönugu ba faʼabao dödögu. Uʼombuyuʼö ami ba galitö.+
21 Uʼowuloi dania ami ba uhawui ami faoma alitö wönugu.+ Ombuyu dania ami ba daʼö.+
22 Simane firö sombuyu ba naha galitö, ombuyu dania ami ba daʼö. Awena dania aboto ba dödömi wa yaʼo Yehowa zamalua khömi fönugu andrö.’”
23 Imane nasa khögu Yehowa,
24 ”He ono niha, waʼö khönia, ’Tanö si lö teu ndraʼugö ba si lö muʼehaogö ba ngaluo wönugu andrö.
25 Mamagölö ndra samaʼeleʼö khönia ba daʼö+ simane singo siʼao ba wanasawi ahulua.+ Laʼa niha ba larabu gokhöta hegöi gama-gamara sebua böli. Itugu ato lakha mbanua labeʼe.
26 Lasawö goroisagu ira ere+ ba lataʼunöisi nahia niʼamoniʼö khögu.+ Lö lafaehusi ngawalö niʼamoniʼö ba zi toʼölönia.+ Lö laʼombakhaʼö hezo zi raʼiö ba si sökhi.+ Lö lafalua zabato andrö khögu ba laʼoʼaya ndraʼo ba gotaluara.
27 Ira sondröniaʼö si so ba daʼö hulö nasu gatua sanasawi ahuluara. Laduwagö ndro niha ba labunu niha enaʼö lasöndra hare ba walöʼatulö.+
28 Labiniʼö gamuatara ira samaʼeleʼö khönia, simane niha sameʼe cat ba dowa. Lafaʼema gangilata hegöi famaʼeleʼö faya.+ Lamane, ”Daʼa niwaʼö Yehowa Lowalangi Fondrege Zalawa,” sindruhunia sa lö si fahuhuo khöra Yehowa.
29 Falimo göi nono mbanua soi daʼö, larabu niha,+ lafakao niha soʼamböta hegöi si numana, lalimo niha si fatewu ba lö lafalua khöra waʼatulö.’
30 ”’Uʼalui niha somasi mamazökhi öli kara andrö ba gotaluara mazui sozizio fönagu ba göli si no atöla ba wolumöʼö soi daʼö, enaʼö lö tedudugö ia.+ Hizaʼi lö hadöi.
31 Daʼö mbörö wa ufalua khöra wönugu ba uhori ira ba galitö si fao faʼaukhu dödö. Usulöni khöra gamuatara,’ iwaʼö Yehowa Lowalangi Fondrege Zalawa.”
Nisura ba gahe zura
^ Mazui ”mbanua soʼömö do”.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Mazui ”si lö ama si lö ina”.
^ Daʼa gakhökhöla loga si no mutunu.
^ Daʼa gakhökhöla wirö si no mutunu.
^ Daʼa gakhökhöla loga si no mutunu.
