Hezekieli 24:1-27
24 Ba ndröfi si siwa ba ngaluo si fulu ba mbaŵa si fulu, ifuli zui imane khögu Yehowa,
2 ”He ono niha, tanö ba zura ngaluo daʼa. Maʼökhö andre ibörögö möi razo Mbabilona ba wanuwö Yeruzalema.+
3 Faʼema sambua gamaedola sanandrösa ba soi samadaö andre ba ömane,
”’Daʼa niwaʼö Yehowa Lowalangi Fondrege Zalawa:
”Fedadao mbowoa ba dete galitö ba foʼösi faoma idanö.+
4 Beʼe bakha nagole+ si sökhi si no mutatawi,Faha hegöi taʼio. Fönui mbowoa daʼö faoma töla fondrege zi sökhi.
5 Halö mbiri-biri fondrege zi sökhi,+ ba faʼanö geu barö mbowoa andrö.
Rino nagole si no mutatawi awö dölania.”’
6 ”Daʼa niwaʼö Yehowa Lowalangi Fondrege Zalawa:
’Alai ndraʼo ami banua sanuwagö do,+ bowoa si no howutö, si lö muheta howu andrö!
Heta fefu nösi mbowoa daʼö.+ Böi mifili-fili.
7 Börö me so nasa ba mbanua andrö ndro niha nibunu.+ Ifaduwa daʼö ba dete gara.
Lö ifaduwa tou ba danö enaʼö tebalugö tanö.+
8 Enaʼö alua wönugu ba wanulöni nifaluara andrö,Ubeʼe ndro niha nibunura ba dete garaEnaʼö tebai labalugö.’+
9 ”Börö daʼö, daʼa niwaʼö Yehowa Lowalangi Fondrege Zalawa:
’Alai ndraʼo ami banua sanuwagö do!+
Unönö wangowuloi eunia.
10 Nönö geu ba fohola galitönia.
Rino nagole andrö irugi asoso, duwagö kuania ba akha akhozi dölania.
11 Fedadao mbowoa si lö ösi andrö ba dete galitö enaʼö aukhu,Irege oyo mbowoania.*
Mangele dania bakha ba daʼö waʼaraʼiönia+ ba akhozi howunia.
12 Sindruhu-ndruhu wa fangafatö dödö ba faʼamarase,Börö me lö aheta howunia saweʼe-weʼe.+
Tiboʼö mbowoa si no howutö andrö ba galitö!’
13 ”’Börö gamuatamö si lö sökhi andrö wa raʼiö ndraʼugö.+ No utandraigö wangehao yaʼugö, hizaʼi lö omasiʼö laʼehaogö. Lö aheta waʼaraʼiömö irege alö wönugu khöu.+
14 Yaʼo Yehowa zangumaʼö daʼö. Hasambalö itörö ba lö hadöi si tola manaha yaʼo, lö abu dödögu ba lö maniasado.+ Lahuku dania ndraʼugö moloʼö amuatamö hegöi bua-buamö si lö sökhi,’ iwaʼö Yehowa Lowalangi Fondrege Zalawa.”
15 Imane zui khögu Yehowa,
16 ”He ono niha, ha mamöʼi hörö, uheta moroi khöu niha niʼomasiʼömö andrö.+ Böi abu dödöu ba böi eʼe mazui mowöi dawa höröu.
17 Angarö-ngarö hizaʼi böi hede-hede. Böi falua gowasa wangabu dödö ba niha si no mate.+ Ogunaʼö mböbö högö+ hegöi sandrala.+ Böi duhö mbawau,*+ ba böi a roti nibeʼe khöu.”+
18 Ba zihulö wongi daʼö, fahuhuo ndraʼo ba soi daʼa, ba zi bonginia mate woʼomogu ira alawe. Mahemolu sihulö wonginia, ba uʼoʼö fefu niwaʼö khögu.
19 Ba lamane khögu niha, ”Hana wa öfalua daʼa? Hadia so gamakhaitania khöma?”
20 Umane khöra, ”Daʼa niwaʼö Yehowa khögu,
21 ’Fatunö ba ndraono Gizaraʼeli, ”Daʼa niwaʼö Yehowa Lowalangi Fondrege Zalawa: ’Utaʼunöisi dania naha niʼamoniʼö andrö khögu,+ nizuno-zunomi, sebua böli ba wamaigimi ba sahatö ba dödömi. Mate dania ba mbawa wöda nonomi matua hegöi onomi alawe si no miröi.+
22 Lö tola löʼö miʼoʼö nifalua Hezekieli. Lö miduhö mbawami* ba lö miʼa roti nibeʼe khömi.+
23 Lö tebulö miʼogunaʼö mböbö högö hegöi sandrala. Lö abu dödömi ba lö meʼe ami. Tefakao ami börö zala nifaluami+ ba faoma mangarö-ngarö ami khö nawömi.
24 Tobali dania tandra khömi Hezekieli.+ Miʼoʼö zi no ifalua. Na alua daʼö, awena dania aboto ba dödömi wa yaʼo Yehowa Lowalangi Fondrege Zalawa.’”’”
25 ”He yaʼugö ono niha, ba ginötö uhalö nonora matua hegöi onora alawe, awö mbaʼa-baʼa andrö khöra yaʼia daʼö baʼa-baʼa si sökhi niʼomasiʼöra, sebua böli ba wamaigira ba sahatö ba dödöra,+
26 örongo dania duria moroi ba niha niʼefaʼö.+
27 Ba ngaluo daʼö, öbokai dania mbawau ba fahuhuo ndraʼugö ba niha si no teʼefaʼö andrö.+ Öʼila saʼae mohede. Tobali tandra ndraʼugö ba awena dania aboto ba dödöra wa yaʼo Yehowa.”
