Hezekieli 25:1-17
25 Imane nasa khögu Yehowa,
2 ”He ono niha, otahögö niha Gamoni+ ba amaʼeleʼö sanandrösa khöra.+
3 Ömane ba niha Gamoni, ’Fondrondrongo niwaʼö Yehowa Lowalangi Fondrege Zalawa. Daʼa niwaʼö Yehowa Lowalangi Fondrege Zalawa: ”Börö me omuso dödöu ba wamaigi me tetaʼunöisi naha niʼamoniʼö khögu, me muröi mbanua Gizaraʼeli ba me muʼoloiʼö niha Yehuda,
4 ululu dania ndraʼugö ba danga niha Gatumbukha tobali okhötara. Lafazökhi nahia waʼatoröira ba gotaluami ba lafasindro nosera ba zi toröi yaʼami. Yaʼira dania zi manga bua nowimi ba samadu susu moroi ba ngawawa gurifömi.
5 Ubaliʼö dania benua soduʼu nahia gondra mbanua Raba,+ ba tobali naha wolombase gurifö mbanua Gamoni. Awena dania aboto ba dödöu wa yaʼo Yehowa.”’”
6 ”Börö daʼö, daʼa niwaʼö Yehowa Lowalangi Fondrege Zalawa: ’Börö me öbözi dawo-tawo+ ba öfendröndrö gaheu, omuso dödöu ba öʼoʼaya nasa zalua ba ndraono Gizaraʼeli,+
7 ufazawa dangagu ba ululu ndraʼugö enaʼö tohare soi böʼö ba wangoloiʼö yaʼugö. Uhori ndraʼugö irege lö hadöi saʼae soimö hegöi banuamö.+ Useʼe ndraʼugö ba danö ba awena dania aboto ba dödöu wa yaʼo Yehowa.’
8 ”Daʼa niwaʼö Yehowa Lowalangi Fondrege Zalawa: ’Börö me imane Moabi+ hegöi Seʼira,+ ”Fagölö manö niha Yehuda ba soi böʼö,”
9 utehegö lasuwö mbanua si so ba nola danö Moabi, tefarahu ba daʼö mbanua si sökhi ba soi daʼö simane Beti-yesimoti, Baʼali-meono hegöi Kiriataʼi.+
10 Ululu niha Moabi hegöi niha Gamoni tobali okhöta niha Gatumbukha+ irege fefu niha ba gulidanö lö itörö tödöra niha Gamoni andrö.+
11 Ufalua wanguhuku ba niha Moabi+ ba awena dania aboto ba dödöra wa yaʼo Yehowa.’
12 ”Daʼa niwaʼö Yehowa Lowalangi Fondrege Zalawa: ’No molau balö Gedomo ba niha Yehuda. Sindruhu-ndruhu wa no fasala Gedomo börö me no ilau mbalönia.+
13 Börö daʼö, daʼa niwaʼö Yehowa Lowalangi Fondrege Zalawa: ”Ufazawa göi dangagu ba wangohori niha Gedomo fabaya uriföra. Ubaliʼö ia banua si lö niha-niha.+ Mate nono mbanuara ba mbawa wöda iʼotarai Demano ofeta ba Dedano.+
14 ’Ono mbanuagu Izaraʼeli dania nifatengegu ba wolau balö khö Gedomo.+ Laʼohe wönu hegöi faʼabao dödögu khö Gedomo, irege irasoi Edomo wolau balö moroi khögu,’+ iwaʼö Yehowa Lowalangi Fondrege Zalawa.”’
15 ”Daʼa niwaʼö Yehowa Lowalangi Fondrege Zalawa: ’Börö me fatuwu sibai niha Wilisiti ba ndraono Gizaraʼeli, laforege wangalui lala ba wanulöni hegöi ba wangohori yaʼira.+
16 Börö daʼö, daʼa niwaʼö Yehowa Lowalangi Fondrege Zalawa: ”Ufazawa dangagu ba wangohori niha Wilisiti.+ Uhori dania niha Gereti+ ba ubunu niha si toröi ba zinga nasi.+
17 Ufalua khöra wolau balö sabölö-bölö ba ubeʼe khöra wanguhuku sabua. Ba ginötö ufalua wolau balö awena dania aboto ba dödöra wa yaʼo Yehowa.”’”
