Hezekieli 28:1-26
28 Imane nasa khögu Yehowa,
2 ”He ono niha, ombakhaʼö khö zondröniaʼö Diro, ’Daʼa niwaʼö Yehowa Lowalangi Fondrege Zalawa:
”Börö me no fayawa dödöu,+ lö tebulö ömane, ’Yaʼodo andre lowalangi.
Ba dadaoma lowalangi so ndraʼo ba dalu nasi.’+
Hewaʼae öwaʼö tödöu wa yaʼugö andrö lowalangi,Hizaʼi lö tebulö wa niha ndraʼugö, tenga lowalangi.
3 Abölö atua-tua ndraʼugö moroi khö Danieli.+
Lö hadöi si tobini si lö öʼila.
4 Kayo ndraʼugö börö waʼatua-tua hegöi faʼaboto ba dödö niʼokhögöu,Ba öhöna khöu ganaʼa hegöi firö ba naha wangiröʼö harato.+
5 Börö me onekheʼö mogale andrö wa kayo ndraʼugö,+Ba fayawa dödöu börö waʼakayomö andrö.”’
6 ”’Börö daʼö, daʼa niwaʼö Yehowa Lowalangi Fondrege Zalawa:
”Börö me öwaʼö tödöu wa yaʼugö andrö lowalangi,
7 Ufatenge niha baero ba wanuwö yaʼugö, yaʼia daʼö soi fondrege zafaito.+
Lasöbi wödara ba ladudugö ngawalö zi sökhi niʼokhögöu börö waʼatua-tuamö,Ba lafakiko lakhömiu.+
8 Laʼohe ndraʼugö mitou ba mbawa lewatö,Si hokha mbu niha waʼamatemö ba dalu nasi.+
9 Hadia lö aetu ömane ba niha samunu yaʼugö, ’Yaʼodo andre lowalangi?
Tenga lowalangi ndraʼugö ba danga niha sotaʼunöisi yaʼugö, ha niha gulidanö.”’
10 ’Mate ndraʼugö ba danga niha baero simane niha si lö nisuna,Börö me yaʼo zangumaʼö,’ iwaʼö Yehowa Lowalangi Fondrege Zalawa.”
11 Aefa daʼö imane nasa khögu Yehowa,
12 ”He ono niha, anunöisi zinunö ngenu-ngenu andre sanandrösa khö razo Diro ba fatunö khönia, ’Daʼa niwaʼö Yehowa Lowalangi Fondrege Zalawa:
”No tobali ndraʼugö duma-duma soʼahonoa.
Moʼahonoa waʼasökhimö+ ba afönu ndraʼugö faʼatua-tua.+
13 Ba Gedena so ndraʼugö me föna, ba kabu Lowalangi.
No mubeʼe khöu ngawalö gara sebua böli ba wonönö faʼasökhiu,Yaʼia daʼö mira, tofa ba yasibi; Kirisoli, kara una, gioko; safiro, firusi,+ ba samurudi;No mufodane-dane anaʼa fefu gara daʼö.
No muhenaigö ia me ngaluo tewöwöi ndraʼugö.
14 Ufataro ndraʼugö tobali kerubi nibayoini ba wolumöʼö.
Ba hili niʼamoniʼö Lowalangi so ndraʼugö me föna,+ ba mowaö-waö ndraʼugö ba gotalua gara soʼalitö.
15 Lö raʼiö gamuatamö iʼotarai me tewöwöi ndraʼugö,Irege öfalua ngawalö zi lö sökhi ba gafuriata.+
16 Börö me arörö ndraʼugö ba wogale,+Afönu ndraʼugö faʼalösökhi, ba ibörögö öfalua horö.+
Andrö wa raʼiö ndraʼugö ba wamaigigu ba ufofanö ndraʼugö moroi ba hili Lowalangi, fandröndröu moroi ba gara soʼalitö andrö.+
He yaʼugö kerubi solumöʼö, uhori dania ndraʼugö.
17 Fayawa dödöu börö waʼasökhimö.+
Lö saʼae khöu faʼatua-tua börö lakhömiu.+
Ufazaumba ndraʼugö ba gulidanö.+
Ubaliʼö ndraʼugö famaʼiki ndra razo.
18 No taʼunö naha niʼamoniʼö andrö khögu börö zala sebua nifaluamö hegöi falimosamö ba wogale.
Uʼasogö galitö ba gotaluamö, irege akhozi ndraʼugö ibeʼe.+
Ubaliʼö ndraʼugö awu ba danö föna niha sato.
19 Dozi niha moroi ba ngawalö soi sangila yaʼugö, ahöli-höli dödöra ba wamaigi yaʼugö.+
Tehori ndraʼugö ba zi lö mudöna-döna ba humokha mbu niha wamaigi,Ba lö saʼae yaʼugö sagötö faʼara.”’”+
20 Aefa daʼö imane nasa khögu Yehowa,
21 ”He ono niha, otahögö Zidona+ ba amaʼeleʼö sanandrösa khönia.
22 Ömane, ’Daʼa niwaʼö Yehowa Lowalangi Fondrege Zalawa:
”He Sidona, yaʼo dania zi tobali udumö, ba tefolakhömi ndraʼo börö nifaluagu khöu.
Me ufalua khöu wanguhuku ba me uʼogunaʼö ndraʼugö ba wangamoniʼö yaʼo, awena dania aboto ba dödö niha wa yaʼo Yehowa.
23 Ufatörö khöra wökhö waba ba mangele ndrora ba lala.
Fadela tou ba danö niha si mate ba ginötö tohare wöda samasui yaʼira.
Awena dania aboto ba dödöra wa yaʼo Yehowa.+
24 ”’”Lö saʼae duʼu sodoi+ samesokho ba samakao iraono Gizaraʼeli yaʼia daʼö dozi niha sangoʼaya yaʼira. Awena dania aboto ba dödö niha wa yaʼo Yehowa Lowalangi Fondrege Zalawa.”’
25 ”’Daʼa niwaʼö Yehowa Lowalangi Fondrege Zalawa: ”Ba ginötö uʼowuloi dania ndraono Gizaraʼeli si no muzawili misa ba soi böʼö,+ teʼamoniʼö ndraʼo föna soi böʼö+ börö ira.+Toröi ira ba danö nibeʼegu khö genonigu Yakobo.+
26 Mowanua ira ba daʼö ba lö sametaʼu yaʼira.+ Lafazökhi nomora hegöi kabu nagu.+ Mowanua ira ba daʼö ba lö sametaʼu yaʼira na uhuku fefu soi sangoʼaya yaʼira ba zi fasuira.+ Ba awena dania aboto ba dödöra wa yaʼo Yehowa Lowalangira.”’”
