Hezekieli 3:1-27
3 Aefa daʼö imane khögu, ”He ono niha, a gölu-gölu zura andrö si so tanö fönau. Ofanö ba fahuhuo ba ndraono Gizaraʼeli.”+
2 Ba ubokai mbawagu ba ibeʼe ögu gölu-gölu zura andrö.
3 Ba imane khögu, ”He ono niha, a ba foʼösi dalumö gölu-gölu zura andre nibeʼegu khöu.” Andrö wa uʼa, ba hulö wewani waʼami ba mbawagu.+
4 Imane khögu, ”He ono niha, aeʼe ba ndraono Gizaraʼeli ba faʼema khöra wehedegu.
5 Lö ufatenge ndraʼugö ba soi sangogunaʼö li böʼö ba si lö öʼila eluaha, hizaʼi ha ba ndraono Gizaraʼeli.
6 Lö ufatenge ndraʼugö ba ngawalö soi sangogunaʼö li böʼö ba si lö öʼila eluaha mazui si lö aboto ba dödöu ngawua wehedenia. Na ufatenge ndraʼugö khöra hasambalö lafondrondrongo niwaʼöu.+
7 Hizaʼi, lö lafondrondrongo niwaʼöu iraono Gizaraʼeli, börö me lö göi lafondrondrongo niwaʼögu.+ Sagabeʼe högö ndraono Gizaraʼeli, ba lö khöra foloʼö.+
8 Andrö wa uʼabeʼeʼö mbawau simane faʼabeʼe mbawara ba uʼabeʼeʼö gangangomö simane faʼabeʼe gangangora.+
9 No ubaliʼö ndraʼugö simane intan, sabeʼe moroi ba gara alitö.+ Böi ataʼufi ira ba böi anizi wamaigi bawara,+ börö me soi samadaö ira.”
10 Aefa daʼö imane khögu, ”He ono niha, fondrondrongo fefu niwaʼögu ba tanö ba dödöu.
11 Aeʼe ba soimö si no teʼoloiʼö+ ba fahuhuo khöra he na lafondrondrongo he na löʼö. Ömane khöra, ’Daʼa niwaʼö Yehowa Lowalangi Fondrege Zalawa.’”+
12 Ba so waʼabölö* samazawa yaʼo+ ba urongo li sebua furigu, ”Yatesuno lakhömi Yehowa ba nahiania.”
13 Terongo göi ruru gafi malaʼika si fatöfa khö nawönia+ hegöi li gaolo-gaolo si so ba zi tambainia+ awö weʼugu-ugu sebua.
14 Faʼabölö daʼö zamazawa ba solohe yaʼo. Mofanödo si fao fönu ba faʼabao dödö. Aefa daʼö, urasoi waʼabölö danga Yehowa.
15 Möido uʼondrasi niha niʼoloiʼö ba Deli-abibi sahatö ba Nungo Nidanö Khebara.+ Toröi ndraʼo ba zi toröi yaʼira.+ Mangera-ngera ndraʼo sagötö zi fitu hari ba daʼö.
16 Me no aefa zi fitu hari, imane khögu Yehowa,
17 ”He ono niha, no utuyu ndraʼugö tobali sanaro ba ndraono Gizaraʼeli.+ Na fahuhuo ndraʼo khöu, hasambalö öfaʼema khöra wamangelama si no uwaʼö.+
18 Na uwaʼö ba niha si lö sökhi, ’Hasambalö mate ndraʼugö,’ hizaʼi lö öfangelama ia enaʼö ifalalini gamuatania si lö sökhi ba isöndra waʼauri,+ si mate ia ba waʼalösökhinia börö zala nifaluania.+ Hizaʼi, khöu usugi ndronia.+
19 Na no öfangelama niha si lö sökhi ba lö ifalalini gamuatania si lö sökhi awö nifaluania, si mate ia börö zala nifaluania andrö. Hizaʼi, no öʼorifi ndraʼugö.+
20 Na so niha satulö si lö saʼae mamalua satulö, ba ifalua zi lö sökhi, ubeʼe wangala ba lalania ba mate ia.+ Na lö öfangelama ia, mate ia börö horönia, ba lö saʼae itörö tödö Lowalangi fefu zatulö nifaluania. Hizaʼi, khöu usugi ndronia.+
21 Na no öfangelama niha satulö enaʼö lö ifalua horö ba na iʼoʼö, auri ia börö me no öfangelama ia.+ Ba no göi öʼorifi ndraʼugö.”
22 Ba daʼö, urasoi waʼabölö danga Yehowa, imane khögu, ”Aeʼe ba ndraso, ba daʼö fahuhuo ndraʼo khöu.”
23 Andrö wa möido ba ndraso ba uʼila lakhömi Yehowa+ simane lakhömi niʼilagu sahatö ba Nungo Nidanö Khebara,+ ba utuhi danö fönania.
24 Aefa daʼö, möi ba dödögu geheha niʼamoniʼö irege mosindro ndraʼo.+ Imane khögu Lowalangi,
”Angawuli ba nomo ba böi ae baero.
25 He ono niha, laböbö dania ndraʼugö faoma sinali irege tebai öfalukhaisi ira.
26 Ufalemba lelamö ba gararou, ba lö öʼila mohede, tebai öbeʼe khöra degu-tegu börö me soi samadaö ira.
27 Hizaʼi, ba ginötö fahuhuo ndraʼo khöu, ubokai mbawau, ba hasambalö ömane khöra,+ ’Daʼa niwaʼö Yehowa Lowalangi Fondrege Zalawa.’ Niha somasi mamondrongo akha ifondrondrongo,+ ba niha si lö omasi mamondrongo akha lö ifondrondrongo, börö me soi samadaö ira.+
Nisura ba gahe zura
^ Ngawua wehede sindruhunia, eluahania eheha niʼamoniʼö hegöi malaʼika.
