Hezekieli 30:1-26
30 Aefa daʼö imane zui khögu Yehowa,
2 ”He ono niha, amaʼeleʼö ba ömane, ’Daʼa niwaʼö Yehowa Lowalangi Fondrege Zalawa:
”Miʼebuaʼö limi weʼe, ’Alai ndraʼo, lö ara tö tohare ngaluo daʼö!’
3 No ahatö ngaluo andrö, no ahatö ngaluo Yehowa.+
Daʼö ngaluo safönu lawuo,+ no irugi inötö wanguhuku ngawalö soi.+
4 Tohare dania wöda ba wanuwö Miserai, ba tokea niha Gaitiofia me laʼila niha Miserai si no mate.
Larabu gokhötania ba ladudugö wondrasinia.+
5 Si mate ba mbawa wöda daniaFefu niha Gaitiofia,+ Futo,+ Ludi hegöi niha moroi ba ngawalö soi,Simanö göi niha Gubi awö niha si no tefaböbö ba mbuʼusa li.”’*
6 Daʼa niwaʼö Yehowa:
ʼMate göi niha sangoʼawögö Miserai,Ba adudu waʼabölö nizuno-zunonia.’+
”’Si mate ba mbawa wöda dania fefu niha ba mbanua daʼö, iʼotarai Migidola+ irugi Ziene,’+ iwaʼö Yehowa Lowalangi Fondrege Zalawa.
7 ’Tobali tanö fondrege zi mate dania soira, ba fondrege zadudu mbanuara.+
8 Me utunu danö Miserai ba uhori fefu niha sangoʼawögö yaʼia, awena dania aboto ba dödöra wa yaʼo Yehowa.
9 Ba luo daʼö, latörö göfa ira tenge-tengegu ba wametaʼu niha Gaitiofia si faduhu tödö ba waʼabölönia samösa. Tokea dania ira na tohare ngaluo daʼö ba danö Miserai, börö me hasambalö tohare ngaluo daʼö.’
10 ”Daʼa niwaʼö Yehowa Lowalangi Fondrege Zalawa: ’Ufatenge dania Nebukanesa* razo Mbabilona ba wangohori niha Miserai.+
11 Tohare ia hegöi ira saradadunia ba wanudugö banua andrö. Yaʼira andrö soi fondrege zafaito.+ Lasöbi wödara ba wanuwö niha Miserai ba afönu mbanua daʼö boto zi mate.+
12 Oköli lala nidanö Nilo+ ubeʼe ba ufamawa mbanua daʼö ba niha si lö sökhi. Ufatenge niha baero ba wanudugö banua daʼö irege muröi ia awö nösinia maʼafefu.+ Yaʼo Yehowa zangumaʼö daʼa.’
13 ”Daʼa niwaʼö Yehowa Lowalangi Fondrege Zalawa: ’Ududugö dania nadu niʼogorofi* si so ba Nofi*+ hegöi lowalangi si lö eluaha. Lö hadöi saʼae sondröniaʼö ba danö Miserai ba ufetaʼu mbanua daʼö.+
14 Ubaliʼö tanö si lö niha-niha Wataro,+ utunu Zoana ba ufalua wanguhuku ba mbanua No.*+
15 Ufalua wönugu sabölö-bölö ba mbanua Sini, yaʼia daʼö baʼa-baʼa saro ba Miserai ba uhori nono mbanua No.
16 Utunu dania Miserai ba ataʼu mbanua Sini, muboto mbawa göli mbanua No ba musuwö Nofi* ba zi maʼökhö!
17 Mate dania ba mbawa wöda ndraono matua Gono* hegöi Fibese ba muʼoloiʼö fefu nono mbanuania.
18 Ogömi danö ba Dakhifane ba ginötö ufatö kalo mbagi niha Miserai.+ Taya waʼabölö nizuno-zunora andrö.+ Ibalugö lawuo mbanua daʼö ba teʼoloiʼö nono mbanuania.+
19 Ufalua wanguhuku ba Miserai ba awena dania aboto ba dödöra wa yaʼo Yehowa.’”
20 Aefa daʼö, ba ndröfi si 11, ba mbaŵa siföföna ba ngaluo si 7, imane khögu Yehowa,
21 ”He ono niha, no ufatö daʼio Waraʼo razo Miserai. Lö muʼaroʼö wamöbö taʼionia ba lö mubalugö faböi alio döhö ba abölö ia wamazawa föda.”
22 ”Börö daʼö, daʼa niwaʼö Yehowa Lowalangi Fondrege Zalawa: ’Ulawa dania Waraʼo razo Miserai.+ Ufatö daʼionia si dua rozi, he si no afatö he si löʼö.+ Utimba wöda ba dangania.+
23 Ufazawili niha Miserai ba gotalua soi böʼö misa.+
24 Uʼabeʼeʼö daʼio* razo Mbabilona+ ba ubeʼe wödagu ba dangania.+ Aefa daʼö, ufatö daʼio Waraʼo ba moʼira ia föna razo Mbabilona börö waʼafökhö, hulö niha sarakhagö mate.
25 Uʼabeʼeʼö daʼio razo Mbabilona, hizaʼi ombuyu dania daʼio Waraʼo. Na ubeʼe wödagu ba danga razo Mbabilona ba iʼogunaʼö daʼö ba wanuwö Miserai,+ awena dania aboto ba dödöra wa yaʼo Yehowa.
26 Ufazawili niha Miserai ba gotalua soi böʼö misa.+ Awena dania aboto ba dödöra wa yaʼo Yehowa.’”
Nisura ba gahe zura
^ Te iraono Gizaraʼeli si no faʼawö ba niha Miserai.
^ Sin.: ”Nebukaresa”, amalalata döinia tanö böʼö.
^ Mazui ”Mefisi”.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Eluahania Tebesi.
^ Mazui ”Mefisi”.
^ Eluahania Heliofoli.
^ Mazui ”Uʼabölöʼö”.
