Hezekieli 32:1-32
32 Ba ndröfi si 12, ba mbaŵa si 12 ba ngaluo siföföna, imane zui khögu Yehowa,
2 ”He ono niha, anunöisi zinunö ngenu-ngenu sanandrösa khö Waraʼo razo Miserai ba ömane khönia,’Me föna, hulö zingo sawuyu-wuyu sabölö ndraʼugö ba gotalua soi böʼö,Hizaʼi no laduhö mbawau.
Me föna, hulö gurifö sebua sibai ndraʼugö ba nasi,+ samakuba ungo nidanö.
Olotu ba taʼunö nidanö ba lahe gahemö.’
3 Daʼa niwaʼö Yehowa Lowalangi Fondrege Zalawa:
’Uʼogunaʼö ngawalö soi ba wamazaumba dialagu khöu,Ba teʼuʼu ndraʼugö ba ndrialagu andrö.
4 Uröi ndraʼugö ba danö.
Ufazaumba ndraʼugö ba mbenua.
Ufatenge wofo enaʼö toröi ira ba daʼö,Ba ubaliʼö fangabuso gutu ndruʼu nagolemö.+
5 Ufazaumba nagolemö ba hili-hiliBa afönu ndraso gamatelau.+
6 Ufabadugö ndromö ba danö ofeta ba hili-hili.
Afönu nungo nidanö ndromö.’
7 ’Ba ginötö tehori ndraʼugö, ubalugö mbanua ba lö mohaga ndröfi.
Tebalu haga luo ba lawuo,Ba lö saʼae haga mbaŵa.+
8 Ogömi fefu zi haga ba dalu mbanua börö ndraʼugö,Ba uhawui faʼogömi-gömi mbanuamö,’ iwaʼö Yehowa Lowalangi Fondrege Zalawa.
9 ’Abu dödö soi böʼö ubeʼe ba ginötö uʼoloiʼö nono mbanuamöBa soi si lö öʼila.+
10 Ahöli-höli dödö soi böʼö ubeʼe,Ba manizi-nizi razora ba waʼataʼu me ufaligoi wödagu ba wanuwö yaʼugö föna duduma höröra.
Lö tebulö manizi-nizi ira ba ngaluo waʼadudumö,Ba ataʼu ira mate.’
11 Daʼa niwaʼö Yehowa Lowalangi Fondrege Zalawa:
’Tohare khöu wöda razo Mbabilona.+
12 Ahori mate ubeʼe nono mbanuamö ba wöda ndra saradadu sagabölö,Yaʼira andrö moroi ba soi fondrege zafaito.+
Laʼailasi dania lakhömi Miserai, ba lahori fefu nono mbanuania.+
13 Uhori fefu gurifönia si so ba zinga nungo nidanö sebua,+Ba lö saʼae olotu ia ba gahe niha hegöi ba gahe gurifö.’+
14 ’Ba luo daʼö, ohahau dania nidanö andrö khöra,Ba mangele nungo nidanö khöra simane fanikha,’ iwaʼö Yehowa Lowalangi Fondrege Zalawa.
15 ’Ba ginötö ubaliʼö tanö si mate Miserai ba si lö niha-niha, tobali ia banua si lö ösi saʼae,+Ba ginötö ubunu fefu nono mbanuania,Awena dania aboto ba dödöra wa yaʼo Yehowa.+
16 Daʼa zinunö ngenu-ngenu, ba dozi niha oi zara laʼanunöisi.
Manunö dania ndraono alawe moroi ba soi böʼö.
Manunö ira börö Miserai awö nono mbanuania,’ iwaʼö Yehowa Lowalangi Fondrege Zalawa.”
17 Ba ndröfi si 12, ba ngaluo si 15 ba mbaŵa daʼö, imane zui khögu Yehowa,
18 ”He ono niha, eʼesi niha Miserai andrö ba ohe ia mitou ba narö danö. Ohe ia ba faogö khönia ndraono alawe moroi ba soi sagabölö, simanö göi niha tanö böʼö si möi mitou ba lewatö.
19 ”’Hadia öwalinga abölö sökhi ndraʼugö moroi ba danö böʼö? Ae mitou ba fadölöʼö ba zinga niha si lö nisuna!’
20 ”’Fendronga waʼamatera ba niha si mate ba mbawa wöda.+ No mululu ia ba mbawa wöda. Fondröni hakhi ia awö zi fao khönia.
21 ”’Moroi ba Lewatö* sabakha, fahuhuo ndra saradadu fondrege zabölö khö Waraʼo hegöi niha sanolo yaʼia. Hasambalö möi mitou niha Miserai börö me mate ira ba mbawa wöda ba tefadölö ira simane niha si lö nisuna.
22 Ba daʼö so Asiria, ba so ba zi fasuinia lewatö niha si fao khönia. Ahori mate ira ba mbawa wöda.+
23 So lewatönia ba dögi fondrege zabakha, ba so ba zi fasuinia lewatö niha si fao khönia. Ahori mate ira ba mbawa wöda börö me laʼasogö waʼataʼu ba mbanua niha sauri.
24 ”’Ba daʼö so Gelama,+ ba so ba zi fasuinia lewatö niha si fao khönia. Ahori mate ira ba mbawa wöda. Lö nisuna ira ba no numalö ira mitou ba narö danö, yaʼia daʼö niha sangaʼasogö faʼataʼu ba mbanua niha sauri. Teʼailasi ira iadaʼa hegöi niha tanö böʼö si möi mitou ba lewatö.
25 No lafazökhi khönia naha wemörö ba gotalua niha nibunu, no ifasui ia lewatö niha si fao khönia. Lö nisuna ira ba mate ira ba mbawa wöda börö me laʼasogö waʼataʼu ba mbanua niha sauri. Teʼailasi ira hegöi niha tanö böʼö si möi mitou ba lewatö. No labeʼe ia ba gotalua niha nibunu.
26 ”’Ba daʼö so Mesekhi hegöi Tubala+ awö niha si fao khöra. So ba zi fasuira* lewatö niha si fao khönia. Lö nisuna ira fefu ba no ifahö ira föda börö me laʼasogö waʼataʼu ba mbanua niha sauri.
27 Tefadölö dania ira ba gotalua ndra saradadu sagabölö si lö nisuna, si no mate, si möi mitou ba Lewatö* awö wakake wasuwöta khöra. Labaliʼö tandraya wödara ba tölara zoluʼi horöra, börö me laʼasogö waʼataʼu ba mbanua niha sauri.
28 Tehori dania ndraʼugö awö niha si lö nisuna. Tefadölö ndraʼugö ba lewatö awö niha si mate ba mbawa wöda.
29 ”’Ba daʼö so Gedomo,+ ira razo hegöi ira sondröniaʼö khönia. Hewaʼae agabölö ira, hizaʼi mufadölö dania ira ba gotalua niha si mate ba mbawa wöda. Tefadölö göi ira ba zinga niha si lö nisuna+ hegöi niha tanö böʼö si möi mitou ba lewatö.
30 ”’Ba daʼö so ndra sondröniaʼö moroi yöu awö ndra niha Zidona.+ Hewaʼae lafetaʼu niha me abölö ira mböröta, hizaʼi teʼailasi ira ba numalö ira mitou awö niha nibunu. Lö nisuna ira ba tefadölö dania ira ba gotalua niha si mate ba mbawa wöda. Teʼailasi ira awö niha si möi mitou ba lewatö.
31 ”’Iʼila fefu daʼö Faraʼo, ba terara dödönia börö zalua ba niha si fao khönia.+ Mate dania Waraʼo ba mbawa wöda awö ndra saradadunia,’ iwaʼö Yehowa Lowalangi Fondrege Zalawa.
32 ”’Börö me iʼasogö waʼataʼu ba mbanua niha sauri, tefadölö dania Waraʼo awö niha si fao khönia ba gotalua niha si lö nisuna hegöi niha si mate ba mbawa wöda,’ iwaʼö Yehowa Lowalangi Fondrege Zalawa.”
Nisura ba gahe zura
^ Mazui ”Syeol”. Faigi Geluaha Ngawua Wehede.
^ Sin.: ”fasuinia”.
^ Mazui ”Syeol”. Faigi Geluaha Ngawua Wehede.
