Hezekieli 34:1-31
34 Aefa daʼö, imane zui khögu Yehowa,
2 ”He ono niha, amaʼeleʼö sanandrösa khö ndra kubalo ndraono Gizaraʼeli. Amaʼeleʼö ba ömane khöra, ’Daʼa niwaʼö Yehowa Lowalangi Fondrege Zalawa: ”Alai ami kubalo ndraono Gizaraʼeli,+ ha talumi miʼabusoiʼö! Hadia tenga kubalo sindruhunia zameʼe gö mbiri-biri?+
3 Miʼa dawönia ba mibaliʼö nukhami mbunia ba mitaba zabölö esolo.+ Hizaʼi, lö mibeʼe gö mbiri-biri andrö.+
4 Lö miʼabölöʼö zi tebai, lö mifadöhö zofökhö, lö mibalugö zokho, lö miʼohe mangawuli zi no elungu, ba lö miʼalui zi taya.+ Lö sökhi wamatörömi ba lö mihakhösi tödö ira.+
5 Andrö wa muzawili ira börö me lö kubalo.+ Muzawili ira ba iʼa ira urifö samuʼi.
6 Elungu mbiri-birigu misa ba hili-hili hegöi ba hili sagalawa. Muzawili mbiri-birigu ba zi sagörö ulidanö, ba lö samaigi mazui sangalui yaʼira.
7 ”’”He yaʼami kubalo, mifondrondrongo niwaʼö Yehowa,
8 ’Imane Yehowa Lowalangi Fondrege Zalawa, ”Faya wa no sauri ndraʼo na lö uhuku ami, börö me lö mikubaloi mbiri-birigu irege tobali ira ahulua gurifö samuʼi, ba lö laʼalui ira kubalo andrö khögu mbiri-birigu, hizaʼi ha talura niʼabusoiʼöra ba lö labeʼe gö mbiri-birigu.”’
9 Börö daʼö yaʼami kubalo, mifondrondrongo niwaʼö Yehowa.
10 Daʼa niwaʼö Yehowa Lowalangi Fondrege Zalawa: ’Ulawa dania ndra kubalo andrö. Khöra usugi hadia zalua ba mbiri-birigu.* Lö utehe khöra wameʼe gö* mbiri-birigu+ ba lö saʼae laʼabusoiʼö dalura samösa. Uʼefaʼö mbiri-birigu moroi ba mbawara ba lö saʼae laʼa mbiri-birigu.’”
11 ”’Daʼa niwaʼö Yehowa Lowalangi Fondrege Zalawa: ”Yaʼo dania zangalui biri-birigu ba yaʼo zondrorogö yaʼira.+
12 Urorogö mbiri-birigu simane kubalo sanöndra biri-birinia si no elungu ba yaʼo dania zameʼe göra.+ Uʼefaʼö ira gofu hezo muzawili ira ba ngaluo sogömi-gömi ba solawuo.+
13 Uheta ira moroi ba ngawalö soi ba uʼowuloi ira. Uʼohe ira ba mbanuara ba ubeʼe göra ba hili-hili Gizaraʼeli,+ ba zinga nungo nidanö sahatö ba nahia si tola muʼiagö.
14 Ubeʼe göra ba mbenua soduʼu si sökhi ba laʼa ndruʼu ba hili-hili sagalawa ba Gizaraʼeli.+ Lafadölö ira ba mbenua soduʼu si sökhi.+ Laʼa ndruʼu sabölö sökhi ba hili-hili Gizaraʼeli.”
15 ”’”Yaʼo samösa zameʼe gö mbiri-birigu+ ba yaʼo zamadölö yaʼira,”+ iwaʼö Yehowa Lowalangi Fondrege Zalawa.
16 ”Uʼalui zi taya,+ uʼohe mangawuli zi no elungu, ubalugö zokho, ba uʼabölöʼö zi tebai. Hizaʼi, uhori zesolo awö zagabölö. Ubeʼe dania khöra wanguhuku si tobali balazora.”
17 ”’He yaʼami biri-birigu, daʼa niwaʼö Yehowa Lowalangi Fondrege Zalawa: ”Yaʼo dania zi tobali sanguhuku ba gotalua mbiri-birigu, ba gotalua mbiri-biri si matua hegöi nambi si matua.+
18 Hadia ambö nasa khömi wemanga ba mbenua soduʼu si sökhi? Hadia mihundra-hundra nasa mbenua soduʼu tanö böʼö? Ba me no mibadu nidanö fondrege zohau-hau, hadia miʼolotusi nasa nidanö andrö ba gahemi?
19 Hadia ba mbenua soduʼu si no mihundra-hundra andrö manga mbiri-birigu ba labadu nidanö si no miʼolotusi ba gahemi?”
20 ”’Börö daʼö, daʼa niwaʼö Yehowa Lowalangi Fondrege Zalawa: ”Yaʼo, yaʼo samösa dania zi tobali sanguhuku ba gotalua mbiri-biri sesolo ba biri-biri safuo.
21 Lö miböhöli wodegeni yaʼira faoma ngaimi ba alisimi, ba lö miböhöli miʼogunaʼö dandrumi ba wanandru sofökhö irege muzawili ira misa.
22 Uʼefaʼö mbiri-birigu ba lö saʼae tobali ira ahulua.+ Yaʼo samösa dania zi tobali sanguhuku ba gotalua mbiri-birigu.
23 Ufataro khöra samösa gubalo,+ yaʼia daʼö enonigu Dawido.+ Yaʼia zameʼe göra. Yaʼia samösa zameʼe göra ba yaʼia zi tobali kubalora.+
24 Yaʼo Yehowa zi tobali Lowalangira+ ba enonigu Dawido dania zondröniaʼö yaʼira.+ Yaʼo Yehowa zangumaʼö.
25 ”’”Fawuʼu li ndraʼo khöra ba waʼatulö.+ Uheta dania gurifö samuʼi ba safaito ba soi daʼö,+ irege lö sametaʼu yaʼira ba mbenua soduʼu ba mörö ira ba gatua misa.+
26 Ubaliʼö ira howu-howu,+ simanö göi mbanua si so ba zi fasui hili andrö khögu. Utorugö deu ba ginötö si tefaudu. Ufaduwa khöra howu-howu simane teu.+
27 Mowua geu si so ba mbenua ba iʼasogö mbuania tanö.+ Lö sametaʼu yaʼira ba mbanua daʼö.+ Ba ginötö ufatö kalo mbagira ba uʼefaʼö ira ba danga niha sangosawuyu yaʼira, awena dania aboto ba dödöra wa yaʼo Yehowa.
28 Lö saʼae larabu ira soi böʼö. Lö saʼae tobali ira ahulua gurifö samuʼi ba ohahau dödöra waʼatoröi ba daʼö ba lö sametaʼu yaʼira.+
29 ”’”Ubeʼe khöra kabu satabö sinanö si tehöngö. Lö saʼae mate ira waʼolofo ba soi daʼö+ ba lö göi laʼoʼaya ira soi böʼö.+
30 ’Awena dania aboto ba dödöra wa yaʼo zi fao khöra. Yaʼo Yehowa Lowalangira ba ono mbanuagu ndraono Gizaraʼeli andrö,’+ iwaʼö Yehowa Lowalangi Fondrege Zalawa.”’
31 ”’He yaʼami biri-birigu, biri-biri nirorogögu,+ yaʼami andrö niha. Yaʼodo Lowalangimi,’ iwaʼö Yehowa Lowalangi Fondrege Zalawa.”
