Hezekieli 36:1-38
36 ”He ono niha, amaʼeleʼö sanandrösa ba hili Gizaraʼeli ba ömane, ’He yaʼugö hili Gizaraʼeli, mifondrondrongo niwaʼö Yehowa.
2 Daʼa niwaʼö Yehowa Lowalangi Fondrege Zalawa: ”Lamane udu sanandrösa khöu, ’Baga daʼö! No tobali okhötada nahia sagalawa andrö si no mosindro iʼotarai mböröta!’”’+
3 ”Börö daʼö, amaʼeleʼö, ’Daʼa niwaʼö Yehowa Lowalangi Fondrege Zalawa: ”No labaliʼö tanö si lö niha-niha ndraʼugö ba no lafaʼuʼu iʼotarai mbalö faföfö irege tobali ndraʼugö okhöta soi böʼö ba zi fasuimö. Lö aetu ladunö-dunö ndraʼugö ba laböbögö khöu zi lö duhu.+
4 He yaʼami hili Gizaraʼeli, mifondrondrongo wehede Yehowa Lowalangi Fondrege Zalawa! Daʼa niwaʼö Yehowa Lowalangi Fondrege Zalawa ba hili-hili, hili, ungo nidanö, daso, adudula si no muröi+ hegöi banua si lö niha-niha, si no larabu ba laʼoʼaya ira soi böʼö si so ba zi fasuira.+
5 Imane Yehowa Lowalangi Fondrege Zalawa ba nahia daʼö fefu, ’Ba wönugu si hola-hola andrö simane alitö,+ utimbagö fefu soi böʼö hegöi Edomo börö me omuso sibai dödöra ba mangoʼaya ira+ me lahalö ba larabu danögu awö mbenua soduʼu tobali okhötara.’”’+
6 ”Andrö amaʼeleʼö sanandrösa ba danö ndraono Gizaraʼeli, ba ömane ba hili-hili, hili, ungo nidanö hegöi daso, ’Daʼa niwaʼö Yehowa Lowalangi Fondrege Zalawa: ”Fahuhuo ndraʼo ba wönugu hegöi faʼabao dödögu börö me no mitaögö wangoʼaya moroi ba soi böʼö.”’+
7 ”Börö daʼö, daʼa niwaʼö Yehowa Lowalangi Fondrege Zalawa: ’Ufazawa dangagu weʼamöi ba hölu wa hasambalö göna göi faʼaila fefu soi ba zi fasui yaʼami.+
8 Hizaʼi yaʼami hili Gizaraʼeli, modaha ba mowua dania döla geu soguna ba nono mbanuagu Izaraʼeli+ börö me lö ara tö mangawuli ira.
9 Fao ndraʼo khömi ba uʼameʼegö tödö ami. Lafaku dania danö ba latanö danömö zinanö.
10 Unönö dania waʼato nono mbanuami+ yaʼia daʼö iraono Gizaraʼeli maʼafefu. Laʼiagö mbanua misa ba lafuli lafazökhi zi no adudu.+
11 Unönö waʼato nono mbanuami hegöi urifömi.+ Itugu oya ira ba monönö waʼatora. Mowanua niha ba daʼö simane me mböröta+ ba abölö ohahau dödömi iadaʼa moroi me föna.+ Awena dania aboto ba dödömi wa yaʼo Yehowa.+
12 Mowanua khömi niha ba daʼö ono mbanuagu Izaraʼeli ba labaliʼö ami tana khöra.+ Tobali ami ondröitara, ba lö irai taya nonora mibeʼe.’”+
13 ”Daʼa niwaʼö Yehowa Lowalangi Fondrege Zalawa: ’Lamane khömi niha, ”Yaʼugö andrö soi si manga niha, ba yaʼugö mbörö wa taya ndraono ba soimö.”’
14 ’Börö daʼö, lö saʼae öʼa niha mazui taya ndraono ba soimö öbeʼe,’ iwaʼö Yehowa Lowalangi Fondrege Zalawa.
15 Lö utehegö laʼoʼaya ndraʼugö soi böʼö mazui so niha sangailasi yaʼugö.+ Lö saʼae kala soimö öbeʼe,’ iwaʼö Yehowa Lowalangi Fondrege Zalawa.”
16 Imane zui khögu Yehowa,
17 ”He ono niha, me toröi ndraono Gizaraʼeli ba mbanuara, raʼiö labeʼe mbanua daʼö börö gamuatara hegöi nifaluara.+ Ogoro ndraʼo wamaigi amuatara si raʼiö andrö hulö ndra alawe safökhö talu.+
18 Andrö ufaduwa wönugu khöra börö me no laduwagö ndro ba mbanua daʼö,+ ba no raʼiö labeʼe mbanua daʼö börö nadu niʼogorofi* andrö.+
19 Ufazawili ira ba soi böʼö hegöi ba mbanua böʼö misa.+ Uhuku ira moloʼö amuata hegöi nifaluara.
20 Hizaʼi, me möi ira ba soi daʼö, lataʼunöisi döigu niʼamoniʼö andrö+ niha si so ba daʼö ba lamane, ’Yaʼira andre ono mbanua Yehowa, hizaʼi nifaso ira wa laröi mbanuara.’
21 Andrö, uforomaʼö wa uʼameʼegö tödö döigu niʼamoniʼö, si no lataʼunöisi iraono Gizaraʼeli ba gotalua soi si toröi yaʼira.”+
22 ”Börö daʼö, ömane ba ndraono Gizaraʼeli, ’Daʼa niwaʼö Yehowa Lowalangi Fondrege Zalawa: ”He yaʼami iraono Gizaraʼeli, tenga börö ami wa uʼefaʼö ami, hizaʼi börö döigu niʼamoniʼö andrö si no mitaʼunöisi ba gotalua soi si möi yaʼami.”’+
23 ’Hasambalö uʼamoniʼö döigu solakhömi andrö+ si no mitaʼunöisi ba gotalua soi böʼö. Na teʼamoniʼö ndraʼo föna soi daʼö börö ami, awena dania aboto ba dödöra wa yaʼo Yehowa,’+ iwaʼö Yehowa Lowalangi Fondrege Zalawa.
24 ’Uhalö ami ba soi misa ba uʼowuloi ami moroi ba mbanua böʼö, aefa daʼö uʼohe ami ba mbanuami.+
25 Utefe ami idanö sohahau ba aheta ndraʼimi.+ Uhaogö ami moroi ba ngawalö zi raʼiö+ hegöi ba nadumi niʼogorofi andrö.+
26 Uʼasogö khömi dödö si bohou,+ ba ubohouni wangera-ngerami.+ Uheta ba mbotomi dödö si hulö gara andrö+ ba ubeʼe khömi dödö foloʼö.*
27 Ubeʼe khömi gehehagu niʼamoniʼö enaʼö tola mifalua gamakhoitagu.+ Daʼö mbörö wa miʼoʼö ba mifalua goroisagu.
28 Toröi dania ami ba danö nibeʼegu khö ndra tuami. Tobali ami ono mbanuagu ba Lowalangimi ndraʼo.’+
29 ”’Uʼefaʼö ami moroi ba ngawalö zi raʼiö nifaluami, ba uwaʼö ba mbua zinanö enaʼö oya mbuania, ba lö uʼasogö khömi mbaŵa lofo.+
30 Uwaʼö ba döla geu hegöi ba danö enaʼö oya mbuania, enaʼö lö teʼailasi ami ba gotalua soi böʼö börö mbaŵa lofo.+
31 Ba luo daʼö, ifuli dania itörö tödömi gamuatami hegöi si lö sökhi nifaluami. Ogoro dania ami waʼaurimi börö zala nifaluami awö gamuatami si raʼiö.+
32 Hizaʼi, böi zi lö aboto ba dödömi wa ufalua daʼa tenga börö ami,’+ iwaʼö Yehowa Lowalangi Fondrege Zalawa. ’He yaʼami iraono Gizaraʼeli, sinangea na aila ba teʼailasi ami börö gamuatami.’
33 ”Daʼa niwaʼö Yehowa Lowalangi Fondrege Zalawa: ’Ba ginötö uʼehao ami moroi ba zala nifaluami, ufaʼaso niha ba mbanuami+ ba mufuli mufazökhi gadudula andrö.+
34 Mufuli mutanö zinanö ba danö si no muröi andrö. Muröi ia mböröta enaʼö laʼila ia dozi niha sanörö.
35 Lamane niha, ”Hulö Kabu Edena+ danö si no muröi andrö. No mufoʼöli ba mowanua niha ba mbanua si no tobali adudula ba zilalö, si no muröi ba si no tekiko.”+
36 Awena dania laʼila soi böʼö si so ba zi fasuimi wa yaʼo Yehowa zi no mamazökhi adudula andrö ba si no mananö sinanö ba danö si no muröi. Yaʼo Yehowa zangumaʼö daʼö ba yaʼo göi zamalua yaʼia.’+
37 ”Daʼa niwaʼö Yehowa Lowalangi Fondrege Zalawa: ’Utehegö dania laʼandrö khögu iraono Gizaraʼeli ba wonönö faʼatora simane faʼoya ngawawa mbiri-biri ba ubeʼe khöra niʼandröra.
38 Simane ngawawa niha niʼamoniʼö ba simane ngawawa mbiri-biri* ba Yeruzalema ba ginötö mufalua gowasa,+ mowanua dania niha ba mbanua si no tobali adudula andrö ba zilalö.+ Awena dania aboto ba dödöra wa yaʼo Yehowa.’”
Nisura ba gahe zura
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Eluahania tödö sanemaʼö fanuturu lala moroi khö Lowalangi.
^ Mazui te ”mbiri-biri nibeʼe sumange”.
