Hezekieli 38:1-23
38 Aefa daʼö, imane nasa khögu Yehowa,
2 ”He ono niha, otahögö Gogi andrö moroi ba danö Magogi,+ sondröniaʼö fondrege zalawa khö Mesekhi hegöi Tubala,+ ba amaʼeleʼö sanandrösa khönia.+
3 Ömane, ’Daʼa niwaʼö Yehowa Lowalangi Fondrege Zalawa: ”He yaʼugö Gogi, sondröniaʼö fondrege zalawa khö Mesekhi hegöi Tubala, yaʼo dania zolawa yaʼugö.
4 Yaʼo dania zamaelungu yaʼugö ba ubeʼe gai ba zimbimö.+ Uʼohe ndraʼugö baero hegöi ira saradadumö,+ yaʼia daʼö kudo awö zi fakudo yawania. Ato sibai ira ba no lafake nukha fondrege zi sökhi ba laʼohe mbaluse sebua, baluse side-ide hegöi föda.
5 Fao khöra Weresia, Gaitiofia hegöi Futo.+ Oi mobaluse side-ide ira ba motakula.
6 Simanö göi Gomeri awö ndra saradadunia hegöi ngaʼötö Dogarima+ moroi ba wondrege danö tanö yöu ba fefu ndra saradadunia. Ato sibai soi zi fao khöu.+
7 ”’”Mifaʼanö ami, yaʼugö hegöi ira saradadu si no owulo si fao khöu. Yaʼugö zi tobali kumandru khöra.
8 ”’”Me no ara ginötö, lakaoni* dania ndraʼugö. Ba gangohorita ndröfi daʼö, ösuwö dania mbanua niha si no teʼefaʼö ba mbawa wöda, niʼowuloi moroi ba ngawalö soi ba hili Gizaraʼeli si no ara muröi. Teʼowuloi nono mbanua daʼö moroi ba ngawalö soi ba lö sametaʼu yaʼira.+
9 Ösuwö ira simane bade. Mihawui dania mbanua daʼö simane lawuo, yaʼugö ba fefu ndra saradadumö hegöi soi si fao khöu.”’
10 ”Daʼa niwaʼö Yehowa Lowalangi Fondrege Zalawa: ’Ba luo daʼö, so zi tumbu ba dödöu ba öʼera-era zi lö sökhi.
11 Ömane, ”Usuwö dania mbanua side-ide si lö baʼa-baʼa.+ Usuwö nono mbanuania satulö ba sahono-hono. Lö hadöi towa solumöʼö banuara, lö baʼa-baʼa ba lö bawa göli.”
12 Omasiʼö na oya gama-gama nirabumö ba öʼoloiʼö. Ösuwö nahia si no adudu si no laʼiagö iadaʼa,+ ba ösuwö nono mbanua si no teʼowuloi moroi ba ngawalö soi,+ yaʼia daʼö ono mbanua sangöhöna faʼakayo hegöi tanö,+ sowanua ba wusö danö.
13 ”’Seba,+ Dedano+ awö ndra sogale moroi ba Darisi+ ba fefu ndra saradadunia lamane khöu, ”Hadia ösuwö ira enaʼö oya gama-gama si tola örabu ba öʼoloiʼö? Hadia öʼowuloi ndra saradadumö ba wanaʼu firö, anaʼa, ba öhalö harato hegöi gama-gama, ba oya öfaʼuʼu khöu zi no örabu?”’
14 ”He ono niha, amaʼeleʼö ba ömane khö Gogi, ’Daʼa niwaʼö Yehowa Lowalangi Fondrege Zalawa: ”Ba luo daʼö dania, öʼila wa no ahono-hono mbanuagu Izaraʼeli.+
15 Tohare ndraʼugö moroi ba nahamö, moroi ba wondrege danö tanö yöu.+ Ato sibai soi zi fao khöu. Oi zara fakudo ira. Faʼatora simane ngawawa zaradadu fondrege zato.+
16 He yaʼugö Gogi, yaʼugö dania zanuwö ono mbanuagu Izaraʼeli simane lawuo sangahawui tanö. Ba gafuriata götö daʼö, ufatenge ndraʼugö ba wanuwö soigu,+ enaʼö aboto ba dödö soi böʼö sanandrösa khögu na uʼamoniʼö ndraʼo föna duduma höröra börö ami.”’+
17 ”Daʼa niwaʼö Yehowa Lowalangi Fondrege Zalawa: ’Yaʼugö mböröta niwaʼögu me fahuhuo ndraʼo khö ndra samaʼeleʼö khögu ba Gizaraʼeli. Mamaʼeleʼö ira ba zi hauga fakhe wa yaʼugö dania zi möi manuwö yaʼira.’
18 ”’Ba luo daʼö, na tohare Gogi wanuwö soi ndraono Gizaraʼeli, mohola wönugu sabölö-bölö,’ iwaʼö Yehowa Lowalangi Fondrege Zalawa.+
19 ’Si fao fönu hegöi faʼaukhu dödögu si hola-hola, fahuhuo dania ndraʼo khöu, ba na luo daʼö alua ndruru danö sabölö-bölö ba danö Gizaraʼeli.
20 Fefu giʼa ba nasi, fofo ba dalu mbanua, utu ndruʼu ba mbenua awö gurifö sanana-nana ba fefu niha gulidanö, oi zara manizi ira börö ndraʼo. Aruru hili,+ aruru hili sokara ba asoʼa mbaʼa-baʼa tou ba danö.’
21 ”Imane Yehowa Lowalangi Fondrege Zalawa, ’Ukaoni dania wöda ba wolawa yaʼia ba hili andrö khögu fefu. Dozi niha lasuwö dalifusöra faoma föda.+
22 Uhuku ia ba uʼasogö wökhö waba+ ba fanuwagö do. Utorugö deu sabölö-bölö, teu kara,+ alitö,+ balera,+ ba wangahawui yaʼia hegöi ira saradadunia awö soi si fao khönia.+
23 Hasambalö ufolakhömi ba uʼamoniʼö ndraʼo, ba uforomaʼö haniha ndraʼo föna duduma hörö soi böʼö. Awena dania aboto ba dödöra wa yaʼo Yehowa.’
Nisura ba gahe zura
^ Mazui ”laʼameʼegö tödö”.
