Hezekieli 39:1-29
39 ”He ono niha, amaʼeleʼö sanandrösa khö Gogi+ ba fatunö khönia, ’Daʼa niwaʼö Yehowa Lowalangi Fondrege Zalawa: ”He yaʼugö Gogi, sondröniaʼö fondrege zalawa khö Mesekhi hegöi Tubala,+ yaʼo dania zolawa yaʼugö.
2 Yaʼo dania zamaelungu, solohe ba samaondragö yaʼugö moroi ba wondrege danö tanö yöu+ ba uʼohe ndraʼugö ba hili Gizaraʼeli.
3 Yaʼo zanimba fana sinali ba dangau kabera ba uʼekhugö tou nono wanamö ba dangau kambölö.
4 Mate dania ndraʼugö ba hili Gizaraʼeli,+ simanö göi fefu ndra saradadumö hegöi soi si fao khöu. Ubaliʼö ndraʼugö balazo wofo si manga nagole awö gutu ndruʼu ba mbenua.”’+
5 ”’Mate dania ndraʼugö ba mbenua,+ börö me yaʼo zangumaʼö,’ iwaʼö Yehowa Lowalangi Fondrege Zalawa.
6 ”’Ufatenge galitö ba Magogi hegöi ba niha si toröi ba hulo si lö ametaʼuö.+ Awena dania aboto ba dödöra wa yaʼo Yehowa.
7 Tehöngö dania ubeʼe döigu niʼamoniʼö ba gotalua nono mbanuagu Izaraʼeli, ba lö saʼae utehegö lataʼunöisi döigu niʼamoniʼö andrö. Awena dania aboto ba dödö soi böʼö wa yaʼo Yehowa,+ Niʼamoniʼö andrö ba Gizaraʼeli.’+
8 ”Imane Yehowa Lowalangi Fondrege Zalawa, ’Hasambalö itörö ba alua zi no uwaʼö. Daʼa ngaluo si no irai uwaʼö.
9 Möi baero ndraono Gizaraʼeli ba wamewuaʼö alitö ba wanunu fakake wasuwöta: baluse side-ide, baluse sebua, fana sinali, ono wana, siʼo hegöi toho. Laʼogunaʼö daʼö ba wamewuaʼö alitö+ sagötö zi fitu fakhe.
10 Lö saʼae lahalö geu ba mbenua mazui laʼowuloi geu moroi ba gatua, börö me fakake wasuwöta andrö niʼogunaʼöra ba wamewuaʼö alitö.’
”’Laʼoloiʼö harato niha si no irai mangoloiʼö yaʼira, ba larabu gama-gama niha si no irai morabu yaʼira,’ iwaʼö Yehowa Lowalangi Fondrege Zalawa.
11 ”’Ba luo daʼö, uhenaigö lewatö khö Gogi+ ba danö Gizaraʼeli, ba ndraso götöna tanö ba gatumbukha nasi. Daso daʼö zombaʼa niha sangötö. Ba daʼö dania mukoʼo Gogi hegöi si fao khönia, ba mufotöi nahia daʼö Daso Hamoni-Gogi.*+
12 Fitu waŵa waʼara ginötö niʼogunaʼö ndraono Gizaraʼeli ba wogoʼo yaʼira ba wangehaogö tanö andrö.+
13 Fao fefu nono mbanua soi daʼö ba wogoʼo yaʼira. Daʼö mbörö wa tehöngö ira ba ginötö ufolakhömi ndraʼo,’+ iwaʼö Yehowa Lowalangi Fondrege Zalawa.
14 ”’So niha nifataro ba woʼanöröi soi daʼö ba wogoʼo boto zi mate si toröi tou ba danö faböi taʼunö soi daʼö. Lö laböhöli wangalui sagötö zi fitu waŵa.
15 Na laʼila döla zi mate, labeʼe dandra-tandra ba zinga daʼö. Lö ara, tohare zogoʼo ba lakoʼo ba Ndraso Hamoni-Gogi.+
16 So göi ba daʼö döi mbanua sotöi Hamona.* Simane daʼö wangehaogöra banua andrö.’+
17 ”He ono niha, daʼa niwaʼö Yehowa Lowalangi Fondrege Zalawa: ’Ömane ba ngawalö wofo ba fefu gutu ndruʼu, ”Miʼaine ba daʼa ba miʼowuloi ami. Miʼowuloi ami ba zinga zumange si no uhenaigö khömi, sumange soya sibai ba hili Gizaraʼeli.+ Miʼa dania nagole ba mibadu ndro.+
18 Miʼa dania nagole niha sabölö, ba mibadu ndro zondröniaʼö ba gulidanö. Yaʼira andrö biri-biri si matua, ono mbiri-biri, nambi, sawi si matua hegöi ngawalö gurifö satabö moroi ba Mbazana.
19 Miʼa dania zotawö irege abuso ami ba mibadu ndro irege mabu. Fefu daʼö moroi ba zumange si no uhenaigö khömi.”’
20 ”’Ba mezagu, abuso ami wemanga kudo awö zi fakudo yawania, niha sagabölö hegöi ira saradadu,’+ iwaʼö Yehowa Lowalangi Fondrege Zalawa.
21 ”’Uforomaʼö lakhömigu ba gotalua soi böʼö. Ahori laʼila niha wanguhuku nifaluagu ba faʼabölö* niforomaʼögu khöra.+
22 Iʼotarai daʼö, awena dania aboto ba dödö ndraono Gizaraʼeli wa yaʼo Yehowa Lowalangira.
23 Aboto dania ba dödö soi böʼö wa teʼoloiʼö ndraono Gizaraʼeli börö zalara samösa ba no faröi ira khögu.+ Andrö wa ubiniʼö mbawagu khöra+ ba ululu ira ba danga nudura.+ Ahori mate ira ba mbawa wöda.
24 Ufalua khöra daʼö moloʼö faʼaraʼiö hegöi olalöwara. Ubiniʼö mbawagu khöra.’
25 ”Börö daʼö, daʼa niwaʼö Yehowa Lowalangi Fondrege Zalawa: ’Ufuli uʼohe mangawuli ngaʼötö Yakobo+ si no muʼoloiʼö ba uhakhösi tödö fefu ndraono Gizaraʼeli.+ Uʼoʼawögö döigu si fao faʼaterou dödö.+
26 Me no aefa teʼailasi ira börö waʼafaröira khögu,+ toröi dania ira ba mbanuara ba ahono dödöra. Lö hadöi sametaʼu yaʼira saʼae.+
27 Ba ginötö uʼohe ira mangawuli moroi ba gotalua soi böʼö ba uʼowuloi ira moroi ba mbanua nudu,+ hasambalö uʼamoniʼö ndraʼo ba gotaluara, föna duduma hörö soi böʼö.’+
28 ”’Na ululu ira ba danga soi böʼö ba teʼoloiʼö ira, aefa daʼö ufuli uʼowuloi ira ba danöra irege samösa lö si toröi, awena dania aboto ba dödöra wa yaʼo Yehowa Lowalangira.+
29 Lö saʼae ubiniʼö mbawagu khöra,+ börö me ufaduwa gehehagu ba ndraono Gizaraʼeli,’+ iwaʼö Yehowa Lowalangi Fondrege Zalawa.”
