Hezekieli 40:1-49
40 Ba mböröta ndröfi si 25 me no teʼoloiʼö ndraʼaga,+ ba ngaluo si 10 ba mbaŵa siföföna, ba ndröfi si 14 me no murabu Yeruzalema,+ urasoi waʼabölö* Yehowa ba iʼohe ndraʼo ba mbanua daʼö.+
2 Ba gangilata andrö moroi khö Lowalangi, teʼohe ndraʼo ba danö Gizaraʼeli, ba ibeʼe ndraʼo ba hili fondrege zalawa.+ Tanö raya hili andrö, uʼila zi hulö mbanua sebua.
3 Me iʼohe ndraʼo ba daʼö, uʼila samösa ndra matua si takile si hulö tembaga.+ No igogohe zinali moroi ba nukha si sökhi awö döla zukhu fanuʼa+ ba no mozizio ia ba mbawa göli.
4 Imane khögu ira matua andrö, ”He ono niha, haogö nehegö, fondrondrongo ba töngöni fefu niforomaʼögu khöu, daʼö mbörö wa muʼohe ndraʼugö ba daʼa. Fatunö fefu zi no öʼila andrö ba ndraono Gizaraʼeli.”+
5 So ba daʼö göli samasui osali.* No igogohe ira matua daʼö döla zukhu fanuʼa ba faʼanaunia 3,11 meter.* Isuʼa dowa andrö ba fagölö waʼaweʼe-weʼenia ba waʼaweʼe-weʼe döla zukhu fanuʼa, simanö göi waʼalawania.
6 Aefa daʼö, möi ia ba mbawa göli sangotahögö atumbukha,+ ba möi ia yawa ba nora. Isuʼa waʼebolo lala si numalö tanö bakha, ba faʼebolonia 3,11 meter.* Simanö göi waʼebolo lala si sara si numalö tanö bakha.
7 Ero sambua naha zanaro, faʼanaunia 3,11 meter* ba simanö göi waʼebolo. Ero sambua naha zanaro, otaluania 2,6 meter.*+ So göi lala weʼamöi bakha ba zinga kaki lima mbawa göli sangotahögö osali, faʼebolonia 3,11 meter.*
8 Aefa daʼö, isuʼa kaki lima mbawa göli si numalö ba gosali, 3,11 meter* zuʼa-suʼania.
9 Isuʼa kaki lima mbawa göli andrö, 4,1 meter* zuʼa-suʼania. Isuʼa gehomo ba zingania, sameter* zuʼa-suʼania. Kaki lima andrö so ia ba zinga mbawa göli sangotahögö osali.
10 So naha zanaro ba mbawa göli sangotahögö atumbukha, tölu-tölu ero fatambai, ba no fagölö-gölö waʼebua. Simanö göi gehomo ba zingania.
11 Isuʼa lala si numalö ba mbawa göli andrö, faʼebolonia 5,2 meter* ba faʼanau mbawa göli 6,7 meter.*
12 Ero sambua naha zanaro si so ba mbawa göli, faʼebuania 3,11 meter.* No labeʼe mbaʼa-baʼa ero sambua naha zanaro andrö, 52 sentimeter* zuʼa-suʼania.
13 Ba isuʼa mbawa göli andrö iʼotarai zagö naha zanaro si sambua numalö ba zagö naha zanaro ba zi tambainia, faʼebolonia 13 meter.* Faoma fatahö mbawandruhö naha zanaro andrö.+
14 Isuʼa göi gehomo ba zingania, faʼalawania 31 meter.* Simanö göi gehomo tanö ba zinga mbawa göli ba zi fasui olayama.
15 Iʼotarai lala si numalö mibakha ba mbawa göli irugi tanö föna kaki lima ba zinga mbawa göli sangotahögö osali andrö, faʼanaunia 26 meter.*
16 Ba naha zanaro hegöi ehomo ba zinga mbawa göli fatambai, so zandrela si no mufolesi-lesi sadöni bakha.+ So göi zandrela ba zi fasui kaki limania. Ba gehomo tanö ba zinga so gambara geu khorema.+
17 Aefa daʼö, iʼohe ndraʼo ba golayama tanö baero. Uʼila ba daʼö 30 ngawua nahia wemanga+ ba so göi zalo kara samasui olayamania.
18 Faʼebolo zalo kara andrö fagölö zuʼa-suʼania ba waʼanau mbawa göli. No ahöndrö tou zalo daʼa.
19 Isuʼa hawaʼebolo gotalua iʼotarai tanö föna mbawa göli sahöndrö irugi tanö baero golayama tanö bakha. So 52 meter* gotaluara, he na musuʼa iʼotarai mbawa göli gatumbukha hegöi ba mbawa göli tanö yöu.
20 Ba golayama tanö baero, so mbawa göli sangotahögö tanö yöu. Isuʼa waʼanau hegöi faʼebolonia.
21 So naha zanaro ba daʼö, tölu-tölu ero fatambai. Ehomo ba zingania hegöi kaki limania fagölö waʼebuara mbawa göli si oföna. Faʼanaunia 26 meter,* ba faʼebolonia 13 meter.*
22 Sandrela, kaki lima hegöi gambara geu khorema,+ fagölö waʼebuania simane si so ba mbawa göli gatumbukha. Tola möi niha ba mbawa göli andrö na latörö fitu ngawua mbosi nora, ba tanö föna so kaki limania.
23 Ba golayama tanö bakha, so sambua mbawa göli si fatahö ba mbawa göli tanö yöu, ba sambua mbawa göli si fatahö ba mbawa göli gatumbukha. Isuʼa hawaʼebolo gotalua mbawa göli si sambua awö mbawa göli si fatahö khönia, ba 52 meter* gotaluara.
24 Aefa daʼö, iʼohe ndraʼo tanö raya ba uʼila ba daʼö sambua mbawa göli.+ Isuʼa gehomo tanö ba zinga awö kaki limania ba fagölö waʼebuania ba mbawa göli tanö böʼö.
25 So zandrela ba zingania fatambai hegöi ba kaki limania, simane sandrela tanö böʼö. Faʼanau mbawa göli daʼö 26 meter* ba faʼebolonia 13 meter.*
26 So fitu ngawua mbosi nora si numalö ba mbawa göli daʼö+ ba so kaki lima tanö fönania. So göi gambara geu khorema ba gehomo tanö ba zinga kaki lima, sambu-sambua ero fatambai.
27 Ba golayama tanö bakha, so mbawa göli sangotahögö tanö raya. Isuʼa hawaʼebolo gotalua mbawa göli daʼö ofeta ba mbawa göli tanö raya, ba 52 meter* gotaluara.
28 Aefa daʼö, iʼohe ndraʼo ba golayama tanö bakha, matörö mbawa göli tanö raya. Isuʼa mbawa göli tanö raya andrö ba fagölö zuʼa-suʼania ba mbawa göli tanö böʼö.
29 Naha zanaro, ehomo tanö ba zinga hegöi kaki limania, fagölö zuʼa-suʼania ba danö böʼö. So zandrela ba zingania fatambai hegöi ba kaki limania. Faʼanau mbawa göli daʼö 26 meter* ba faʼebolonia 13 meter.*+
30 So kaki lima ba mbawa göli si numalö tanö bakha, 13 meter* waʼanau ba 2,6 meter* waʼebolo.
31 Kaki limania iʼotahögö golayama tanö baero, ba so gambara geu khorema ba gehomo tanö ba zinga.+ So walu ngawua mbosi nora si numalö ba mbawa göli andrö.+
32 Aefa daʼö, iʼohe ndraʼo ba golayama tanö bakha gamaudu gatumbukha. Isuʼa mbawa göli ba fagölö zuʼa-suʼania ba mbawa göli tanö böʼö.
33 Naha zanaro, ehomo tanö ba zinga hegöi kaki limania, fagölö zuʼa-suʼania ba danö böʼö. So zandrela ba zingania fatambai hegöi ba kaki limania. Faʼanau mbawa göli daʼö 26 meter* ba faʼebolonia 13 meter.*
34 Kaki limania iʼotahögö golayama tanö baero, ba so gambara geu khorema ba gehomo si dua rozi tanö ba zinga. So walu ngawua mbosi nora si numalö ba mbawa göli andrö.
35 Aefa daʼö, iʼohe ndraʼo ba kaki lima tanö yöu.+ Isuʼa mbawa göli andrö ba fagölö zuʼa-suʼania ba mbawa göli tanö böʼö.
36 Naha zanaro, ehomo tanö ba zinga hegöi kaki limania, fagölö zuʼa-suʼania ba danö böʼö. So zandrela ba zingania fatambai hegöi ba kaki limania. Faʼanau mbawa göli daʼö 26 meter* ba faʼebolonia 13 meter.*
37 Ehomo tanö ba zinga iʼotahögö golayama tanö baero, ba so gambara geu khorema ba gehomo si dua rozi tanö ba zinga. So walu ngawua mbosi nora si numalö ba mbawa göli andrö.
38 Ahatö ba gehomo tanö ba zinga mbawa göli andrö so nahia wemanga nifobawandruhö. Ba daʼö lasasai fefu zumange nitunu.+
39 Ba kaki lima mbawa göli andrö, so dombua meza fatambai si tobali naha wanaba sumange nitunu maʼafefu,+ sumange fameta horö+ hegöi sumange fameta zala.+
40 Ba lala si numalö ba mbawa göli tanö yöu, so dombua meza föna mbawandruhö weʼamöi bakha. So göi dombua tö meza ba zi tambainia moroi ba kaki lima mbawa göli.
41 So öfa ngawua meza tanö baero mbawa göli, ba öfa ngawua tö tanö ba kaki lima mbawa göli. Walu ngawua fefu meza si tobali naha wanaba sumange.
42 Meza si öfa ngawua si tobali naha wanaba sumange nitunu andrö tefazökhi moroi ba gara nitaba. Faʼaganau meza daʼö 78 sentimeter* ba faʼebolonia 78 sentimeter* ba faʼalawania 52 sentimeter.* So ba meza andrö wakake niʼogunaʼö ba wanaba sumange nitunu hegöi sumange tanö böʼö.
43 Ba zi fasui dowa tanö bakha no lafasa mbata-bata, ezai laluʼa waʼebolo. Ba dete meza andrö labeʼe nagole si tobali sumange.
44 Baero ba mbawa göli tanö bakha so nahia wemanga khö ndra sanunö.+ Nahia daʼö so ba golayama tanö bakha sahatö ba mbawa göli tanö yöu sangotahögö tanö raya. So göi nahia wemanga tanö böʼö sangotahögö tanö yöu, ba zinga mbawa göli gatumbukha.
45 Imane khögu, ”Nahia wemanga sangotahögö tanö raya, laʼogunaʼö ira ere sangai halöwö ba gosali.+
46 Nahia wemanga sangotahögö tanö yöu, laʼogunaʼö ira ere sangai halöwö ba naha wanunu sumange.+ Yaʼira andrö ngaʼötö Zadoki,+ yaʼia daʼö niha Lewi nifataro ba wangai halöwö föna Yehowa.”+
47 Aefa daʼö, isuʼa golayama tanö bakha si öfa sagi, faʼanaunia 52 meter* ba faʼebolonia 52 meter.* So naha wanunu sumange föna gosali andrö.
48 Iʼohe ndraʼo ba kaki lima gosali.+ Isuʼa gehomo tanö ba zinga kaki lima andrö faʼanaunia 2,6 meter* ba faʼebolonia 1,6 meter.* Sara gehomo ba gabera ba sara ba gambölö.
49 Faʼanau kaki lima andrö 10,4 meter* ba faʼebolonia 5,7 meter.* Tola möi niha bakha ba daʼö na latörö nora. So gehomo sahatö ba zinga toga, sara ero tambai.+
Nisura ba gahe zura
^ Sin.: ”danga”.
^ Sin.: ”omo”. Ba faza 40-48, tola göi mufoʼeluaha ngawua wehede daʼa tobali osali mazui si fasui osali.
