Hezekieli 42:1-20
42 Aefa daʼö, iʼohe ndraʼo baero ba golayama tanö yöu,+ ba zi fasui nahia wemanga ba zinga nahia si lö baʼa-baʼa,+ tanö yöu domosa si so ba zi tambainia.+
2 Faʼanau nahia daʼö 52 meter* ba faʼebolonia 26 meter.* Bawandruhönia no iʼotahögö tanö yöu.
3 So ia ba gotalua zalo tanö baero faoma olayama tanö bakha si 10,4 meter* faʼebolo.+ Ba nahia daʼö, so domosa si no fatahö, tölu tika waʼalawa ba no faoma fatahö fale-falenia.
4 Ba gotalua domosa andrö no lafazökhi lala, faʼebolonia+ 5,2 meter* ba faʼanaunia 52 meter.* So tanö yöu mbawandruhö weʼamöi bakha.
5 Abölö ide-ide nahia wemanga si so tanö yawa moroi ba nahia wemanga tanö ba dalu hegöi tanö si tou, börö me muʼogunaʼö nahiania tobali fale-fale.
6 Tölu tika domosa daʼö, hizaʼi lö hadöi ehomo simane si so ba golayama. Andrö wa abölö ide-ide nahia tanö yawa moroi ba nahia tanö ba dalu hegöi tanö si tou.
7 So dowa kara sahatö ba domosa nahia wemanga si faola ba golayama tanö baero. Faʼanaunia 26 meter* ba no fatahö ira domosa nahia wemanga si sambua tö.
8 Tomosa nahia wemanga si faola ba golayama tanö baero faʼanaunia 26 meter,* hizaʼi tomosa nahia wemanga sahatö ba naha niʼamoniʼö faʼanaunia 52 meter.*
9 Tanö ba gatumbukha so lala weʼamöi ba nahia wemanga andre, latörö golayama tanö baero.
10 Ba gamaudu tanö raya, so nahia wemanga ba zi tambai dowa kara sangotahögö atumbukha. So ia ba zinga nahia si lö baʼa-baʼa hegöi tomosa andrö.*+
11 So lala föna nahia wemanga andrö, simane si so ba domosa nahia wemanga tanö yöu.+ Fagölö-gölö waʼanaunia hegöi faʼebolonia, simanö göi mbawandruhö weʼamöi baero fagölö wamazökhi yaʼia. Bawandruhö weʼamöi bakha
12 fagölö simane bawandruhö weʼamöi bakha ba nahia wemanga si so tanö raya. So mbawandruhö weʼamöi bakha ba mbalö lala andrö ba zinga dowa kara sangotahögö atumbukha. Tola ba daʼö latörö na so zi möi bakha.+
13 Aefa daʼö imane khögu, ”Nahia wemanga si so tanö yöu hegöi tanö raya si fasinga ba nahia si lö baʼa-baʼa,+ daʼö nahia wemanga niʼamoniʼö. Ba daʼö laʼa zumange fondrege niʼamoniʼö ira ere sangai halöwö föna Yehowa. Ba daʼö göi labeʼe zumange fondrege niʼamoniʼö,+ sumange niʼa,* sumange fameta horö ba sumange fameta zala, börö me no niʼamoniʼö nahia daʼö.+
14 Me no möi ira bakha, tebai möi baero ndra ere moroi ba nahia niʼamoniʼö numalö ba golayama tanö baero na lafake nasa mbaru me mangai halöwö ira.+ Lö tola löʼö lafake nukha tanö böʼö fatua lö möi ira ba nahia nitörö niha sato, börö me no niʼamoniʼö mbaru daʼö.”
15 Me no awai isuʼa gosali tanö bakha, iʼohe ndraʼo baero ba matörö mbawa göli sangotahögö atumbukha.+ Aefa daʼö, isuʼa fefu nahia andrö.
16 Isuʼa tanö ba gatumbukha faoma töla zukhu fanuʼa,* arakhagö 1,6 kilometer waʼanau* iʼotarai mbalö faföfö.
17 Isuʼa tanö yöu, faʼanaunia arakhagö 1,6 kilometer.*
18 Isuʼa tanö raya, faʼanaunia arakhagö 1,6 kilometer.*
19 Möi ia isuʼa tanö ba gaekhula, faʼanaunia arakhagö 1,6 kilometer.*
20 Isuʼa göi fefu zinga si öfa sagi andrö. So dowa ba zi fasuinia,+ faʼanaunia arakhagö 1,6 kilometer* ba faʼebolonia arakhagö 1,6 kilometer*+ enaʼö tefasafi nahia niʼamoniʼö andre moroi ba nahia si toʼölö.+
Nisura ba gahe zura
^ Sin.: ”100 siʼu”. Moloʼö Septuaginta Yunani: ”faʼanaunia 100 siʼu”. Ba li Heberaiʼo: ”Lala si sambua siʼu”. Faigi Lamp. B14.
^ Eluahania tomosa nitötöi ba ayati 1.
^ Mazui ”sumange bua nowi”.
^ Sin.: ”faʼanaunia 500 sukhu fanuʼa”.
^ Sin.: ”faʼanaunia 500 sukhu fanuʼa”.
^ Sin.: ”faʼanaunia 500 sukhu fanuʼa”.
^ Sin.: ”faʼanaunia 500 sukhu fanuʼa”.
^ Sin.: ”faʼanaunia 500 sukhu fanuʼa”.
^ Sin.: ”faʼanaunia 500 sukhu fanuʼa”.
