Hezekieli 43:1-27
43 Aefa daʼö, iʼohe ndraʼo ba mbawa göli sangotahögö atumbukha.+
2 Uʼila ba daʼö lakhömi Lowalangi ndraono Gizaraʼeli si tohare moroi ba gatumbukha,+ linia hulö ruru nidanö sogoso-goso.+ Mohaga gulidanö börö lakhöminia.+
3 Fakhili-khili niʼilagu andre ba gangilata nitemagu me möi ndraʼo* ba wanudugö banua daʼö.* Fakhili sibai ira niʼilagu ba Nungo Nidanö Khebara.+ Aefa daʼö utuhi danö.
4 Ba möi bakha lakhömi Yehowa ba gosali andrö itörö mbawa göli sangotahögö atumbukha.+
5 Lö ara, so waʼabölö* samazawa ba solohe yaʼo ba golayama tanö bakha. Uʼila lakhömi Yehowa no ifönui gosali.+
6 Urongo so zi fahuhuo khögu moroi ba gosali andrö. Möi ia khögu, ilau mozizio ba zingagu.+
7 Imane khögu,
”He ono niha, ba daʼa so dadaomagu+ awö dane-dane gahegu+ hegöi nahia waʼatoröigu sagötö faʼara ba gotalua ndraono Gizaraʼeli.+ Lö saʼae lataʼunöisi döigu niʼamoniʼö andrö+ iraono Gizaraʼeli fabaya razora börö gamuatara si faröi* awö nadu nifosumangera si hulö razo.*
8 Lafazökhi mbawandruhö gosalira ba gamaudu mbawandruhö weʼamöi ba gosali khögu, simanö göi döla-döla mbawandruhö gosalira ba gamaudu mbawandruhö gosali khögu. Ha towa gotaluama.+ Lafalua göi ngawalö gamuata si raʼiö. Daʼö mbörö wa taʼunö döigu niʼamoniʼö. Andrö wa uhori ira si fao fönu.+
9 Na laböhöli gamuatara* andrö ba latiboʼö nadu nifosumangera si hulö razo,* hasambalö toröi ndraʼo ba gotaluara sagötö faʼara.+
10 ”He ono niha, tutunö hewisa zindruhunia gosali andrö ba ndraono Gizaraʼeli+ enaʼö aila ira ba zala si no lafalua.+ Moguna lafomaha ira ba zuʼa-suʼa gambara domosa daʼö.
11 Na aila ira ba ngawalö zi no lafalua, haogö wogambaraini gosali daʼö föna höröra. Foromaʼö hezo gamaudunia, lala weʼamöi baero, lala weʼamöi bakha+ hegöi gambarania maʼafefu awö zi no muzara-zara. Fatunö khöra fefu goroisa awö gamakhoitania enaʼö laʼoʼö ba laʼameʼegö tödö fefu zi no muzara-zara ba gambara andrö.+
12 Daʼa goroisa sanandrösa ba gosali: No fondrege niʼamoniʼö fefu mbanua si so ba zi fasui hili andrö.+ Daʼö goroisa sanandrösa ba gosali.
13 ”Iadaʼa uforomaʼö khöu hawaʼebua naha wanunu sumange andrö. Lala wanuʼa yaʼia fagölö simane lala wanuʼa osali.*+ Faʼalawa dane-danenia 52 sentimeter* ba monönö 52 sentimeter* waʼebolonia ero fatambai moroi ba tika tanö yawa. So göi mbandra ba zingania, mato 22 sentimeter* waʼalawa. Simane daʼö dane-dane naha wanunu sumange.
14 Tika si dua faʼalawania sameter.* Monönö 52 sentimeter* waʼebolo ero fatambai moroi ba tika tanö yawania. Tika si tölu faʼalawania 2,1 meter.* Monönö 52 sentimeter* waʼebolonia ero fatambai moroi ba tika fondrege tanö yawa.
15 Naha wamewuaʼö alitö ba tika fondrege tanö yawa, faʼalawania 2,1 meter.* So öfa ngawua dandru ba zi öfa watalinga.+
16 Öfa sagi naha wamewuaʼö alitö andrö. Faʼanaunia 6,2 meter* ba faʼebolonia 6,2 meter.*+
17 Tika tölu faʼanaunia 7,3 meter* ba faʼebolonia 7,3 meter.* Monönö 52 sentimeter* waʼebolonia ero fatambai moroi ba tika fondrege tanö yawa. So mbandra ba zi fasuinia 26 sentimeter* zuʼa-suʼania.
”Ora naha wanunu sumange andrö iʼotahögö gatumbukha.”
18 Aefa daʼö imane khögu, ”He ono niha, daʼa niwaʼö Yehowa Lowalangi Fondrege Zalawa: ’Daʼa gamakhoita sanandrösa ba naha wanunu sumange si lö tola löʼö muʼoʼö ba ginötö mufazökhi naha wanunu sumange. Oʼö daʼa ba ginötö öbeʼe zumange nitunu maʼafefu hegöi na mutefe ndro ba naha wanunu sumange andrö.’+
19 ”’Halö sageu zawi si matua sawuyu-wuyu si tobali sumange fameta horö+ ba beʼe khö ndra ere Lewi moroi ba ngaʼötö Zadoki,+ sangai halöwö fönagu,’ iwaʼö Yehowa Lowalangi Fondrege Zalawa.
20 ’Halö ösa ndronia ba fagule ba dandru si öfa rozi si so ba watalinga naha wanunu sumange yaʼia daʼö ba zi öfa watalinga tika tölu hegöi ba mbandra enaʼö teʼamoniʼö naha wanunu sumange andrö moroi ba horö.+
21 Halö zawi si matua sawuyu-wuyu si tobali sumange fameta horö ba tunu daʼö ba nahia si no mutatugöi ba gosali, yaʼia daʼö tanö baero naha niʼamoniʼö.+
22 Ba ngaluo si dua, beʼe mbiri-biri si matua si lö fökhö tobali sumange fameta horö. Moguna laʼamoniʼö naha wanunu sumange andrö ira ere simane nifaluara ba zawi si matua sawuyu-wuyu.’
23 ”’Me no awai öʼamoniʼö daʼö, beʼe zawi si matua sawuyu-wuyu hegöi biri-biri si matua si lö fökhö tobali sumange.
24 Ohe daʼö föna Yehowa. Labeʼe nasio ira ere ba gurifö si dua rozi si no mutaba andrö+ ba latunu fefu daʼö tobali sumange nitunu khö Yehowa.
25 Sagötö zi fitu hari, sageu maʼökhö öbeʼe nambi si matua, sageu zawi si matua sawuyu-wuyu ba sageu mbiri-biri si matua si tobali sumange fameta horö.+ Tebai mibeʼe gurifö sofökhö tobali sumange.
26 Moguna laʼamoniʼö naha wanunu sumange sagötö zi fitu hari andrö enaʼö tola muʼogunaʼö ia.
27 Na no awai zi fitu hari andrö, iʼotarai ngaluo si walu,+ lö aetu labeʼe zumange nitunu maʼafefu ira ere ba naha wanunu sumange hegöi sumange fangatulö moroi khömi.* Omuso dödögu khömi,’+ iwaʼö Yehowa Lowalangi Fondrege Zalawa.”
Nisura ba gahe zura
^ Mazui te ”ia”.
^ Eluahania ba wamaʼeleʼö faʼadudunia.
^ Eluaha ngawua wehede sindruhunia yaʼia daʼö eheha niʼamoniʼö mazui malaʼika.
^ Sin.: ”gamatela razora”.
^ Mazui ”börö wohorö ba wamati nifaluara”.
^ Mazui ”wamalua amuata wohorö ba wamati”.
^ Sin.: ”laʼaröuʼö waniboʼö amatela razora”.
^ Ba li Heberaiʼo, suʼa-suʼa niʼogunaʼö ba wanuʼa naha wanunu sumange andre yaʼia daʼö siʼu sanau (51,8 cm). Faigi Hez 40:5.
^ Eluahania moroi ba nono mbanua.
