Hezekieli 44:1-31
44 Ifuli iʼohe ndraʼo ba matörö mbawa göli tanö baero ba naha niʼamoniʼö sangotahögö atumbukha+ ba muduhö mbawa göli andrö.+
2 Aefa daʼö imane khögu Yehowa, ”Tebai mubokai mbawa göli daʼa, hasambalö teduhö manö. Tebai so niha sanörö daʼö börö me no itörö Yehowa Lowalangi ndraono Gizaraʼeli.+ Andrö wa muduhö manö mbawa göli daʼö.
3 Hizaʼi, tola modadao zondröniaʼö ba daʼö ba wemanga roti föna Yehowa,+ börö me samösa sondröniaʼö ia. Ba kaki lima mbawa göli itörö na möi ia bakha, ba daʼö göi itörö na mangawuli ia.”+
4 Ifuli zui iʼohe ndraʼo föna gosali ba matörö mbawa göli tanö yöu ba anehe ndraʼo wa no afönu gosali Yehowa andrö lakhömi Yehowa.+ Utuhi danö.+
5 Imane zui khögu Yehowa, ”He ono niha, ameʼegö tödö, faigi, ba haogö wamondrongo fefu niwaʼögu khöu sanandrösa ba gamakhoita awö goroisa ba gosali Yehowa. Haogö wanöngöni lala weʼamöi bakha ba gosali hegöi lala weʼamöi baero moroi ba naha niʼamoniʼö.+
6 Ömane ba ndraono Gizaraʼeli somasi mamadaö andrö, ’Daʼa niwaʼö Yehowa Lowalangi Fondrege Zalawa: ”He yaʼami iraono Gizaraʼeli, noa daʼö. Miböhöli fefu gamuatami si raʼiö.
7 No mitaʼunöisi gosaligu me miʼohe ba naha niʼamoniʼö niha si fatewu si lö sökhi ba si lö nisuna. Mibeʼe sumange roti andrö khögu, tawö ba simanö göi ndro, sindruhunia no misawö mbuʼusa ligu ba ngawalö gamuatami si raʼiö.
8 Lö mirorogö gama-gamagu niʼamoniʼö.+ Mifatenge niha böʼö ba wamalua halöwömi ba naha niʼamoniʼö khögu.”’
9 ”’Daʼa niwaʼö Yehowa Lowalangi Fondrege Zalawa: ”Niha si fatewu si lö sökhi si toröi ba gotalua ndraono Gizaraʼeli ba si lö nisuna, tebai möi ira ba naha niʼamoniʼö andrö khögu.”’
10 ”’Hasambalö lataögö ira niha Lewi lua-lua zala nifaluara, yaʼia daʼö sangerogö yaʼo ba ginötö laröi ndraʼo+ iraono Gizaraʼeli ba laʼoʼö nadu niʼogorofi* andrö.
11 Lö tola löʼö, yaʼira dania zangai halöwö ba naha niʼamoniʼö andrö khögu sanarogö bawa göli gosali+ ba sangai halöwö ba gosali. Yaʼira zanaba sumange nitunu maʼafefu ba sumange tanö böʼö soguna ba nono mbanua. Mosindro ira föna nono mbanua ba wangai halöwö.
12 No mangai halöwö ira föna nadu niʼogorofi andrö ba ladönisi ndraono Gizaraʼeli ba wamalua horö.+ Daʼö mbörö wa ufazawa dangagu ba möido ba hölu wa hasambalö lataögö lua-lua zala nifaluara,’ iwaʼö Yehowa Lowalangi Fondrege Zalawa.
13 Lö saʼae mangai halöwö ira fönagu tobali ere mazui lababaya gama-gamagu niʼamoniʼö mazui fondrege niʼamoniʼö. Lataögö waʼaila börö ngawalö zi raʼiö si no lafalua.
14 Hewaʼae simanö, ufatenge ira wohalöwö ba gosali ba wamalua ngawalö halöwö sinangea lababaya ba daʼö.’+
15 ”’Ira ere Lewi ngaʼötö Zadoki,+ sangai halöwö ba naha niʼamoniʼö khögu me laʼerogö ndraʼo iraono Gizaraʼeli,+ daʼö dania zangai halöwö fönagu ba yaʼira zosindro fönagu ba wameʼe tawö-tawö+ awö ndro+ tobali sumange,’ iwaʼö Yehowa Lowalangi Fondrege Zalawa.
16 ’Yaʼira dania zi möi bakha ba naha niʼamoniʼö khögu ba lafahatö ira ba mezagu ba wamosumange yaʼo.+ Lafalua dania halöwö nibeʼegu khöra.+
17 ”’Na möi ira ba mbawa göli tanö bakha, lö tola löʼö lafake nukha si sökhi.+ Tebai lafake nukha nifazökhi moroi ba mbu mbiri-biri na mangai halöwö ira ba mbawa göli golayama tanö bakha mazui gamaudu nahia tanö bakha.
18 Lafake mböbö högö nifazökhi moroi ba nukha si sökhi hegöi sarewa sadogo-dogo nifazökhi moroi ba nukha si sökhi.+ Tebai lafake nukha si möi fangöndru böböira.
19 Na möi ira ba golayama tanö baero, yaʼia daʼö olayama niha sato, enaʼö laheta nukha nifakera me mangai halöwö+ ira ba lasaitagö ba mbateʼe nahia wemanga niʼamoniʼö.+ Aefa daʼö, lafake mbaru tanö böʼö faböi teʼamoniʼö nono mbanua sato börö mbaru daʼö.
20 Tebai lahori+ mazui laʼanauʼö mbu högöra. Moguna lahaogö wanaba bu högöra.
21 Tebai mamadu agu gere na möi ia ba golayama tanö bakha.+
22 Tebai mangowalu ira khö lakha mbanua mazui ira alawe si no fabali khö woʼomonia.+ Hizaʼi, tola mangowalu ira khö zi samösa ono alawe ngaʼötö ndraono Gizaraʼeli mazui lakha zi samösa ere.’+
23 ”’Lö tola löʼö lafatunö ba nono mbanuagu gamaehuta niʼamoniʼö moroi ba zi toʼölö, ba lafahaʼö göi hadia gamaehuta zi raʼiö moroi ba zi lö raʼiö.+
24 Yaʼira zi tobali sanguhuku na so gamadöniwa.+ Laʼetuʼö huku moloʼö amakhoitagu.+ Enaʼö laʼoʼö goroisagu awö zi no uhonogöi sanandrösa ba ngawalö gowasa+ ba laʼamoniʼö zabato khögu.
25 Tebai lahatöʼö ira ba mboto zi mate, ma dania raʼiö ira. Hizaʼi, tola raʼiö ira na si mate andrö ama, ina, ono matua, ono alawe, talifusöra matua, mazui talifusöra alawe si lö sangowalu.+
26 Na no awai teʼamoniʼö zi samösa ere, moguna ibaloi fitu hari awena tola ifuli ia ba halöwönia.
27 Ba ginötö möi ia bakha ba nahia niʼamoniʼö, ba golayama tanö bakha, ba wangai halöwö ba nahia niʼamoniʼö, moguna ibeʼe zumange fameta horönia,’+ iwaʼö Yehowa Lowalangi Fondrege zalawa.
28 ”’Latema dania gondröita: Yaʼo gondröitara.+ Tebai mibeʼe khöra danö tobali okhötara börö me yaʼo dana khöra.
29 Yaʼira dania zi manga sumange niʼa,*+ sumange fameta horö, ba sumange fameta zala.+ Fefu ngawalö niʼamoniʼö ba Gizaraʼeli daʼö zi tobali tana khöra.+
30 Fondrege zi sökhi moroi ba mbua nowi siföföna ba gofu hadia dolo-tolo nibeʼemi, daʼö dania zi tobali tana khö ndra ere.+ Mibeʼe khö ndra ere hamo darigu si lö mugili, siaʼa mbua nowimi.+ Na mifalua daʼö tefahowuʼö nösi nomomi.+
31 Tebai laʼa ira ere ngawalö wofo, urifö si no mate mazui nisasawi gurifö samuʼi.’+
Nisura ba gahe zura
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Mazui ”sumange bua nowi”.
