Hezekieli 47:1-23
47 Aefa daʼö, ifuli iʼohe ndraʼo ba mbawandruhö gosali,+ ba uʼila nungo nidanö sangele ba mbawandruhö tanö tou gosali numalö ba gatumbukha, börö me tanö ba gatumbukha+ iʼotahögö osali andrö. Mangele mitou nidanö moroi ba gosali, iʼotarai ba gambölönia, yaʼia daʼö tanö raya naha wanunu sumange.
2 Ba iʼohe ndraʼo baero matörö mbawa göli tanö yöu,+ möiga ba mbawa göli tanö baero sangotahögö atumbukha.+ Uʼila maʼifu nidanö sangele moroi ba gambölö.
3 Ba möi ia tanö ba gatumbukha, no igogohe zinali fanuʼa.+ Isuʼa nidanö andrö ofeta 518 meter* ba iwaʼö khögu wangötö. Falawa mbuʼu kawono nidanönia.
4 Ifuli isuʼa 518 meter* tö, ba iwaʼö khögu wangötö, falawa balöduhi nidanönia.
Isuʼa nasa 518 meter* tö ba iwaʼö khögu wangötö, falawa löwi-löwi nidanönia.
5 Aefa daʼö, isuʼa 518 meter* tö. Abölö-bölö nidanönia irege tebai uʼötö. Abakha sibai ba awena tola muʼötö balazi molangi. Abölö-bölö ba tebai muʼötö na mutörö ahe.
6 Imane khögu, ”He ono niha, hadia no öʼila daʼa?”
Ba iwaʼö khögu ba wanörö ungo nidanö andrö ofeta ba ngöfinia.
7 Me urugi ngöfi, uʼila geu soya sibai ba zi fatambai ungo nidanö andrö.+
8 Imane khögu, ”Mangele nidanö daʼa ba mbanua tanö ba gatumbukha ofeta ba Garaba+ ba aekhu ba nasi. Na no ofeta ba nasi,+ ifuli ohahau nidanö nasi andrö.
9 Gofu hezo mangele nidanö andrö, oya zauri saliwa-liwa ba danö. Börö me ba nasi mangele ia, oya sibai dania giʼa ba nasi. Ohahau nasi, ba gofu hezo mangele nidanö andrö, ba nahia daʼö göi so waʼauri.
10 ”Mozizio zi fagai ba zinga gelea nidanö andrö iʼotarai Nengedi+ ofeta ba Enegelaʼi. Ba daʼö so nahia wolokhoi giri. Oya göi ngawalö giʼa ba daʼö, simane iʼa si so ba Nasi Sebolo.*+
11 ”Ba nasi daʼö dania so nahia solaza-laza ba safönu taimba si lö muhaogö. Mutehegö manö moʼasio ia.+
12 ”Ba zi fatambai nungo nidanö daʼö, tumbu dania ngawalö mbua zinanö. Lö irai tebato mbuania ba lö aleu mbulu. Ero waŵa, so mbua si bohou, börö me mangele ba daʼö nidanö moroi ba naha niʼamoniʼö.+ Laʼa mbuania ba tobali dalu-dalu mbulunia.”+
13 Daʼa niwaʼö Yehowa Lowalangi Fondrege Zalawa: ”Daʼa mbanua si lö tola löʼö mibagi tobali ondröita ba zi 12 mado Gizaraʼeli. So dombua dana khö Yosefo.+
14 Miʼokhögö dania danö daʼö, ba fagölö-gölö wombagi yaʼia. No fahölu ndraʼo ba wameʼe tanö daʼa khö ndra tuami,+ ba ubeʼe ia khömi iadaʼa tobali ondröita.
15 ”Daʼa nolania tanö yöu: Iʼotarai Nasi Sebolo, ihene lala si numalö ba Hetelono+ ofeta ba Zedadi,+
16 Hamata,+ Berota+ hegöi Siberaʼi si so ba gotalua mbanua Ndramaseko faoma Hamata, numalö ba Hasara-hatiko si so ba zinga nola danö Haurana.+
17 Ola danö andrö iʼotarai ba nasi numalö ba Hasara-enono,+ ba zi sandrohu nola danö Ndramaseko tanö yöu hegöi ba nola danö Hamata.+ Daʼö nola tanö yöu.
18 ”Ola tanö ba gatumbukha yaʼia daʼö iʼotarai ba gotalua Haurana faoma Damaseko, ihene manö Nungo Nidanö Yoridano si so ba gotalua Gileadi+ hegöi tanö Gizaraʼeli. Misuʼa iʼotarai ba mbalö tanö yöu ofeta ba nasi gatumbukha.* Daʼa nola tanö ba gatumbukha.
19 ”Ola tanö raya yaʼia daʼö iʼotarai ba Damara numalö ba Meribati-kadesi,+ aefa daʼö ba Ndraso irugi Nasi Sebolo.+ Daʼö nola tanö raya.
20 ”Tanö ba gaekhulania so Nasi Sebolo, iʼotarai nola tanö raya ofeta yefo Lebo-hamata.*+ Daʼö nola tanö ba gaekhula.”
21 ”Mibagi-bagi khömi danö daʼa yaʼami si 12 mado ndraono Gizaraʼeli.
22 Mibagi-bagi khömi tobali tanö ondröita. Mibeʼe göi ösa ba niha si fatewu si fao khömi, sangokhögö iraono sagötö toröi ira ba gotaluami. Mibaliʼö ira iraono Gizaraʼeli sindruhu ba dödömi. Latema göi gondröita ba gotalua mado ndraono Gizaraʼeli simane yaʼami.
23 Mibeʼe ba niha si fatewu danö si toröi yaʼira tobali ondröita tana khöra,” iwaʼö Yehowa Lowalangi Fondrege Zalawa.
