Hezekieli 5:1-17
5 ”He ono niha, halö wöda satarö ba ogunaʼö daʼö fanöwö gambiu hegöi fanöwö mbu högöu. Halö kilo, suʼa waʼabuania ba bagi mbumö andrö.
2 Tunu zi sambua niʼotölunia bakha ba mbanua sebua na no awai luo wamaʼuʼu andrö.+ Si sambua niʼotölunia nasa, taba faoma föda ba zi sagörö banua daʼö.+ Si sambua niʼotölunia, öfohombo ba nangi ba uʼohe baero wöda ba wolohi yaʼia.+
3 ”Halö göi mato hauga rozi ba bukusi daʼö ba mbarumö.
4 Halö nasa mato hauga rozi tö ba fazaumba bakha ba galitö irege akhozi. Manana galitö andrö dania ba ndraono Gizaraʼeli.+
5 ”Daʼa niwaʼö Yehowa Lowalangi Fondrege Zalawa: ’Daʼa Yeruzalema. No ufataro ia ba gotalua soi böʼö ba no ifasui ia banua böʼö.
6 Hizaʼi, mamadaö ia ba wolawa angetula huku hegöi amakhoitagu. Abölö lö sökhi ia moroi ba soi si fasui yaʼia.+ Itimbagö gangetula huku si no ubeʼe ba lö iʼoʼö gamakhoitagu.’
7 ”Börö daʼö, daʼa niwaʼö Yehowa Lowalangi Fondrege Zalawa: ’Abölö fatandro ami moroi ba soi si fasui yaʼami. Lö miʼoʼö gangetula huku si no ubeʼe ba lö mifalua gamakhoitagu. Hizaʼi, miʼoʼö gamakhoita soi ba zi fasui yaʼami.+ Börö daʼö,
8 daʼa niwaʼö Yehowa Lowalangi Fondrege Zalawa: ”He yaʼugö banua Yeruzalema,+ tobali ndraʼo udumö. Uhuku ndraʼugö föna soi böʼö.+
9 Hadia nifaluagu khöu, lö irai ufalua khöu me mböröta, ba lö göi irai ufalua zimane daʼö saʼae, börö gamuatau si raʼiö.+
10 ”’”Laʼa dania nonora ira ama,+ ba laʼa namara iraono. Uhuku dania ndraʼugö ba ufazawili misa* niha si toröi.”’+
11 ”Imane Yehowa Lowalangi Fondrege Zalawa, ’Faya wa no sauri ndraʼo na lö utimbagö ndraʼugö* me no ötaʼunöisi naha niʼamoniʼö khögu börö nadu niʼogorofi andrö awö gamuatamö si raʼiö.+ Lö ahakhö dödögu wamaigi yaʼami ba lö alimagö khögu ami.+
12 Sambua niʼotölu mate nono mbanuamö börö wökhö waba mazui si mate ba waʼolofo. Si sambua niʼotölu tö mate ba mbawa wöda ba zi sagörö banua andrö.+ Ba si sambua niʼotölu safuria ufazawili ira misa,* ba ubeʼe baero wöda ba wolohi yaʼira.+
13 Aefa daʼö, lö hadöi saʼae fönugu. Alö wönugu ba ahono dödögu.+ Me no aefa ulau mbakhu dödögu khöra, awena dania aboto ba dödöra wa yaʼo Yehowa zi fahuhuo börö me uʼandrö khöra enaʼö ha yaʼo lafosumange.+
14 ”’Ubaliʼö ndraʼugö adudula. Laʼoʼaya ndraʼugö soi si fasui yaʼugö ero latörö fönau.+
15 Me uhuku ndraʼugö si fao fönu, faʼaukhu dödö ba faʼabao dödö, laʼoʼaya ba laʼailasi ndraʼugö+ soi ba zi fasuimö. Tobali ndraʼugö famangelama ba soi böʼö. Yaʼo Yehowa zangumaʼö.
16 ”’Uʼasogö lofo sabölö-bölö si möi börö waʼamate si hulö nono wana. Hasambalö mate ndraʼugö.+ Unönö mbaŵa lofo andrö ba uʼalösi mbalazomö.*+
17 Uʼasogö mbaŵa lofo hegöi utu ndruʼu samuʼi+ ba wamunu onomi. Ufatörö khömi ngawalö wökhö waba, fanuwagö do ba uʼasogö wöda ba wolawa yaʼugö.+ Yaʼo Yehowa zangumaʼö.’”
Nisura ba gahe zura
^ Sin.: ”ba watalinga nangi”.
^ Mazui ”lö utehegö ato nono mbanuamö”.
^ Sin.: ”ufazawili misa ba watalinga nangi”.
^ Sin.: ”ufatö ziʼo roti khöu”. Te eluahania siʼo wotawigö roti.
