Hezekieli 7:1-27
7 Ifuli zui imane khögu Yehowa,
2 ”He ono niha, daʼa niwaʼö Yehowa Lowalangi Fondrege Zalawa ba mbanua ndraono Gizaraʼeli: ’No irugi inötö! No irugi fefu gamozua mbanua andrö.
3 No irugi inötö ba wamalua fönugu khöu. Uhuku ndraʼugö moloʼö amuatamö ba ötema zulö ba mbua-buamö si raʼiö.
4 Lö ahakhö dödögu wamaigi yaʼugö+ ba lö alimagö khögu ndraʼugö. Usulöni fefu zi no öfalua moloʼö amuatamö, ba ötema zulö ba mbua-buamö si raʼiö.+ Awena dania aboto ba dödömi wa yaʼo Yehowa.’+
5 ”Daʼa niwaʼö Yehowa Lowalangi Fondrege Zalawa: ’Alua wamakao sabölö-bölö, famakao sahöli-höli dödö.+
6 No ahatö ginötö andrö. Hasambalö alua ia. Iʼanemaiʼö göna ndraʼugö ba zi lö ödöna-döna. Hasambalö tohare ia.
7 No irugi inötö khöu yaʼugö si toröi ba daʼa. Hasambalö alua ia, ba lö ara tö irugi.+ So waʼafawuka ba hili, tenga faʼomuso dödö.
8 ”’Hasambalö uduwagö wönugu andrö+ ba ufalua ia khöu.+ Uhuku ndraʼugö moloʼö amuatamö, ba ötema zulö ba mbua-buamö si raʼiö.
9 Lö ahakhö dödögu wamaigi yaʼugö ba lö alimagö khögu ndraʼugö.+ Usulöni fefu zi no öfalua moloʼö amuatamö, ba ötema zulö ba mbua-buamö si raʼiö. Awena dania aboto ba dödöu wa yaʼo Yehowa sanuwö yaʼugö.+
10 ”’Hiza, no tohare luo andrö!+ No irugi inötö khöu. No muhenaigö ziʼo ba wanguhuku yaʼugö. Itugu asiliyawa nudumö.
11 Faʼalösökhi andrö dania zi tobali siʼo ba wanguhuku si lö sökhi.+ Lö hadöi si tola mangefaʼö yaʼia. Mate dania niha sato ba lö hadöi harato mazui faʼatehöngö si toröi.
12 Tohare dania ngaluo daʼö, hasambalö alua ia. Akha lö omuso dödö zowöli ba akha lö abu dödö zamawa börö me tohare wönu Lowalangi andrö ba niha fefu.*+
13 Lö mangawuli ba danga zamawa fefu gama-gama nifamawania hewaʼae auri nasa ia, börö me manandrösa gangilata daʼa ba niha fefu. Lö hadöi si tola aefa ba wamakao andrö ba lö hadöi sauri börö zala si no ifalua.*
14 ”’No lafoli dorofe+ ba no lafaʼanö ira. Hizaʼi, lö hadöi si möi fasuwö, börö me mofönu ndraʼo khöra fefu.+
15 Tanö baero so wöda+ ba tanö bakha so wökhö waba ba faʼolofo. Hasambalö mate ba mbawa wöda niha si so ba kabu, ba niha si so ba mbanua sebua mate ira ba waʼolofo hegöi ba wökhö waba.+
16 Ba moloi dania ba hili niha si no teʼefaʼö. Simane marafadi si so ba ndraso, laʼeʼesi dania zala si no lafalua.+
17 Ahori atata dangara ba abasö fefu mbalö duhira.*+
18 Laʼonukha goni+ ba manizi-nizi ira waʼataʼu. Teʼailasi dozi niha dania ba oi zara batule fefu högöra.*+
19 ”’Latiboʼö fefu wiröra ba lala ba anuzu dödöra ba ganaʼara. Tebai iʼorifi ira firöra hegöi anaʼara ba luo wönu Yehowa.+ Lö ahono dödöra mazui abuso ira ba no tobali tandrawa khöra ba wamalua sala.
20 Asiliyawa ira ba gama-gamara si sökhi andrö ba laʼogunaʼö wirö hegöi anaʼara ba wamazökhi adu niʼogorofi.+ Daʼö dania mbörö wa fatuwu ira ba gama-gamara andrö.
21 Ubeʼe fefu daʼö* ba danga niha baero enaʼö larabu ba ululu ba danga niha si lö sökhi enaʼö laʼoloiʼö. Lataʼunöisi daʼö fefu.
22 ”’Ubiniʼö mbawagu khöra+ ba lataʼunöisi nahiagu si no tobini.* Möi bakha ndra sorabu aefa daʼö lataʼunöisi nahia daʼö.+
23 ”’Faʼanö rate*+ börö me ato zi mate ba soi daʼö, lua-lua wanguhuku si lö atulö.+ Afönu faʼalösökhi soi daʼö.+
24 Uʼasogö khöra soi fondrege zi lö sökhi,+ sorabu omora.+ Uheta waʼasiliyawa niha sagabölö, ba mutaʼunöisi naha niʼamoniʼö khöra.+
25 Na alua khöra wamakao andrö, laʼalui waʼahono dödö, hizaʼi lö hadöi.+
26 Fatete dania wamakao hegöi angombakhata. Laʼalui gangilata moroi khö ndra samaʼeleʼö,+ hizaʼi lö moguna goroisa* nifahaʼö ndra samaʼeleʼö hegöi mene-mene nibeʼe ndra sondröniaʼö.+
27 Abu dödö razo+ ba afatö dödö ndra sondröniaʼö. Manizi fefu danga nono mbanua börö waʼataʼu. Usulöni khöra moloʼö bua-buara ba uhuku ira moloʼö fanguhuku si no lafalua. Awena dania aboto ba dödöra wa yaʼo Yehowa.’”+
Nisura ba gahe zura
^ Eluahania samawa tanö hegöi sowöli, faoma lö mohare börö me alua khöra wamakao.
^ Mazui te ”börö walimosa nifaluania”.
^ Eluahania böla iö ira waʼataʼu.
^ Eluahania latöwö mbu högöra börö waʼabu dödö.
^ Eluahania anaʼa hegöi firö niʼogunaʼö ba wamazökhi adu.
^ Te eluahania nahia fondrege tanö bakha ba naha niʼamoniʼö khö Yehowa.
^ Eluahania rate ba wangoloiʼö niha.
^ Mazui ”wanuturu lala”.
