Hezekieli 8:1-18
8 Me döfi si önö, baŵa si önö, ba ngaluo si lima, no modadao ndraʼo ba nomogu ba so tanö fönagu ndra sondröniaʼö Yehuda. Me luo daʼö, urasoi waʼabölö* Yehowa Lowalangi Fondrege Zalawa.
2 Me ufakhölödo, uʼila samösa niha si hulö galitö. Iʼotarai löwi-löwinia numalö mitou,+ hulö galitö, ba iʼotarai löwi-löwinia numalö miyawa, no mohaga hulö ganaʼa safusi si takile.*+
3 Iʼoroʼö khögu zi hulö danga ba igogohe mbugu. So waʼabölö* samazawa yaʼo ba dalu mbanua ba iʼohe ndraʼo ba Yeruzalema ba gangilata andrö moroi khö Lowalangi. Iʼohe ndraʼo ba mbawa göli tanö bakha+ sangotahögö tanö yöu, ba naha nadu* sangandrö fönu Lowalangi.+
4 Uʼila ba daʼö lakhömi Lowalangi ndraono Gizaraʼeli,+ simane niʼilagu ba ndraso.+
5 Aefa daʼö imane khögu, ”He ono niha, fakhölöʼö tanö yöu.” Ufakhölö ndraʼo tanö yöu ba uʼila ba daʼö nadu* sangandrö fönu Lowalangi ba lala weʼamöi bakha si so tanö yöu mbawa göli sahatö ba naha wanunu sumange.
6 Imane khögu, ”He ono niha, hadia no öʼila ngawalö zi lö sökhi hegöi si raʼiö nifalua ndraono Gizaraʼeli?+ Daʼö mbörö wa uʼaröuʼö ndraʼo moroi ba naha niʼamoniʼö khögu.+ Hizaʼi, so nasa dania zabölö raʼiö niʼilau baero daʼö.”
7 Aefa daʼö, iʼohe ndraʼo ba mbawandruhö si numalö ba golayama, ba uʼila dowa satöla ba daʼö.
8 Imane khögu, ”He ono niha, nönö wanölaʼö towa daʼö.” Andrö wa utölaʼö dowa andrö ba uʼila lala weʼamöi bakha.
9 Imane khögu, ”Aeʼe bakha ba faigi ngawalö zi lö sökhi hegöi si raʼiö nifaluara ba daʼö.”
10 Möido bakha ba uʼila ngawalö gambara gurifö sanana-nana, urifö si raʼiö,+ ba fefu nadu niʼogorofi* andrö niʼokhögö ndraono Gizaraʼeli.+ No lafoe fefu daʼö ba zi fasui towa.
11 So 70 niha zondröniaʼö iraono Gizaraʼeli sozizio föna nadu andrö, farahu ba daʼö Yaʼasania ono Zafana.+ Oi zara lagogohe naha zumange somuhua, ba numalö miyawa zimbo zumange andrö.+
12 Aefa daʼö imane, ”He ono niha, hadia no öʼila nifalua ndra sondröniaʼö iraono Gizaraʼeli ba zogömi-gömi, ba gamaudu naha nadu andrö khöra ba mbateʼe tanö bakha? Lamane, ’Lö iʼila ita Yehowa. No iröi mbanua daʼa Yehowa.’”+
13 Aefa daʼö imane, ”So nasa dania zabölö raʼiö niʼilau baero daʼö.”
14 Andrö wa iʼohe ndraʼo ba mbawandruhö si numalö bakha ba mbawa göli tanö yöu ba nomo Yehowa. Uʼila ba daʼö ndra alawe sodadao ba wangeʼesi lowalangi Tamusi.
15 Imane nasa khögu, ”He ono niha, hadia no öʼila daʼö? So nasa dania zabölö raʼiö niʼilau baero daʼö.”+
16 Iʼohe ndraʼo ba golayama tanö bakha ba nomo Yehowa.+ Ba mbawandruhö weʼamöi ba gosali Yehowa, ba gotalua kaki lima hegöi naha wanunu sumange, so mato 25 ndra matua sangerogö osali Yehowa ba no laʼotahögö gatumbukha, mangalulu ira ba luo.+
17 Aefa daʼö imane, ”He ono niha, hadia no öʼila daʼö? Lafalua ngawalö zi raʼiö andrö ira niha Yehuda, ba lafönui mbanua daʼa faʼalösökhi+ ba lö laböhöli wangafökhöiʼö tödögu. Hadia muʼaohasi ba dödö daʼa? Laʼoroʼö ba mbawagu ngawalö zi raʼiö.*
18 Andrö wa ufalua khöra wönugu sabölö-bölö. Lö ahakhö dödögu wamaigi yaʼira ba lö alimagö khögu ira.+ Hewaʼae mangarö-ngarö ira ba lö ufondrondrongo.”+
Nisura ba gahe zura
^ Sin.: ”danga”.
^ Sin.: ”elektrum”, yaʼia daʼö anaʼa si no mufaruka firö.
^ Eluaha ngawua wehede daʼa sindruhunia eheha niʼamoniʼö mazui malaʼika.
^ Mazui ”gambara nadu”.
^ Mazui ”gambara nadu”.
^ Ba li Heberaiʼo, te moʼamakhaita ia ba wehede ”si taʼunö” ba wangoromaʼö faʼogoro.
^ Sin.: ”ndraha geu; duturu geu”. Laʼogunaʼö daʼö ba wanömba adu.
