Sura ba Mbanua Niha Keriso ba Golose 4:1-18
4 Yaʼami sokhö sawuyu, mihaogö wamatörö sawuyumi si fao faʼatulö ba mibeʼe zinangea tana khöra börö me so Zokhö yaʼami ba zorugo.+
2 Böi miböhöli wangandrö,+ böi olifu ami* wamalua daʼö ba miʼandrö saohagölö.+
3 Miʼangandrö göi salahima,+ enaʼö itehegö khöma Lowalangi ba wangombakha taromali hegöi si tobini niʼamoniʼö andrö sanandrösa khö Keriso. Daʼö sa mbörö wa larate ndraʼo ba gurunga.+
4 Miʼangandrö enaʼö tola ufaʼema, tefaudu ba zinangeania.
5 Yaʼatua-tua ami ba gotalua niha baero si lö faböbö ba mbanua niha Keriso, ba mihaogö wangogunaʼö inötö.*+
6 Böi tebulö khömi wangehaogö fehedemi nilau asio,+ enaʼö sökhi wamondrongo, ba miʼila hewisa wameʼe fanema li zamösana.+
7 Tikhiko,+ talifusö niʼomasiʼögu, awögu enoni si lö faröi ba sawuyu Zoʼaya, yaʼia zangombakha turiagu khömi.
8 Ufatenge ia khömi enaʼö mirongo duriama ba enaʼö irara dödömi.
9 Darua ira Onesimo,+ talifusö si lö faröi ba niʼomasiʼö, si sambua banua khömi. Lafatunö khömi fefu hadia zalua ba daʼa.
10 Iʼowai ami Arisaro,+ awögu nikuru, simanö göi Mareko+ si tenga böʼö Mbaranaba,* si lö tola löʼö mitemaʼö+ na tohare ia simane niwaʼögu khömi,
11 simanö göi Yesu nifotöi Yuso, yaʼira andrö niha nisuna. Ha yaʼira zi falulu fohalöwö khögu ba Wamatörö Lowalangi ba tobali ira umbu wondrara dödögu.
12 Iʼowai ami Efafera+ sawuyu Yesu Keriso, si otarai mbanuami. Iforege wangandrö salahimi enaʼö ba gafuriatania tobali ami niha soʼahonoa ba wamati, ba miʼokhögö waʼaro dödö ba zomasi Lowalangi.
13 Ufaduhuʼö khömi, no erege dödönia börö ami ba börö ndra talifusö ba Laodikia hegöi ba Hierafoli.
14 Iʼowai ami Luka,+ doto niʼomasiʼöda hegöi Dema.+
15 Mifaʼema wangowaigu khö ndra talifusö si so ba Laodikia, khö dalifusöda ira alawe sotöi Nimefa hegöi ba mbanua niha Keriso sowulo ba nomonia.+
16 Na no aefa lafabasoʼö zura daʼa fönami, mibaso göi+ ba mbanua niha Keriso si so ba Laodikia, ba mibaso göi zura si otarai Laodikia.
17 Aefa daʼö, waʼö khö Arikhifo,+ ”Ameʼegö tödö wamalua halöwö nitemamö moroi khö Zoʼaya enaʼö tola öʼasiwai.”
18 Yaʼo sotöi Faulo, yaʼe wangowaigu, nisuragu samösa.+ Mitörö-törö tödömi ndraʼo si so ba gurunga andre.+ Yamitema waʼasökhi dödö sebua.*
Nisura ba gahe zura
^ Sin.: ”böi miförö”.
^ Sin.: ”Miʼöli ginötö si no so”.
^ Ono zibaya Mbaranaba.
^ Faigi Geluaha Ngawua Wehede.
